শিল্পী জুবিন গাৰ্গৰ মৃত্যুত বাজ্যবাসী শোকস্তব্ধ হৈ থকাৰ সময়তে ৰহস্যজনকভাবে আদানী গ্রুপে তাপবিদ্যুৎ প্ৰকল্পৰ নিবিদা লাভ কৰা বুলি মন্তব্য কৰে কৃষক মুক্তি সংগ্রাম সমিতিয়ে। এক বিবৃতিত কৃষক মুক্তিৰ সাধাৰণ সম্পাদক বিদ্যুৎ শইকীয়াই কয়, ‘এপিডিচিএলএ ৩২ হেজাৰ মেগাৱাট কয়লাৰ পৰা উৎপাদিত বিদ্যুৎ ক্ৰয় কৰিবৰ বাবে বিগত আগষ্টত নিবিদা আহ্বান কৰিছিল। যদিও ৰাইজক দেখাবলৈ পাঁচখন নিবিদা জমা দিয়া হৈছিল, এই পাঁচখন নিবিদাৰ বাকী চাৰিওখনেই আছিল আদানীৰ সহযোগী নিবিদা।
ইতিমধ্যে আদানীৰ প্ৰকল্পৰ স্বাৰ্থত বহু গাঁৱৰ ৰাইজক তেওঁলোকৰ সম্মতি অবিহনে জোৰ জুলুমকৈ পৈতৃক ভূমিব পৰা উচ্ছেদ কৰাক লৈ প্রতিবাদ চলি থকাৰ মাজতে প্ৰাণৰ শিল্পী জুবিন গাৰ্গৰ আকস্মিক মৃত্যুৰ ঘটনাই ৰাজ্যবাসীক জোঁকাৰি যোৱা সময়খিনিত সুযোগ বুজি অতি সংগোপনে এটা প্রক্রিয়া আৰম্ভ কৰি কেৱল ১২টা দিনত ৰাইজক আন্ধাৰত ৰাখি চুক্তিত ছীল-মোহৰ মাৰি দি ৰাজ্যবাসীক লুণ্ঠন চলোৱাৰ এটা নতুন পথ নিৰ্মাণ কৰি দিয়া হ’ল বুলি তেওঁ অভিযোগ কৰে।
স্বয়ং মুখ্যমন্ত্রী ড° হিমন্ত বিশ্ব শৰ্মাৰ পৃষ্ঠপোষকত এই কার্য সম্পাদন হোৱা বুলি শইকীয়াই অভিযোগ কৰি লগতে কয় যে উত্তৰ প্ৰদেশ, মহাৰাষ্ট্ৰই প্ৰতি ইউনিট বিদ্যুৎ ৫.৩৯ টকা, মধ্যপ্রদেশে প্রতি ইউনিট ৫.৮১-৫.৮৩ টকাৰ বিপৰীতে অসমে প্রতি ইউনিটত ৬.৩০ টকাত ক্ৰয় কৰিব আদানীৰ পৰা। অর্থাৎ দেশৰ ভিতৰতে সৰ্বাধিক নিৰিখত অসমে আদানীৰ পৰা প্ৰায় ২৫ বছৰলৈ বিদ্যুৎ ক্ৰয় কৰিব।
যিখন ৰাজ্যত ইতিমধ্যে স্মার্ট মিটাৰৰ শোষণকাৰী বিলে ৰাইজক ত্রাহি মধুসূধন সোঁৱৰাই আহিছে, সেইখন ৰাজ্যত এই নিৰিখে যে ৰাইজক মৰণফান্দত পেলাব সেইটো খাটাং বুলি মন্তব্য কৰি কৃষক মুক্তিৰ সাধাৰণ সম্পাদক শইকীয়াই অভিযোগ কৰি আৰু কয় যে এপিডিচিএলএ আহ্বান কৰা এই নিবিদা প্রক্রিয়াত এনটিপিচি (নেচনেল থার্মেল পাৱাৰ ক’ৰ্পৰেচন) জড়িত নথকাটো এক ৰহস্যজনক বিষয়।
