Jungle:
সুদীর্ঘ ৩৫ দিন জংঘলত আৱদ্ধ হৈ আছিল। জীয়াই থাকিবলৈ ভক্ষণ কৰিছিল ৫০টা এন্দুৰ। সেই খাদ্য খায়েই ১৪ কেজি ওজন কমাই লাহী শৰীৰৰ অধিকাৰী হ’ল এগৰাকী যুৱতী। এই ঘটনাটো চীনৰ। কিদৰে জংঘলত ইমানদিন ধৰি বৰ্তি আছিল, সেই অভিজ্ঞতা ইতিমধ্যেই সামাজিক মাধ্যমত ভাগ কৰিছে যুৱতীয়ে।
মজাৰ কথা যে ৫০টা এন্দূৰ তেওঁ ভোক নিবাৰণৰ বাবে নহয়, বৰঞ্চ খাইছিল শৰীৰৰ ওজন কমাবৰ বাবেহে।চীনৰ সংবাদ মাধ্যম ‘ছাউথ চাইনা মর্ণিং প’ষ্ট’ৰ প্ৰতিবেদন অনুসৰি, চীনৰ নিৱাসী সেই যুৱতীৰ নাম ঝাও টিঝু। যুৱতীগৰাকীয়ে জনাইছে যে সম্প্রতি তেওঁ এক প্রতিযোগিতাত যোগদান কৰিছিল।
তাৰ বাবে তেওঁ দীর্ঘদিন জংঘলত কটাবলগীয়া হৈছিল। বিভিন্ন প্রত্যাহ্বানৰ সম্মুখীন হ’বলগীয়া হৈছিল। সাধাৰণতে জংঘলত জীয়াই থকা মানে শক্তি আৰু সহনশীলতাৰ পৰীক্ষা। যদিও সেই সময়খিনিক ঝাওরে ওজন কমোৱাৰ এক উপায়ৰূপে কামত লগোৱাৰ সিদ্ধান্ত লয়।
ঝাওৱে জনাইছে যে পূব চীনৰ ঝেজিয়াং প্রদেশৰ এটা দ্বীপত পহিলা অক্টোবৰৰ পৰা ‘ৱাইল্ডাৰনেছ ছাৰভাইভেল’ নামৰ সেই প্রতিযোগিতা আৰম্ভ হৈছিল।পাঁচ নৱেম্বৰ পৰ্যন্ত মুঠ ৩৫ দিন তেওঁ জংঘলত কটাইছিল।
জংঘলত থকাৰ সময়ত ঝাও অনেক কঠিন পৰিস্থিতিৰ সন্মুখীন হয়। ৪০ ডিগ্রী তাপমাত্রাত তেওঁৰ গাৰ ছাল কঠিন হৈ পৰে। অসংখ্য পোক-পৰুৱাৰ কামোৰ তেওঁ সহ্য কৰিবলগীয়া হৈছিল। ঝাওৱে সেইবোৰ ব্যাখ্যা কৰি কয় যে জংঘলত থকাৰ সময়তে তেওঁৰ মনলৈ ওজন কমোৱাৰ চিন্তা আহে। ওজন কমোৱাৰ বাবে জংঘলৰ ভিতৰত প্ৰ’টিন সমৃদ্ধ খাদ্যৰ প্ৰয়োজন আছিল।
সেই বাবেই তেওঁ ৩৫ দিন ধৰি কেৱল ৫০টা এন্দুৰ চিকাৰ কৰি খাইছিল। প্রতিযোগিতাত যোগ দিয়াৰ সময়ত ঝাওৰ শৰীৰৰ ওজন আছিল ৮৫ কেজি। প্রতিযোগিতাৰ শেষত তেওঁৰ ওজন ৭১ কেজিলৈ হ্রাস পায়। ঝাওৰ দাবী, ‘এন্দুৰ ডায়েট’ৰ বাবেই সেয়া সম্ভৱ হৈছে।
উল্লেখ্য যে যোৱা চাৰি নৱেম্বৰত সেই দ্বীপত ঘূর্ণী বতাহে আঘাত কৰাৰ পাছত ঝাওৱে প্রতিযোগিতা ত্যাগ কৰাৰ সিদ্ধান্ত লয়। দীর্ঘ ৩৫ দিনৰ পাছত তেওঁ জংঘলৰ পৰা ওলাই আহে। ঝাওৱে সদৰী কৰে যে তেওঁ প্রতিযোগিতাত তৃতীয় স্থান অর্জন কৰে।
পুৰস্কাৰ বাবদ তেওঁ লাভকৰে ভাৰতীয় মুদ্রাত প্রায় ৯০ হেজাৰ টকা। ঝাওৰ এই কাহিনী পোহৰলৈ অহাৰ পাছতে চীনত আলোড়ন সৃষ্টি হৈছে। ব্যাপক চর্চা হৈছে সামাজিক মাধ্যমত।