কোকৰাঝাৰ পশ্চিম জনজাতি সমষ্টিৰ বিধায়ক ৰবিৰাম নাৰ্জাৰীয়ে সমষ্টিৰ বিভিন্ন দিশত উন্নয়ন কৰাৰ লগতে সাংস্কৃতিক ক্ষেত্ৰতো অধিক গুৰুত্ব আৰোপ কৰা পৰিলক্ষিত হৈছে । বিধায়ক ৰবিৰাম নাৰ্জাৰীয়ে বিধায়ক পুঁজিৰ উপৰিও অসম চৰকাৰৰ অইন অইন পুঁজিও অসম চৰকাৰৰ পৰা মঞ্জুৰি কৰি আনি সমষ্টিৰ ব্যাপক উন্নয়নৰ কাম আৰম্ভ কৰিছে । ঠিক তেনেদৰে সাংস্কৃতিক ক্ষেত্ৰখনৰ উন্নয়ন আনিবলৈ কোকৰাঝাৰ জিলাৰ সেৰফানগুৰীত বিধায়ক নাৰ্জাৰীয়ে সাংস্কৃতিক ক্ষেত্ৰত উন্নয়ন আনিবলৈ ১০ লাখ টকা অনুমোদন দি দৈমু সংগীত একাডেমি নামৰ এক একাডেমি নিৰ্মাণ কৰি দিয়ে ।
উক্ত সংগীত একাডেমিৰ আজি ফিটা কাটি উদ্বোধন কৰে কোকৰাঝাৰ পশ্চিম জনজাতি সমষ্টিৰ বিধায়ক নাৰ্জাৰীয়ে । আজিৰ উদ্বোধনী অনুষ্ঠানত সেৰফানগুৰী অঞ্চলৰ বিশিষ্ট বুদ্ধিজীৱি জনক লাল ব্ৰহ্মৰ লগতে বিপিএফ দলীয় কৰ্মী সকলো উপস্থিত থাকে । সংগীত একাডেমিৰ উদ্বোধন কৰি সংবাদিকৰ সাক্ষাৎকাৰত বিধায়ক নাৰ্জাৰীয়ে কয়, ‘অসম চৰকাৰৰ কেবিনেট কোকৰাঝাৰত অনুষ্ঠিত কৰাৰ যি সিদ্ধান্ত লৈছে ইয়াক মই স্বাগতম জনাইছো । মন্ত্ৰী পৰিসদক মই নিজে আদৰাৰ বাবেও প্ৰস্তুত হৈ থাকিম ।’
লগতে কয় যে কোকৰাঝাৰত অনুষ্ঠিত কেবিনেটৰ দ্বাৰা বিটিচি অঞ্চলৰ বহুতো উন্নয়ন হ’ব । ইয়াৰ দ্বাৰায় বিটিআৰ চুক্তিৰ সাক্ষৰকাৰী এনডিএফবিৰ সমস্যাও সমাধান কৰিব বুলিও উল্লেখ কৰে । ইয়াৰ উপৰি কয় যে বিটিআৰ চুক্তিৰ ৬:৩ দফাৰ আধাৰত অপ্ৰাদেশীকৃত বিদ্যালয়সমূহ প্ৰাদেশীকৰণৰ ব্যৱস্থা ল’বলৈ বিটিআৰ চৰকাৰলৈ আহ্বান জনায় বিধায়কজনে । উক্ত অনুষ্ঠানত সংগীত একাডেমিৰ শিক্ষাৰ্থীৰ লগতে প্ৰশিক্ষক সকলো বিভিন্ন ধৰণৰ নৃত্য-গীত আদি প্ৰদৰ্শন কৰে ।