বিটিআৰৰ সদৰ কোকৰাঝাৰ চহৰৰ জয়পুৰস্থিত ছেম কলেজ অৱ নাৰ্ছিঙত শনিবাৰে সন্ধিয়া এক উত্তপ্ত পৰিস্থিতিৰ সৃষ্টি হয় ৷ অভিভাৱক সকলকো দুৰ্ব্যৱহাৰৰ অভিযোগ হোষ্টেল কৰ্তৃপক্ষৰ বিৰুদ্ধে । ফলত হোষ্টেল এৰি সা-সামগ্ৰী লৈ যাবলৈ সাজু হৈছে প্ৰায় অৰ্ধ শতাধিক হোষ্টেলৰ আৱাসী ছাত্ৰী ৷ কাৰ্বিআংলং,ওদালগুৰি,বাগছা আদি বিভিন্ন জিলাৰ পৰা এটা সপোন লৈ ছেম কলেজ অৱ নাৰ্ছিং কলেজত অধ্যয়ন কৰিব আহে বহু ছাত্ৰী ৷
উল্লেখযোগ্য যে, প্ৰতিষ্ঠানটোৱে ইণ্ডিয়ান নাৰ্ছিং কাউন্সিলৰ দ্বাৰা স্বীকৃত বুলি জনাইছিল ৷ কিন্তু পৰৱৰ্তী সময়ত প্ৰতিষ্ঠানটো অসম নাৰ্ছিং কাউন্সিলৰ দ্বাৰাহে স্বীকৃতি পোৱা বুলি জানিব পাৰি ছাত্ৰী সকল ক্ষোভিত হৈ পৰে ৷ অকল ইমানেই নহয় হোষ্টেলৰ আৱাসী ছাত্ৰী সকলক সময়মতে খাদ্য যোগান নধৰা,পানী যোগান নিদিয়া আদি বিভিন্ন ধকণৰ অভিযোগ উত্থাপিত হৈছে ৷
ইফালে ঘটনা সন্দৰ্ভত সুধিবলৈ অহা অভিভাৱকসকলকো প্ৰতিষ্ঠানটোৰ কৰ্তৃপক্ষই বেয়া ব্যৱহাৰ কৰাৰ অভিযোগ উত্থাপন হৈছে । কেৱল কোকৰাঝাৰতেই নহয় ৰাজ্যৰ বিভিন্ন প্ৰান্তত এনে ধৰণৰ বহু সন্দেহজনক প্ৰতিষ্ঠান গঢ় লৈ পৰিলক্ষিত হৈছে যদিও এই ঘটনাৰ পিছত চৰকাৰ-প্ৰশাসনে এনেবোৰ প্ৰতিষ্ঠানৰ বিৰুদ্ধে কেনে ব্যৱস্থা গ্ৰহণ কৰে সেয়া লক্ষ্যণীয় হব।