উৎকোচ লৈ পুনৰ জালত পৰিল লাট মণ্ডলসহ এজন শিক্ষা বিষয়া

 শেহতীয়াকৈ ৰাজ্যত উৎকোচ লৈ বহু বিষয়া-কৰ্মচাৰী দুৰ্নীতি নিবাৰক শাখাৰ জালত পৰিছে । শুকুৰবাৰে ধুবুৰীত উৎকোচ লোৱা সময়ত এগৰাকী শিক্ষা বিষয়াক দুৰ্নীতি নিবাৰক শাখাই গ্ৰেপ্তাৰ কৰাৰ পিছতে পুনৰ একেদিনাই আৰু এজন ঘোচখোৰ লাটমণ্ডল হাতে-লোটে ধৰা পৰিছে । আজি দুৰ্নীতি নিবাৰক শাখাৰ অভিযানত কৰিমগঞ্জ ৰাজহ চক্ৰ বিষয়াৰ লাট মণ্ডল ৰঞ্জন গোস্বামীক উৎকোচ লৈ থকাৰ সময়তে গ্ৰেপ্তাৰ কৰে । মাটিৰ মিউটেছনৰ বাবে দাবী কৰা ধন লোৱাৰ সময়তে দুৰ্নীতি নিবাৰক শাখাই অভিযান চলাই হাতে-লোটে কৰায়ক্ত কৰে লাট মণ্ডলজনক । সমান্তৰালকৈ আজি সৰ্বশিক্ষা অভিযান মিছনৰ শিক্ষা বিষয়া আজাহাৰুল ইছলামকো উৎকোচ লোৱাৰ সময়ত ধৰা পেলাইছিল দুৰ্নীতি নিবাৰক শাখাই । উল্লেখযোগ্য যে , ৰাজ্যত বৃদ্ধি পোৱা দুৰ্নীতি ৰোধৰ বাবে দুৰ্নীতি নিবাৰক শাখাই চলোৱা এই অভিযানত চলিত মাহত ১৬ জনকৈ ঘোচখোৰ বিষয়া-কৰ্মচাৰী আটক হ’বলগীয়া হৈছে ।