Hauli Accident:
হাউলীৰ দাৱালীয়াপাৰাত আজি পুৱা এক ভয়ংকৰ পথ দুৰ্ঘটনা সংঘটিত হয় ৷ পথ দুৰ্ঘটনাত এজন ছাত্ৰ মৃত্যু হোৱাৰ লগতে এজন গুৰুতৰভাৱে আহত হয়।
জানিব পৰা মতে অইন দিনাৰ দৰে যুৱক দুজনে শৰীৰচৰ্চা কৰি দলঙত জিৰণি লৈছিল।
জিৰণি লোৱাৰ সময়তে বৰপেটাৰ পৰা হাউলীলৈ গৈ থকা অৱস্থাত এএচ ১৫ এচি ৩৫৯২ নম্বৰৰ ডাম্পাৰে ছাত্ৰ দুজনক খুন্দিয়াই ৰাজপথত বাগৰি যায়। । স্থানীয় ৰাইজে ঘটনাস্থলীত উপস্থিত হৈ যুৱক দুজনক উদ্ধাৰ কৰে, যদিও এজন যুৱক জন থিতাতে নিহত হয় আৰু আন এজন যুৱক গুৰুতৰ ভাৱে আহত হয় ।
নিহত ছাত্ৰ জন কলগাছিয়াৰ থানাৰ অন্তৰ্গত বনঘূগী গাঁৱৰ জাকিৰ হুছেইন মণ্ডলৰ পুত্ৰ আবু জাফৰ মণ্ডল (২১)আৰু গুৰুতৰভাৱে আহত ছাত্ৰ হাউলীৰ ঢাকালীয়াপাৰাৰ আফজালুৰ পুত্ৰ মীৰ শ্বাহিল আহমেদ (২২) বুলি জানিব পৰা গৈছে ।
উল্লেখ্যযোগ্য যে নিহত ছাত্ৰ আবু জাফৰ মণ্ডল শিক্ষা সূত্ৰে হাউলীৰ ঢাকালীয়াপাৰাৰ মামাৰ ঘৰত থাকি হাউলী আই টি আইত অধ্যয়নৰত অৱস্থাত আছিল ৷
আনহাতে গুৰুতৰভাৱে আহত মীৰ শ্বাহিল ভৱানীপুৰ আঞ্চলিক মহাবিদ্যালয়ৰ স্নাতক কলা শাখাৰ তৃতীয় ষান্মাসিকৰ ছাত্ৰ । পিছত ঘটনাস্থলীত হাউলী আৰক্ষী উপস্থিত হৈ মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে বৰপেটা মেডিকেল কলেজলৈ প্ৰেৰণ কৰে।
