টাটা কোম্পানীৰ প্ৰাক্তন অধ্যক্ষ চাইৰাছ মিস্ত্ৰীৰ পথ দূৰ্ঘটনাত মৃত্যু হোৱাৰ পিছতে বাহনৰ সকলো যাত্ৰীয়ে ছীট বেল্ট পৰিধান কৰিব লাগিব বুলি ঘোষণা কৰে কেন্দ্ৰীয় পথ পৰিবহন মন্ত্ৰী নীতিন গাদকাৰীয়ে । কেন্দ্ৰীয় মন্ত্ৰী জনৰ এই ঘোষণাৰ পিছতে সমগ্ৰ দেশতে প্ৰতিক্ৰিয়াৰ সৃষ্টি হৈছে । ইয়াৰমাজতে বলীউডৰ জনপ্ৰিয় অভিনেত্ৰী তথা প্ৰযোজন-পৰিচালক পূজা ভাটৰ এটা টুইটে বিশেষ চৰ্চা লাভ কৰিছে ।
গাদকাৰীৰ এই ঘোষণাৰ পিছতে অভিনেত্ৰী গৰাকীয়ে প্ৰতিক্ৰিয়া প্ৰকাশ কৰি নিজৰ টুইটাৰ একাউন্টত পোনপটীয়াকৈ উল্লেখ কৰে যে , “সকলোৱে ছীট বেল্ট আৰু এয়াৰবেগৰ কথা কৈ আছে । গুৰুত্বপূৰ্ণ হয় । কিন্তু তাতোকৈ বেছি গুৰুত্বপূৰ্ণ হৈছে পথৰ মাজত সৃষ্টি হোৱা গাঁত আৰু জৰাজীৰ্ণ পথসমূহ মেৰামতি কৰা । আমাৰ পথ বা ঘাইপথ সমূহ নিৰ্মাণৰ বাবে নিম্ন মানদণ্ডৰ সামগ্ৰী ব্যৱহাৰ কৰা সকলক কেতিয়া অপৰাধীৰূপে গণ্য কৰা হ’ব ? তদুপৰি এবাৰ নিৰ্মাণ কৰা পথবোৰৰ ৰক্ষণাবেক্ষণ কৰাটোও জৰুৰী ।”
উল্লেখযোগ্য যে টাটাৰ প্ৰাক্তন অধ্যক্ষ চাইৰাছ মিস্ত্ৰীৰ পথ দূৰ্ঘটনাত মৃত্যু হোৱাৰ পিছতে তদন্তত এইকথা পোহৰলৈ আহিছিল যে দূৰ্ঘটনাৰ সময়ত মিস্ত্ৰী-এ ছীট বেল্ট পৰিধান কৰা নাছিল । যাৰ পৰিপ্ৰেক্ষিতত কেন্দ্ৰীয় পথ পৰিবহন মন্ত্ৰী গৰাকীয়ে সকলো যাত্ৰীৰ বাবে ছীটবেল্ট পৰিধান কৰাটো বাধ্যতামূলক কৰে ।