বৈধ টিকিট থকাৰ পাছতো বিমানত যাত্রীসকলক উঠাত বাধা দিয়াৰ অভিযোগ উঠিল এয়াৰ ইণ্ডিয়াৰ বিৰুদ্ধে । সেয়ে বিমান সংস্থাক ১০ লাখ টকা জৰিমনা বিহিলে বিমান নিয়ন্ত্রক সংস্থা ডিজিচিএ-য়ে । লগতে তেওঁলোকে এয়াৰ ইণ্ডিয়াক পৰামর্শ দিছে, আগন্তুক দিনত যেন এই সমস্যাৰ পুনৰাবৃত্তি নহয় । যদি পুনৰাবৃত্তি হয় তেনেহ’লে সংস্থাৰ বিৰুদ্ধে পদক্ষেপ গ্ৰহণ কৰা হ’ব ।
বেংগালুৰু, হায়দৰাবাদ আৰু দিল্লীৰ পৰা এনেধৰণৰ কে’বাটাও অভিযোগ পাইছে ডিজিচিএ-য়ে । তাৰ পাছতেই এই কঠোৰ পদক্ষেপ গ্ৰহণ কৰিলে তেওঁলোকে । কেৱল এয়াৰ ইণ্ডিয়াই নহয়, আৰু কে’বাটাও বিমান সংস্থাৰ বিৰুদ্ধেও এই অভিযোগ উঠিছে ।
ডিজিচিএ-য়ে জনাইছে, এয়াৰ ইণ্ডিয়াই নিয়ম লংঘন কৰিছে । তেওঁলোকক শ্ব’কজ ন’টিচ প্ৰেৰণ কৰা হৈছে । যদিও এই বিষয়ত এয়াৰ ইণ্ডিয়াৰ কোনো প্রতিক্রিয়া পোৱা নাই ।
চলিত মাহৰ আৰম্ভণিতেই বিমান উঠা-নমাৰ ক্ষেত্রত নিয়ম লংঘন কৰাৰ অভিযোগ উঠিছিল ভিস্তাৰাৰ বিৰুদ্ধে । সেই সংস্থাকো ১০ লাখ টকা জৰিমনা কৰা হৈছিল । বিশেষভাৱে সক্ষম এজন যাত্রীক বিমানত উঠিবলৈ দিয়াত অস্বীকাৰ কৰাত ইণ্ডিগ’ এয়াৰলাইন্সকো পাঁচ লাখ টকা জৰিমনা বিহিছিল চৰকাৰে ।