BTR:বিটিআৰ প্ৰশাসন আৰু ভূটান চৰকাৰৰ প্ৰতিনিধিৰ মাজত আজি এক গুৰুত্বপূৰ্ণ বৈঠক অনুষ্ঠিত হয় ৷ বিটিআৰ সচিবালয়ৰ প্ৰেক্ষাগৃহত অনুষ্ঠিত হোৱা বৈঠকত বিটিআৰৰ পাঁচ খন জিলাৰ উপায়ুক্ত , আৰক্ষী অধীক্ষক সহ শীৰ্ষ বিষয়া আৰু ভুটান চৰকাৰৰ গৃহ মন্ত্ৰণালয়ৰ অধীনস্থ আইন -শৃংখলা বিভাগৰ সঞ্চালক সহ ১২ জনীয় প্ৰতিনিধিৰ দলে অংশগ্ৰহণ কৰে ৷ মূলত দুয়োখন দেশৰ মাজত বেপাৰ , বাণিজ্য আৰু যাতায়াতক লৈ এই বৈঠক অনুষ্ঠিত হয় ৷
উল্লেখ্য যে, মহামাৰী ক’ভিডৰ পৰিপ্ৰেক্ষিতত প্ৰায় অঢ়ৈ বছৰৰ পৰা চুবুৰীয়া ৰাষ্ট্ৰ ভূটানত অসম তথা ভাৰতীয় নাগৰিকৰ বাবে প্ৰৱেশ দুৱাৰ সম্পূৰ্ণ ৰূপে বন্ধ হৈ আছিল ৷ যাৰ ফলত দুয়োখনৰ দেশৰ মাজত ব্যৱসায় বাণিজ্য বন্ধ হৈ পৰিছিল আৰু ইয়াৰ বাবে দুয়োখন দেশৰ বিশেষকৈ সীমান্তৱৰ্তী ৰাইজে যথেষ্ট অসুবিধাৰ সন্মুখীন হ’বলগীয়া হৈছিল ৷ কিন্তু ক’ভিডৰ প্ৰকোপ কমি অহাত অহা ২৩ ছেপ্টেম্বৰৰ পৰা ভূটানৰ প্ৰৱেশ দুৱাৰ পুনৰ মুকলি কৰা হব ৷ যাৰ ফলত ভূটান আৰু ভাৰতৰ মাজত যাতায়তৰ লগতে বেপাৰ, বাণিজ্য আৰু পৰ্যটকৰ ব্যৱস্থা স্বাভাৱিক যাত্ৰা অব্যাহত হ’ব ।
বুধবাৰে বিটিআৰ সচিবালয়ত ভুটান আৰু বিটিআৰ প্ৰশাসনৰে হোৱা বৈঠকৰ অন্তত এই তথ্য সদৰী কৰে ভূটানৰ গৃহ মন্ত্ৰণালয়ৰ অধীনস্থ আইন-শৃংখলা বিভাগৰ সঞ্চালক টাছি পেঞ্জৰে ৷ বৈঠকত ভূটান চৰকাৰে দাদগিৰি আৰু নামলাংত পৰ্যটকৰ সুবিধাৰ্থে প্ৰৰ্যটক কাৰ্যলয় মুকলি কৰা হ’ব বুলিও উল্লেখ কৰে । বৈঠকত ভূটানৰ সৰপাং জিলাৰ উপায়ুক্ত লৱজাঙ, জংখাৰ জিলাৰ উপায়ুক্ত টাছি ৱাঙগমু, ছানড্ৰপ ঝংখাৰ আৰক্ষী অধীক্ষক ছোগায়েলকে ধৰি ১২ জনীয়া ৰয়েল ভূটানৰ দল উপস্থিত থকাৰ বিপৰীতে বিটিআৰৰ হৈ বিটিআৰৰ পৰ্যটন বিভাগৰ কাৰ্যবাহী সদস্য ধৰ্মনাৰায়ণ দাস , বিটিআৰৰ সচিব নৰেন বসুমতৰী , উপ – সচিব অনিত্য বসুমতাৰী , কোকৰাঝাৰ জিলা উপায়ুক্ত বৰ্ণালী ডেকা , আৰক্ষী অধীক্ষক প্ৰতীক বিজয় থুবেকে ধৰি চিৰাং , বাগছা ওদালগুৰি আৰু তামোলপুৰ জিলাৰ উপায়ুক্ত আৰক্ষী অধীক্ষক সহ শীৰ্ষ বিষয়া সকল উপস্থিত আছিল ৷