Election Commission of India:দেশত নতুনকৈ বৃদ্ধি পাবলৈ আৰম্ভ কৰিছে ক’ভিড আক্ৰান্তৰ সংখ্যা। ইয়াৰ মাজতে দেশৰ চাৰিখন ৰাজ্যৰ পাঁচটা বিধানসভা উপ-নিৰ্বাচন সমষ্টিত ঘোষণা কৰা হৈছে ।
অহা ১৯ জুনত এই পাঁচটা সমষ্টিত অনুষ্ঠিত হ’ব উপ-নিৰ্বাচন ।কিন্তু এতিয়া প্ৰশ্ন উত্থাপন হয় যে এজন ভোটাৰ যদি ক’ভিডত আক্ৰান্ত হয় তেন্তে কেনেকৈ ভোট দিব?
অৱশ্যে এইবাৰ নিৰ্বাচন আয়োগে ক’ভিড আক্ৰান্তসকলক ভোটদান সন্দৰ্ভত এটা ডাঙৰ ঘোষণা কৰি জনাইছে যে ,যদি কোনো ভোটাৰ ক’ভিডত আক্ৰান্ত হয় তেন্তে তেওঁৰ ঘৰলৈ গৈ তেওঁৰ বাবে পুষ্টেল বেলটৰ জৰিয়তে ভোট দিয়াৰ ব্যৱস্থা কৰা হ’ব।
অহা ১৯ জুনত কেৰালা, গুজৰাট, পশ্চিমবংগ আৰু পঞ্জাৱত অনুষ্ঠিত হ’ব উপ-নিৰ্বাচন।ইফালে দেশত ক’ভিড (Covid)আক্ৰান্তৰ সংখ্যা বৃদ্ধি পাবলৈ আৰম্ভ কৰিছে।
কেৰালাৰ পৰিস্থিতি আটাইতকৈ বেয়া। সেয়েহে সকলো ভোটাৰে যাতে ভোটদান কৰিব পাৰে তাৰ বাবে নিৰ্বাচন আয়োগে বিশেষ ব্যৱস্থাৰ কথা ঘোষণা কৰিছে।
কেন্দ্ৰীয় স্বাস্থ্য আৰু পৰিয়াল কল্যাণ মন্ত্ৰালয়ৰ তথ্য অনুসৰি বিগত ২২ মে’ত দেশত মুঠ কৰ’না আক্ৰান্তৰ সংখ্যা আছিল ২৫৭ জন।২৬ মে’ত সেই সংখ্যা ১০১০ লৈ বৃদ্ধি পালে।
তাৰ পাছত ৩১ মে’ত ৩৩৯৫ লৈ বৃদ্ধি পায়। যোৱা সপ্তাহতকৈ ১২০০ শতাংশ বেছি।চৰকাৰী পৰিসংখ্যা অনুসৰি যোৱা শুকুৰবাৰৰ পৰা শনিবাৰৰ ভিতৰত দেশত নতুনকৈ ৬৮৫জন লোক কৰ’নাত আক্ৰান্ত হৈছে। চাৰি জন লোকৰ মৃত্যু।
ইফালে, ক’ভিড Covid পৰিস্থিতিৰ যি চাৰিখন ৰাজ্যত উপ-নিৰ্বাচন অনুষ্ঠিত হৈছে সেইসকলো ৰাজ্যৰ মুখ্য নিৰ্বাচনী বিষয়ালৈ নিৰ্বাচন আয়োগে পত্ৰ প্ৰেৰণ কৰিছে। প্ৰয়োজনীয় সকলো ব্যৱস্থাৰ নিৰ্দেশ দিয়া হৈছে।
তদুপৰি যদি কোনো ব্যক্তি Covid ত আক্ৰান্ত হয় তেন্তে তেওঁলোকক ঘৰলৈ গৈ ভোটদানৰ বাবে প্ৰয়োজনীয় পদক্ষেপ ল’বলৈ কোৱা হৈছে।