ভাৰতবৰ্ষৰ কেইবাখনো জিলাত যোৱা ছয় জানুৱাৰীৰ পৰা ক্ষিপ্ৰতাৰে বৃদ্ধি হৈছে HMPV ভাইৰাছৰ ঘটনা । এইবাৰ অসমতো চিনাক্ত হৈছে প্ৰথমটো HMPV ভাইৰাছত আক্ৰান্ত হোৱাৰ ঘটনা ।জানিব পৰা অনুসৰি লখিমপুৰৰ এটি ১০ মহীয়া শিশুৰ শৰীৰত ধৰা পৰিছে HMPV পজিটিভ । সম্প্ৰতি ডিব্ৰুগড়ৰ অসম চিকিৎসা মহাবিদ্যালয়ত চিকিৎসাধীন হৈ আছে শিশুটি ।
অসম চিকিৎসা মহাবিদ্যালয়ৰ অধীক্ষক ডাঃ ধ্ৰুৱজ্যোতি ভূঞাই HMPV সম্পৰ্কত তথ্য সদৰী কৰি কয় যে, আঠ জানুৱাৰীত এটা শিশু জ্বৰ আৰু পানী লগা হোৱাৰ বাবে অসম চিকিৎসা মহাবিদ্যালয়লৈ লৈ অহা হৈছিল । নিয়মীয়া পৰীক্ষাত প্ৰথমে শিশুটিৰ দেহত HMPV ধৰা পৰে । সম্প্ৰতি শিশুটিৰ চিকিৎসা অব্যাহত আছে । বৰ্তমান শিশুটো পূৰ্বতকৈ সুস্থ হৈছে । শিশুটিৰ দেহত ভাইৰাছৰ লক্ষণসমূহ হ্ৰাস পাইছে ।
লগতে অধীক্ষক ডাঃ ধ্ৰুৱজ্যোতি ভূঞাই এই ভাইৰাছৰ বাবে অনাহকত কোনো লোকক আতংকিত নহৈ সাধাৰণ সাৱধানতাসমূহ অৱলম্বন কৰিবলৈ সকলোকে আহ্বান জনায় । শিশুটিক আছুতীয়া কক্ষত ৰখা হৈছে বুলি জানিবলৈ পৰা গৈছে ।