Brahmaputra River:✒️ডিব্ৰুগড়ত ব্ৰহ্মপুত্ৰৰ ভয়াৱহ খহনীয়া ৰোধৰ বাবে পাৰ্যমানে চেষ্টা কৰাৰ প্ৰতিশ্রুতি দিছে মুখ্যমন্ত্রী ড° হিমন্ত বিশ্ব শর্মাই। ডিব্ৰুগড়ক সদায় সুৰক্ষিত কৰি ৰখাৰ আশ্বাস দি মুখ্যমন্ত্রীয়ে কালি কয়, ‘ডিব্ৰুগড়ত হোৱা খহনীয়াৰ বিষয়ে মোক কালিয়ে অৱগত কৰে। তেতিয়া মই ডিব্ৰুগড়ত নাছিলো। মই খবৰ পোৱা মাত্রকে মন্ত্রী পীযূষ হাজৰিকাক ইয়ালৈ মতাই আনিছো। আজি তেওঁ আৰু মন্ত্রী প্ৰশান্ত ফুকনে খহনীয়াগ্রস্ত অঞ্চল পৰিদৰ্শন কৰি পৰিস্থিতিৰ বুজ লয়। তেওঁক সুধিলে মই জানিব পাৰিম কি কি ব্যৱস্থা গ্রহণ কৰিছে। আমি যিমান পাৰো খহনীয়া প্ৰতিৰোধৰ বাবে চেষ্টা কৰিম।’
উল্লেখ্য যে মঙলবাৰে আবেলি ব্ৰহ্মপুত্ৰৰ এক বিধ্বংসী খহনীয়াত ডিব্ৰুগড় মহানগৰৰ এখন খেলপথাৰ, এটা যোগ কেন্দ্ৰ আদি মুহূৰ্তৰ ভিতৰতে জাহ যায়। এই খহনীয়াৰ তাণ্ডৱত ত্রস্ত হৈ স্থানীয় ৰাইজে বিনিদ্ৰ ৰজনী কটাইছে। আজি জলসম্পদ মন্ত্রী পীযুষ হাজৰিকাই খহনীয়াৰ বুজ লয়।
পৰিস্থিতি বুজ লোৱাৰ সময়ত তেওঁ সাংবাদিকক কয় যে বগীবিল দলঙৰ ওচৰত গঠন হোৱা বৃহৎ বালিচৰসমূহ হৈছে এই ভয়াৱহ খহনীয়াৰ মূল কাৰণ। খহনীয়াৰ সমস্যা সমাধানৰ বাবে বালিচৰসমূহ খন্দাব লাগিব বুলি মন্ত্রীজনে মন্তব্য কৰে।
তেওঁ লগতে কয়, ‘শীঘ্রে বালিচৰ খনন কাৰ্য সম্পাদন কৰা হ’ব। সেই খননৰ জৰিয়তে জমা হোৱা পলসুৱা মাটি দূৰ কৰা হ’ব। তেতিয়া নদীৰ মূল প্ৰৱাহ পুনৰ নিৰ্দেশিত হ’ব আৰু খহনীয়া হৈ থকা পাৰত চাপ কমিব।’
এই সম্পর্কত তেওঁ আৰু কয় যে ব্ৰহ্মপুত্ৰৰ মূল প্ৰৱাহ ডিব্ৰুগড় মহানগৰৰ পৰা বগীবিল দলঙৰ ওচৰৰ ঐথানলৈকে দক্ষিণ পাৰৰ ফালে স্থানান্তৰিত হৈছে। ফলত উত্তৰ পাৰত একাধিক স্থানত যথেষ্ট পৰিমাণৰ বালিচৰ গঠন হৈছে। মন্ত্রীজনে লগতে কয় যে দক্ষিণ পাৰৰ ওচৰৰে মূল প্ৰৱাহ বৈ যোৱাৰ বাবে বহু স্থানত উত্তৰ পাৰৰ ফালে যথেষ্ট বালিচৰ জমা হৈছে।
ফলস্বৰূপে ডিব্ৰুগড় মহানগৰৰ কে’বাটাও স্থানত ব্ৰহ্মপুত্ৰৰ তীব্ৰ খহনীয়া আৰম্ভ হৈছে। এই সমস্যা সমাধানৰ বাবে প্রয়োজনীয় ব্যৱস্থা বিভাগীয় বিশেষজ্ঞ আৰু সংশ্লিষ্ট বিষয়াসকলৰ স’তে আলোচনা কৰা হ’ব বুলিও মন্ত্রী হাজৰিকাই সদৰী কৰে।
তেওঁ জনোৱা মতে, এই খহনীয়া প্ৰতিৰোধৰ বাবে জলসম্পদ বিভাগৰ অভিযন্তাসকলে জৰুৰী প্রশমন কৌশলক আধাৰ কৰি কাম কৰি আছে। পৰিস্থিতি বুজ লোৱাৰ সময়ত জলসম্পদ মন্ত্ৰীৰ স’তে স্থানীয় বিধায়ক তথা শক্তিমন্ত্রী প্রশান্ত ফুকনো উপস্থিত আছিল।
উল্লেখ্য যে স্থানীয় লোকে অভিযোগ কৰা অনুসৰি, চৰকাৰে সময়ত গুৰুত্ব নিদিয়াৰ ফলত ডিব্ৰুগড়ত ব্ৰহ্মপুত্ৰৰ খহনীয়াই ভয়াৱহ ৰূপ লৈছে।