Gaza:✒️ইজৰাইলে গাজা ভূখণ্ডত সকলো মানৱিক সাহায্য বন্ধ কৰাৰ বাবে লোৱা সিদ্ধান্তৰ পাছৰে পৰা যুদ্ধবিধ্বস্ত এই অঞ্চলৰ পৰিস্থিতি অধিক ভয়াৱহ হৈছে।
উল্লেখ্য যে যোৱা মাৰ্চত ইজৰাইলৰ প্ৰধানমন্ত্ৰী বেঞ্জামিন নেতানিয়াহুরে গাজালৈ সকলো ধৰণৰ সাহায্য প্ৰেৰণ বন্ধ কৰিবলৈ নির্দেশ দিছিল।
ফলত বিগত কেইসপ্তাহত গাজাত অনাহাৰত মৃত্যু হ’ল কমেও ১০১ জন লোকৰ। মৃতকৰ ৮০ জনেই হৈছে শিশু। জেনেভাভিত্তিক মানৱাধিকাৰ সংস্থা ইউৰো-মেড হিউমেন ৰাইটছ মণিটৰে অভিযোগ কৰা অনুসৰি, গাজাত ক্ষুধাক এক অস্ত্র হিচাপে ব্যৱহাৰ কৰিছে ইজৰাইলে।
গাজালৈ সাহায্য সামগ্রী প্ৰেৰণত নিষেধাজ্ঞা আৰোপ কৰি ইজৰাইলে পেলেষ্টাইনৰ এই বিতর্কিত ভূখণ্ডত বসবাস কৰা লোকসকলক অনাহাৰত মৃত্যুমুখী হ’বলৈ বাধ্য কৰাইছে বুলি মানৱাধিকাৰ সংস্থাটোৱে অভিযোগ কৰিছে।
বোমা আৰু ক্ষেপণাস্ত্ৰৰে গাজাত নৰসংহাৰ অব্যাহত ৰখা ইজৰাইলে খাদ্যৰ পৰা বঞ্চিত কৰিও যুদ্ধবিধ্বস্ত পেলেষ্টাইনী নাগৰিকক হত্যা কৰাৰ অপৰাধত লিপ্ত হৈছে বুলি মানৱাধিকাৰ সংস্থাটোৱে উদ্বেগ প্রকাশ কৰিলে। বর্তমানলৈকে গাজাত খাদ্যৰ অভাৱত সহস্রাধিক লোকৰ মৃত্যু হ’ল।