দক্ষিণ চীন সাগৰৰ উপকুলত চীনৰে টাইৱানৰ কুটনৈতিক সংঘাত অব্যাহত থকাৰ মাজতে শনিবাৰ আৰু দেওবাৰে টাইৱানত সংঘটিত হয় ভূমিকম্প ৷ শনিবাৰে ৬.৬ প্ৰাবল্যৰ ভূমিকম্পত দক্ষিণ টাইৱানত কেইবাটাও অট্টালিকা বিধস্ত হয় ৷
ভূইকপ অনুভূত হোৱাৰ লগে লগে আবাসি সকল ওলাই আহে ৰাজপথলৈ৷ ২৪ ঘন্টা সম্পূৰ্ণ নৌহওঁতেই আজি বিয়লী ভাগত পুনৰ ভূমিকম্পৰ জোকাৰণি হয় ৷ ৰিখটাৰ স্কেলত ৬.৯ প্ৰাবল্য ভূমিকম্পৰ পিছতে টাইৱানৰ বিভিন্ন অঞ্চলত ব্যাপক ক্ষয়ক্ষতি হয় ৷ বহু অট্টালিকা তাচপাতৰ দৰে খহি পৰাৰ লগতে পাহাৰ খহি পৰাৰ দৃশ্যৰ ভিডিঅ ইতিমধ্যে সামাজিক মাধ্যমত ভাইৰেল হৈছে ৷
দক্ষিণ টাইৱানত বিধস্ত হোৱা এটা অট্টালিকাত বহুলোক আবদ্ধ হোৱাৰ কথা সদৰি কৰিছে প্ৰশাসনে৷ অৱশ্যে সকলোকে নিৰাপদে উদ্ধাৰ কৰে উদ্ধাৰকাৰী দলে ৷আনহাতে যাত্ৰীবাহী ট্ৰেইন এখন লাইনচ্যুত হোৱাত ২০ জন লোক আহত হয় ৷
প্ৰৱল ভূমিকম্পত বহু সা-সম্পত্তি বিনষ্ট হোৱাৰ আশংকা প্ৰশাসনে কৰিছে যদিও চৰকাৰৰ তৰফৰ পৰা ক্ষয়-ক্ষতিৰ বিতং তথ্য সদৰি কৰা নাই এই পৰ্যন্ত ৷
উল্লেখ্য যে টাইৱানৰ পূৱ উপকুলত ৬.৬ প্ৰাবল্যৰ ভূমিকম্পৰ মুল অভিকেন্দ্ৰ থকা বুলি নিশ্চিত হোৱাৰ পিছতে উপকুলীয় অঞ্চলবাসী চুনামীৰ আশংকাত ভূগিছে ৷ টাইৱান চৰকাৰে উপকুলীয় অঞ্চলত জাৰি কৰিছে হাই এলাৰ্ট ৷
