ৰাজ্যৰ অন্যতম বৃহৎ নিযুক্তি পৰীক্ষা পৰিচালনাৰ দায়িত্ব অসম মাধ্যমিক শিক্ষা পৰিষদ চমুকৈ ছেবাক অৰ্পণ কৰাৰ পৰিপ্ৰেক্ষিতত গুৱাহাটীস্থিত বামুণীমৈদামৰ ছেবাৰ মুখ্য কাৰ্যালয়ত এতিয়া নিৰাপত্তা বেষ্টনী অধিক কটকটীয়া কৰি তোলা দেখা গৈছে ।
কোনোধৰণৰ অপ্ৰীতিকৰ পৰিস্থিতিৰ উদ্ভৱ নহ’বৰ বাবে মহানগৰ আৰক্ষী-প্ৰশাসনে ছেবাৰ চৌহদত ১৪৪ ধাৰা জাৰি কৰিছে ।
আজিৰে পৰা আৰম্ভ হোৱা ৰাজ্য চৰকাৰৰ তৃতীয় আৰু চতুৰ্থ বৰ্গৰ নিয়োগ পৰীক্ষাৰ সকলো উত্তৰবহীৰ পৰীক্ষণ-নিৰীক্ষণ তথা আনুষংগিক সকলো কাম-কাজ ছেবাৰ এই মুখ্য কাৰ্যালয়ত সমাপন কৰা হ’ব ।
ৰাজ্যৰ ২৫খন জিলাত পৰৱৰ্তী তিনি দিন ধৰি হ’বলগীয়া এই পৰীক্ষাৰ সকলো উত্তৰবহীৰ লগতে অ’এমআৰ শ্বিট মজুত ৰখা হ’ব এই কাৰ্যালয়ত ।
এই সমগ্ৰ প্ৰক্ৰিয়াটোত যাতে কোনোধৰণৰ অনিয়ম সংঘটিত নহয়, তাৰ বাবে তীক্ষ্ণ দৃষ্টি ৰাখিবলৈকে কাৰ্যালয়ৰ চৌহদৰ লগতে এশ মিটাৰ দূৰত্বলৈকে মহানগৰ আৰক্ষী আয়ুক্তালয়ৰ উপ-আয়ুক্তই ১৪৪ ধাৰা জাৰি কৰিছে ।
এই সময়ছোৱাত কাৰ্যালয়ৰ চৌহদত পাঁচ জনতকৈ অধিক লোক সমবেত হ’ব নোৱাৰাৰ লগতে কোনোধৰণৰ আন্দোলন, ধৰ্ণা, সমদল, শ্ল’গান আদি ওলিয়াব নোৱাৰিব । এই নিয়ম ভংগ কৰিলে কঠোৰ আইনী ব্যৱস্থাৰ সন্মুখীন হ’ব লাগিব বুলি জাননী জাৰি কৰিছে আৰক্ষী আয়ুক্তৰ কাৰ্যালয়ে ।
