অৱশেষত দিল্লীৰ এইমছত দীৰ্ঘদিন ধৰি চিকিৎসাধীন হৈ থকা বিশিষ্ট কৌতুক অভিনেতা ৰাজু শ্ৰীবাস্তৱে এই জীৱনৰ পৰা মেলানি মাগিলে । ৫৮ বছৰ বসয়ত মৃত্যু হোৱা অভিনেতা গৰাকী ব্যায়াম কৰি থকা সময়ত হৃদক্ৰিয়া বন্ধ হৈ পৰি মূৰ্ছা গৈছিল । মগজুৰ ৰক্তক্ষৰণ হোৱা শিল্পীজন দীৰ্ঘদিন ধৰি এইমছৰ আই চি ইউত ভৰ্তি হৈ থকাৰ পিছতেই আজি জীৱনৰ ওচৰত হাৰ মানি চিৰবিদায় লয় ।
জনপ্ৰিয় ৰিয়েলিটি শ্ব’ ‘দ্যা গ্ৰেট ইণ্ডিয়ান লাফটাৰ চেলেঞ্জৰ ‘ ৰ যোগেদি দেশজুৰি প্ৰসিদ্ধ হৈ পৰা অভিনেতাজনে এই শ্ব’ৰ যোগেদি ‘দ্যা কিং অৱ কমেডী’ খিতাপ অৰ্জন কৰিবলৈ সক্ষম হৈছিল ।
ইয়াৰ লগতে বলীউডৰ কেইবাখনো ছবিত অভিনয় কৰি দেশবাসীৰ হৃদয়ত স্থান লাভ কৰিবলৈ সক্ষম হোৱা অভিনেতা গৰাকীয়ে চনী টিভিৰ অন্যতম জনপ্ৰিয় ৰিয়েলিটি শ্ব’ বিগ বছ ছীজন থ্ৰীতটো অংশগ্ৰহণ কৰিছিল ।
তেওঁ অভিনয় কৰা কেইখনমান উল্লেখযোগ্য হিন্দী ছবি হৈছে ‘মেইনে প্যাৰ কিয়্যা’ ,’বাজীগৰ’, ব’ম্বে টু গোৱা’ আদি । ৰাজু শ্ৰীবাস্তৱৰ প্ৰকৃত নাম আছিল সত্য প্ৰকাশ শ্ৰীবাস্তৱ । পিছত পেশাগত কাৰণতে তেওঁ ৰাজু শ্ৰীবাস্তৱ হিচাপে জনাজাত হৈছিল ।
১৯৬৩ৰ ২৫ ডিচেম্বৰ উত্তৰ প্ৰদেশৰ কাণপুৰত জন্মগ্ৰহণ কৰা ৰাজুয়ে ‘দ্যা গ্ৰেট ইণ্ডিয়ান লাফটাৰ চেলেঞ্জ‘ত দ্বিতীয় ৰানাৰ আপ খিতাপ দখল কৰিবলৈ সক্ষম হৈছিল । পিছত তেওঁ ‘ কমেডি কা মহা মুকাৱালা’ শ্ব’টো অংশগ্ৰহণ কৰিছিল ।
আজি অভিনেতাগৰাকীৰ মৃত্যুৰ খবৰ বিয়পি পৰাৰ লগে লগেই সমগ্ৰ দেশৰ লগতে বলীউডত শোকৰ ছাঁ পৰিছে । মৃত্যুৰ সময়ত তেওঁ পত্নী শিখা শ্ৰীবাস্তৱ, দুই সন্তান আয়ুষ্মান শ্ৰীবাস্তৱ আৰু অন্তৰাক এই সংসাৰত এৰি থৈ গৈছে ।