তদুপৰি অসমত এপিজিচিএল নামৰ এটা কোম্পানী থকাৰ পাছতো তেওঁলোককো এই প্রক্ৰিয়াটোৰ পৰা আঁতৰাই ৰখাটোও একপ্ৰকাৰৰ সন্দেহজনক কথা। এপিজিচিএলএ মাত্র তিনিশ মেগাৱাট বিদ্যুৎ উৎপাদন ক্ষমতা লৈয়ে জীয়াই থাকিব নেকি বুলি তেওঁ প্রশ্ন কৰে। এনটিপিচি, এপিজিচিএলৰ দৰে ৰাজহুৱা প্রতিষ্ঠানক জড়িত নকৰাৰ অন্যতম কাৰণ কমিছনৰ অংক বুলি তেওঁ উল্লেখ কৰি লগতে কয় যে নিবিদা খোলাৰ পৰা এপিডিচিএলৰ ব’ৰ্ডৰ সিদ্ধান্তকে ধৰি নিয়ন্ত্রক আয়োগে ইমান কম সময়ত যি তৎপৰতাৰে আদানীৰ প্রস্তাৱত ছীল-মোহৰ মাৰিলে সেই তৎপৰতাই বহু প্ৰশ্নৰ অৱতাৰণা কৰিছে।
তিনি অক্টোবৰৰ পৰা ২০ অক্টোবৰলৈ নিবিদা খোলাৰ পৰা অনুমতিলৈকে সকলো কাম শেষ। নিয়ন্ত্রক আয়োগৰ অধ্যক্ষ সঞ্জয় কিষাণে অৱসৰৰ দুদিন পূর্বে এনে এক সিদ্ধান্ত মোহৰ মাৰি গৈছিল বুলি শইকীয়াই উল্লেখ কৰে। অসম জাতীয় পৰিষদৰ সভাপতি লুৰীণজ্যোতি গগৈয়ে ৰাজহুৱাভাৱে এই চুক্তি সমাপন কৰিবলৈ আদানীৰ লগতে এজন বিজেপিৰ সাংসদৰ (নিশিকান্ত ডুবে) ঘৰলৈ যোৱা সম্পর্কে অনা গুৰুতৰ অভিযোগ সন্দৰ্ভত সততে সৰৱ মুখ্যমন্ত্ৰীৰ মৌনতাই কি সূচায় বুলিও কৃষক মুক্তিৰ নেতাজনে প্রশ্ন কৰে।
লগতে নেতাজনে কয় যে যদি অসমৰ মুখ্যমন্ত্ৰীৰ বিৰুদ্ধে লুৰীণজ্যোতি গগৈয়ে ভিত্তিহীন অভিযোগ আনিছে, তেন্তে তেওঁ ন্যায়ৰ দ্বাৰস্থ এই মূহূৰ্তলৈ কিয় হোৱা নাই? তেওঁ লগতে কয়, ‘জুবিন গাৰ্গৰ ন্যায় বিচাৰোতেই ভিক্তৰ দাস, অজয় ফুকনৰ দৰে বহুজনক কাৰাগাৰলৈ নিক্ষেপ কৰা গৃহমন্ত্ৰী আৰু মুখ্যমন্ত্রী এই অভিযোগৰ বেলিকা মৌন কিয়? এইধৰণৰ বৃহৎ কয়লা ভিত্তিক প্ৰকল্পৰ স’তে পৰিৱেশৰ দৰে স্পৰ্শকাতৰ বিষয় জড়িত হৈ আছে।’
পৰিৱেশতন্ত্র ধ্বংস, প্ৰদূষণৰ সমস্যাৰ দৰে বিষয় জড়িত থকা বিষয়ত ৰাজহুৱা শুনানিকে ধৰি ইয়াৰ বিধিবদ্ধ প্ৰক্ৰিয়াবোৰ সম্পন্ন নকৰাটোৱে কি ইংগিত বহন কৰিছে বুলিও প্রশ্ন কৰে কৃষক মুক্তিৰ নেতাজনে। এনে এক গুৰুত্বপূর্ণ বিষয়ত প্রধান বিৰোধী দল কংগ্ৰেছৰ স্থিতি স্পষ্ট কৰাৰ আহ্বান জনাই শইকীয়াই একত্রিত প্রতিবাদৰ প্ৰয়োজনীয়তা দোহাৰে। অসমৰ সাম্প্রতিক পৰিস্থিতিয়ে বিজেপি তথা মুখ্যমন্ত্রী ড° শৰ্মাৰ জনবিৰোধী চৰিত্ৰ উলংগ ৰূপত প্ৰকাশ কৰাৰ পৰিপ্ৰেক্ষিতত সমাগত ২০২৬ৰ নিৰ্বাচনৰ ৰাজনৈতিক বৈতৰণী পাৰ কৰাৰ স্বাৰ্থত বৃহৎ অর্থ প্ৰয়োগৰ অংকৰে কমিছনৰ বিনিময়ত এই অসম বিৰোধী নিবিদা আদানীক গতাই দিয়াৰ ষড়যন্ত্ৰত লিপ্ত হৈছে বুলি অভিযোগ কৰে কৃষক মুক্তিৰ সাধাৰণ সম্পাদক শইকীয়াই।