Fake Doctor :
জনস্বাস্থ্যৰ প্ৰতি চৰম ভাবুকি কঢ়িয়াই ভুৱা চিকিৎসকৰ কেন্দ্রবিন্দুলৈ পর্যবসিত হৈ পৰিছে অসম। ভুৱা চিকিৎসকৰ ৰমৰমীয়া বেহাৰ বিৰুদ্ধে সংশ্লিষ্ট বিভাগে সময়ে সময়ে অভিযান চলাই অর্ধশতাধিকক গ্ৰেপ্তাৰ কৰিছে যদিও এই অবৈধ ব্যৱসায় বোধ হোৱা নাই। তাৰ মাজতে পোহৰলৈ আহিছে যে স্বয়ং মুখ্যমন্ত্রী হিমন্ত বিশ্ব শৰ্মাৰ সমষ্টিৰ অধীনত দদৰাত এজন ভুৱা চিকিৎসকে নির্বিঘ্নে চলাই গৈছে এই অবৈধ বেহা। অভিযোগ অনুসৰি, দদৰাত ‘জাৰা মেডিকেয়াৰ’ নামৰ এখন ফাৰ্মাচী খুলি তাতেই চেম্বাৰ বহুৱাই দীর্ঘদিন ধৰি এজন ভুবা চিকিৎসকে চিকিৎসা সেৱাৰ নামত অবৈধ বেহা চলাইছে।
নিজকে চিকিৎসক বুলি দাবী কৰা আব্দুল চৌধুৰী নামৰ লোকজনে নিজকে মুখ্যমন্ত্ৰীৰ এজন অ’এছডিৰ ঘনিষ্ঠ বুলিও দাবী কৰি আহিছে। উল্লেখ্য যে চৌধুৰীৰ চিকিৎসাৰ পদ্ধতিৰ ক্ষেত্ৰত স্থানীয় লোকৰ সন্দেহ ওপজাত সংশ্লিষ্ট বিভাগত অভিযোগ দাখিল কৰিছিল আৰু এই সন্দৰ্ভত বাতৰিও প্রকাশিত হৈছিল। ইয়াৰ পাছতে চৌধুবীয়ে কিছুদিন বোগী চোৱা বন্ধ কৰি দিয়ে। শেহতীয়াকৈ ফার্মাচীখনত এজন চিকিৎসকৰ ফলক আঁৰি দিয়া যদিও এই চিকিৎসকজনৰ নাম লৈ চৌধুৰীয়েই চিকিৎসা সেৱা অনায়াসে চলাই গৈছে।
ইফালে, দেশৰ ভিতৰতে সৰ্বাধিক ভুৱা চিকিৎসকৰ ঘাটি অসমত স্বয়ং মুখ্যমন্ত্ৰীৰ সমষ্টিত এনে প্ৰৱঞ্চকে বিনাবাধাই ৰমৰমীয়া বেহা চলাই যাবলৈ সক্ষম হোৱা বিষয়টোরে বিশেষ তাৎপর্য বহন কৰিছে। নিজকে এমবিবিএছ চিকিৎসক বুলি দাবী কৰি চেম্বাৰ খুলি অবৈধ বেহা চলাই অহা চৌধুৰীয়ে চেম্বাৰতে গুৰুতৰ ৰোগৰো চিকিৎসা কৰাৰ নামত বৃহৎ পৰিমাণৰ ধন সৰকাই অহাৰ অভিযোগ আছে। উল্লেখ্য যে জনস্বাস্থ্যৰ প্ৰতি চৰম ভাবুকি কঢ়িয়াই নিজকে চিকিৎসক বুলি দাবী কৰি অবৈধ বেহা চলাই অহা এনে প্ৰৱঞ্চকৰ বিৰুদ্ধে ন্যায়ালয়ৰ নির্দেশত এক অভিযানকাৰী দলে ৰাজ্যৰ বিভিন্ন প্রান্তত অভিযান অব্যাহত ৰাখিছে যদিও আজিকোপতি চৌধুৰীৰ কাষ চাপিবলৈ সক্ষম হোৱা নাই।
আনহাতে, ‘অসম কাউন্সিল অৱ মেডিকেল ৰেজিস্ট্রেছন’ (এচিএমআব) নামৰ সংস্থাটোৰ অধীনত ডাঃ অভিজিৎ নেওগৰ নেতৃত্বত গঠিত তদাৰক দলটোৰ লগতে সংশ্লিষ্ট বিভাগসমূহে সামগ্রিকভাবে মুঠ ৫৭জন ভুৱা চিকিৎসকক গ্ৰেপ্তাৰ কৰিছে। কালিও শিলচৰত পংকজ চৌধুৰী আৰু সুবীৰ চৌধুৰী নামৰ আন দুজন ভুৱা চিকিৎসক অভিযানকাৰী দলৰ জালত পৰিছে। লগতে তদন্তত পোহৰলৈ আহিছে যে গুৱাহাটী মহানগৰীকে ধৰি বিশেষকৈ পিছপৰা অঞ্চলসমূহত এতিয়াও একাংশই বহিঃৰাজ্য নাইবা বিদেশৰ পৰা চিকিৎসাজনিত কোনো ডিপ্ল’মা নাইবা ডিগ্ৰীৰ প্ৰমাণপত্ৰ লে নিজকে চিকিৎসকৰূপে চিনাকি দি ৰোগীৰ জীৱনক লে হেতালি খেলি ৰমৰমীয়া অবৈধ বেহা চলাইছে;
কিন্তু বিভাগৰ একাংশ শীর্ষ বিষয়া-কর্মচাৰী, জিলাৰ সংশ্লিষ্ট বিভাগৰ একাংশ বিষয়া-কর্মচাৰীক মেনেজ কৰি এনে ৰমৰমীয়া অবৈধ বেহা চলাই গৈছে ভুৱা চিকিৎসকসকলে। ইয়াৰ জ্বলন্ত উদাহৰণ দন্দৰাৰ আব্দুল চৌধুৰী। কর্তৃপক্ষৰ জ্ঞাতসাৰেই এনেদৰে দুষ্কাৰ্য চলাই যোৱা কাৰ্যই বৰ্তমানৰ মুখ্যমন্ত্রী বিগত দুই দশকৰো অধিককাল ধৰি স্বাস্থ্য বিভাগৰ মন্ত্ৰীৰূপে দাবী কৰি অহা সাফল্যৰো নগ্ন স্বৰূপ উদঙাই দিছে।