Aap Assam Village Tour:গাঁৱৰ ঘৰে পথাৰে আম আদমি পাৰ্টী৷ সবল গাওঁ, উন্নত অসম শ্ল’গানেৰে আপৰ “গাঁৱলৈ যাত্ৰা”

Aap Assam Village Tour:

২০২৪ ৰ সাধাৰণ নিৰ্বাচনলৈ টঙালি বান্ধিছে আম আদমি পাৰ্টীয়ে ৷ সাংগঠনিক ভেটি সুদৃঢ় কৰাত উঠিপৰি লাগিছে আপে ৷ যোৱা ১৫ নৱেম্বৰৰ পৰা দলটোৱে “গাঁৱলৈ যাত্ৰা” কাৰ্যসূচী গ্ৰহণ কৰিছে ৷ আপৰ এই ব্যতিক্ৰমী কাৰ্যসূচীৰ সকলোৱে শলাগ লৈছে ৷

যাত্ৰাৰ নামত ঘাইপথে ঘাইপথে ৰেলী নকৰি গাঁৱৰ লোকসকলৰ মাজত সোমাই পৰিছে আপ৷ গাঁৱৰ অসুবিধা সমূহৰ বুজ ল’বলৈ, কৃষক ৰাইজৰ দুৰবস্থাত ক্ষন্তেক সকাহ হ’বলৈ আৰু বুঢ়ামেথাৰ আশীৰ্বাদ ল’বলৈ আপে গাঁৱে পথাৰে ঘূৰিছে ৷

সোমবাৰে ধেমাজীৰ জোনাইত আপৰ গাঁৱলৈ যাত্ৰা কাৰ্যসূচী অংশগ্ৰহণ কৰে উঃপূঃ তত্ত্বাৱধায়ক ৰাজেশ শৰ্মা, ৰাজ্যিক সভাপতি ডা° ভবেন চৌধুৰী আৰু ৰাজ্যিক সম্পাদক ভিক্টৰ গগৈয়ে ৷

প্ৰেছ বিজ্ঞপ্তিৰ জড়িয়তে ডা° ভবেন চৌধুৰীয়ে কয় যে ধেমাজীৰ বানপানী আৰু গৰাখহনীয়া সমস্যাৰ সমাধানত ব্যৰ্থ হৈছে চৰকাৰ৷ ৰাইজৰ কাতৰ আহ্বানকো কেৰেপ নকৰি বিজেপি চৰকাৰে লুণ্ঠনৰাজতহে গুৰুত্ব আৰোপ কৰিছে ৷

তেজপুৰৰ ৰঙাপৰাতো আপৰ গাঁৱলৈ যাত্ৰা কাৰ্যসূচী ৰূপায়ণ কৰা হয়৷ ৰাজ্যিক যুটীয়া সম্পাদক অম্লানজ্যোতি হাতীবৰুৱাই উদ্ঘাটন কৰা এই কাৰ্যসূচীত শোণিতপুৰ জিলাৰ বিষয়ববীয়াই অংশগ্ৰহণ কৰে ৷

ঠিক তেনেদৰেই তেজপুৰ, হোজাই, ডিব্ৰুগড়, বিশ্বনাথ, কামৰূপ গ্ৰাম্য, কাৰ্বি আংলং আৰু নগাঁৱতো ব্যাপকভাৱে আপৰ গাঁৱলৈ যাত্ৰা কাৰ্যসূচীৰ ৰূপায়ণ কৰা হয়৷ ৰাজ্যিক সমিতিৰ হৈ উপ_-সভাপতি ৰাজীৱ শইকীয়া, সাংগঠনিক সম্পাদক আলাল উদ্দিন আহমেদ, ব্ৰজেন সন্দিকৈ, মহিলা শক্তিৰ সভাপতি অনুৰুপা বড়ো আৰু আপৰ পাৰিষদ মাচুমা বেগমেও ভিন্ন কাৰ্যসূচীত অংশগ্ৰহণ কৰে ৷