Wild Elephant Injured in Buhapahar:কলিয়াবৰৰ বুঢ়াপাহাৰত অঘটন ! কুঁৱাত পৰিল বন্যহস্তী , বন বিভাগৰ তৎপৰতাত সুকলমে উদ্ধাৰ হাতীটো

কলিয়াবৰ বুঢ়াপাহাৰত অঘটন ৷ দেওচুৰ গাঁৱৰ এটা কেচা কুঁৱাত পৰি চটফটাই আছে এটা বনৰীয়া হাতী । যোৱা নিশা কাজিৰঙা ৰাষ্ট্ৰীয় উদ্যানৰ পৰা খাদ‍্যৰ সন্ধানত ওলাই আহি দেওচুৰ গাঁৱৰ ৰাইজে পানী খাবলৈ খান্দি থোৱা এটা কেচা কুঁৱাত সোমাই যায় বন্যহস্তীটো ।

বৃহস্পতিবাৰে পুৱা খবৰ পোৱাৰ পাছতেই কাজিৰঙা ৰাষ্ট্ৰীয় উদ‍্যানৰ বুঢ়াপাহাৰ বনাঞ্চলিক বিষয়াৰ নেতৃত্বত বনবিভাগে ঘটনাস্থলীত উপস্থিত হৈ হাতীটো উদ্ধাৰৰ বাবে আৰম্ভ কৰিছে অভিযান । একেদৰে জখলাবন্ধা বন বিভাগো ঘটনাস্থলীত উপস্থিত হ’বৰ বাবে জেচিবিৰে পথ নিৰ্মাণত উঠিপৰি লাগিছে ।

আনহাতে হাতীটোৱে যথেষ্ট কষ্ট পোৱাৰ বাবে চিকিৎসাৰ প্ৰয়োজনৰ প্ৰতি লক্ষ্য ৰাখি কাজিৰঙাৰ পশু চিকিৎসকৰ বিশেষজ্ঞ দলো ইতিমধ্যে উপস্থিত হৈছেহি ঘটনাস্থলী ।

শেহতীয়া খবৰ অনুসৰি বন বিভাগৰ অহৰহ চেষ্টাৰ অন্তত হাতীটো সুকলমে উদ্ধাৰ কৰিবলৈ সক্ষম হয়।পশু চিকিৎসকৰ দলে ততালিকে হাতীটো পৰীক্ষা কৰি সুস্থ বুলি জানিবলৈ দিয়ে ৷ হাতীটো জংঘললৈ উভতি নোযোৱালৈকে বন বিভাগৰ দলেতীক্ষ্ণ নিৰীক্ষণত ৰাখিব বুলি জানিব পৰা গৈছে ৷