দেউৰী জাতীয় একমাত্ৰ ৰাজনৈতিক দল জিম’চাঁয়া পিপলছ পাৰ্টি (JPP)য়ে দেওবাৰে আদিস্থান ঐতিহ্যমণ্ডিত শদিয়া বুঢ়া-বুঢ়ী শালত দেউৰী স্বায়ত্ত পৰিষদৰ নিৰ্বাচনৰ বাবে সংকল্প গ্ৰহণৰ পাছতে টঙালি বান্ধিছে পৰিষদীয় নিৰ্বাচনৰ বাবে । ইতিমধ্যে ১৮টা সমষ্টিত টিকট ঘোষণা কৰে দলটোৱে ।
ৰাজ্যৰ বিভিন্ন জিলাত আজি নিৰ্বাচনী বিষয়াৰ কাৰ্যালয়ত মনোনয়ন দাখিল কৰে জেপিপিয়ে । ধেমাজিতো ১৩ নং বৰদলনি সমষ্টিৰ জেপিপি দলৰ সমৰ্থিত(নিৰ্দলীয়) প্ৰাৰ্থী হিচাপে বিশাল সমৰ্থক আৰু মটৰ ৰেলীৰে ধেমাজি জিলা নিৰ্বাচনী বিষয়াৰ হাতত মনোনয়ন দাখিল কৰে ।
একদৰে ১১ নং শ্ৰীপানী সমষ্টিত বীণাপাণি দেউৰীয়ে বিশাল সমৰ্থকক লৈ শোভাযাত্ৰাৰে আজি মনোনয়ন দাখিল কৰে জেপিপিৰ তৰফৰ পৰা । ১২ নং গোগামুখ সমষ্টিৰ পৰাও নিৰুপ্ৰভা দেউৰীয়ে সমৰ্থক লৈ ধেমাজি নিৰ্বাচনী বিষয়াৰ ওচৰত জেপিপিৰ হৈ মনোনয়ন দাখিল কৰে ।
উল্লেখ্য, আঠ নৱেম্বৰত হ’বলগীয়া দেউৰী পৰিষদৰ নিৰ্বাচনৰ বাবে ১৯ অক্টোবৰত মনোনয়নৰ শেষ দিন । আজি মনোনয়ন পত্ৰ দাখিল কৰাৰ সময়ত জেপিপিৰ কেন্দ্ৰীয় সমিতিৰ সম্পাদক হেমৰাম দেউৰী আৰু জিলা বিষয়ববীয়াই অংশগ্ৰহণ কৰে ।
ইফালে, জেপিপি দলে মনোনয়ন দিয়াৰ বিপৰীতে শাসক দলে বাতৰি লিখা পৰলৈকে ঘোষণা কৰা নাই টিকট আৰু মিত্ৰজোঁট দলক সমষ্টি এৰি দিয়া নিদিয়াৰ সিদ্ধান্ত । এইক্ষেত্ৰত জেপিপি দলৰ উত্থানত শংকিত শাসক দল বুলি দোহাৰিলে জেপিপি নেতা হেমৰাম দেউৰীয়ে ।