উত্তৰ আৰু পূব ভাৰতত বৃষ্টিপাতৰ ফলত গৰাখহনীয়া আৰু বানৰ ঘটনাত বিগত তিনি দিনত প্ৰায় ৫০ জন লোকৰ মৃত্যু হৈছে । এক সংবাদ সংস্থাৰ সূত্রে এই দাবী কৰা হৈছে । হিমাচল প্রদেশত হৰপ্পা বানৰ ফলত বহু পথ, ৰেলসেতু ভাঙিছে । বহু গাঁও জলমগ্ন । মাটিৰ ঘৰবোৰ ভাঙিছে ।
হিমাচল প্রশাসনৰ এজন কৰ্মকর্তাই দেওবাৰে জনায়, ৰাজ্যত বান পৰিস্থিতি নিয়ন্ত্রণৰ বাহিৰত হৈ গৈছে । ৰাজ্যৰ সৰ্বাধিক ক্ষতিগ্রস্ত জিলাবোৰ হৈছে মাণ্ডি, কাংড়া আৰু চাম্বা । প্রবল বৰষুণত ইতিমধ্যে তাত ৩৬ জনৰ মৃত্যু হৈছে । ১২ জন গুৰুতৰভাৱে আহত হৈছে । বানত উটি যোৱা পাঁচজন লোক এতিয়াও সন্ধানহীন বুলি জনাইছে ।
উত্তৰাখণ্ডত ডাৱৰ বিস্ফোৰণৰ বৰষুণত শনিবাৰেও চাৰিজন লোকৰ মৃত্যু হৈছে । নদীৰ পানী লোকালয়ত সোমাই যোৱাত বহু ঘৰ কার্যত ধূলিসাৎ হৈ যায় । ১৩ জন সন্ধানহীন । নিখোজসকলৰ সন্ধানত উদ্ধাৰকাৰী দল মোতায়েন কৰিছে উত্তৰাখণ্ড প্রশাসনে ।
ওড়িছাত বানৰ ফলত প্রত্যক্ষ আৰু পৰোক্ষভাৱে ক্ষতিগ্রস্ত হৈছে প্ৰায় আঠ লাখ লোক । উত্তৰ ওড়িছাৰ অধিকাংশ নদী বিপদসীমাৰ ওপৰত বৈছে । বানপানীপ্রৱণ অঞ্চলৰ পৰা প্রায় বেৰ লাখ লোকক নিৰাপদ স্থানলৈ স্থানান্তৰ কৰিছে ওড়িছা প্রশাসনে । বংগোপসাগৰৰ ওপৰত সৃষ্টি হোৱা নিম্নচাপ আৰু তাৰ ফলত প্রবল বৃষ্টিপাতৰ বাবেই এই পৰিস্থিতি সৃষ্টি হৈছে বুলি ধাৰণা কৰিছে বতৰ বিজ্ঞানীসকলে ।
ঝাড়খণ্ডৰ গালুডি বান্ধৰ পৰা অতিৰিক্ত পানী এৰাৰ বাবে ওড়িছাত বান পৰিস্থিতি আৰু বেয়া হৈছে বুলি অনুমান কৰিছে ওড়িছা প্রশাসনে ।
চুবুৰীয়া ৰাজ্য ঝাড়খণ্ডতো বান পৰিস্থিতিৰ সৃষ্টি হৈছে । সেই ৰাজ্যৰ ৰামগড় জিলাত নলকাৰি নদীত উটি গৈছিল পাঁচজন লোক । তেওঁলোকৰ ভিতৰত চাৰিজনক উদ্ধাৰ কৰা হৈছে যদিও এজনক উদ্ধাৰ কৰা হোৱা নাই । কেন্দ্রীয় বতৰ বিজ্ঞান দপ্তৰৰ তৰফৰ পৰা জনোৱা হৈছে, উত্তৰাখণ্ড আৰু হিমাচল প্রদেশত আৰু দুদিন প্ৰবলতকৈ অতি প্ৰবল বৃষ্টিপাত হ’ব ।