Golaghat Dist. Sutia Student Union Protest:
চুতীয়া জনগোষ্ঠীক জনজাতিৰ মৰ্যদা প্ৰদান, স্বায়ত্ব শাসন প্ৰদান আৰু ঐতিহাসিক চুতীয়া ৰাজ্যৰ প্ৰাচীন কীৰ্তিচিহ্ন সমূহৰ সংৰক্ষণ, সৌন্দৰ্যবৰ্ধনৰ দাবীত গোলাঘাটত ধৰ্না কাৰ্যসূচী ৰূপায়ন কৰে সদৌ গোলাঘাট জিলা চুতীয়া ছাত্ৰ সন্থাই । প্ৰায় তিনি শতাধিক ছাত্ৰ প্ৰতিনিধিয়ে কাৰ্যসূচীত অংশগ্ৰহণ কৰি গোলাঘাট নগৰৰ মাজেৰে সমদল কৰি জিলা আয়ুক্ত কাৰ্যালয়ৰ সন্মূখত উপস্থিত হৈ বিজেপি চৰকাৰ হুছিয়াৰ, বিজেপি চৰকাৰ গ’বেক, হিমন্ত বিশ্ব শৰ্মা গ’বেক, নৰেন্দ্ৰ মোদী গ’বেক, হিমন্ত বিশ্ব শৰ্মা হুছিয়াৰ, নৰেন্দ্ৰ মোদী হুছিয়াৰ,হিমন্ত বিশ্ব শৰ্মা হায়:হায়, NO ST, NO REST, জনজাতি কৰণ আমাৰ জন্মগত অধিকাৰ, আমাক জনজাতিৰ মৰ্যদা লাগিবই, আমাক স্বায়ত্ব শাসন লাগিবই, ঐতিহাসিক চুতীয়া ৰাজ্যৰ প্ৰাচীন কীৰ্তিচিহ্ন সমূহৰ সংৰক্ষণ, সৌন্দৰ্যবৰ্ধনৰ ব্যৱস্থা কৰিবই লাগিব, আদি শ্ল’গানেৰে পৰিৱেশ উত্তাল কৰি তোলে।
কাৰ্যসূচীত অংশগ্ৰহণ কৰি সন্থাৰ কেন্দ্ৰীয় সমিতিৰ সভাপতি মহেন বৰাই চৰকাৰক তীব্ৰ সমালোচনা কৰি কয় যে চুতীয়া জনগোষ্ঠীক জনজাতিৰ মৰ্যদা প্ৰদানৰ ক্ষেত্ৰত হয় ৰঙামাটি নহয় গুৱাহাটী নীতি অৱলম্বন কৰিব সদৌ অসম চুতীয়া ছাত্ৰ সন্থাই। জনগোষ্ঠীটোক জনজাতিৰ মৰ্যদা প্ৰদান কৰিব নে নকৰে মুখ্য মন্ত্ৰীয়ে ৰাজহুৱা ভাৱে স্পষ্ট কৰিবলৈ কয় ।
জনগোষ্ঠীটোক জনজাতিৰ মৰ্যদা প্ৰদান নকৰালৈকে সন্থাই ধাৰাবাহিক গণ আন্দোলন গঢ়ি তুলিবলৈ পৰিকল্পনা যুগুত কৰাৰ কথাও উল্লেখ কৰে । চুতীয়া জনগোষ্ঠীক স্বায়ত্ব শাসন ব্যৱস্থাৰ পৰা আতৰাই ৰখা কাৰ্য অতি দুৰ্ভাগ্য জনক বুলি অভিহিত কৰে। মুখ্য মন্ত্ৰীয়ে জনগোষ্ঠীটোক দিয়া প্ৰতিশ্ৰুতি প্ৰতিশ্ৰুতি হৈয়েই ৰ’ল । স্বায়ত্ব শাসনৰ প্ৰতিশ্ৰুতি শীঘ্ৰেই কাৰ্যকৰী কৰিবলৈ দাবী তোলাৰ লগতে ঐতিহাসিক চুতীয়া ৰাজ্যৰ প্ৰাচীন কীৰ্তিচিহ্ন সমূহৰ শীঘ্ৰেই সংৰক্ষণ- সৌন্দৰ্যবৰ্ধনৰ বাবে যাৱতীয় ব্যৱস্থা গ্ৰহণ নকৰিলে ইয়াৰ ফল মুখ্য মন্ত্ৰী হিমন্ত বিশ্ব শৰ্মাই ভুগিব বুলি কয়।
কাৰ্যসূচীত সদৌ অসম চুতীয়া ছাত্ৰ সন্থাৰ উপদেষ্টা মধুমাধৱ শইকীয়া, চুতীয়া জাতি মহিলা সন্মিলন,অসমৰ কাৰ্যকৰী সভানেত্ৰী কুমকুম বৰা, চুতীয়া উন্নয়ন পৰিষদ,অসমৰ প্ৰাক্তন অধ্যক্ষ জিতেন শইকীয়া, চুতীয়া যুৱ সন্মিলন,অসমৰ গোলাঘাট জিলা সমিতিৰ সাধাৰণ সম্পাদক মৃদু জ্যোতি বৰা, চুতীয়া জাতি যুৱ সন্মিলনৰ গোলাঘাট জিলা সমিতিৰ সভাপতি ৰমেন বৰা আদি ভালেকেইজন বিশিষ্ট ব্যক্তিয়ে অংশগ্ৰহণ কৰে বুলি এক প্ৰেছ বিবৃতিৰ জৰিয়তে গোলাঘাট জিলা চুতীয়া ছাত্ৰ সন্থাৰ সভাপতি পাপু শইকীয়াই জানিবলৈ দিয়ে | আনহাতে যোৰহাট, শিৱসাগৰ, চৰাইদেউ, ডিব্ৰুগড়, তিনিচুকীয়া, ধেমাজি, লক্ষিমপুৰ, মাজুলী আৰু গহপুৰত ৰূপায়ন কৰা হয় |