Aaranyak:মানৱ-হাতী সংঘাত প্ৰশমনত সহায়ৰ পদক্ষেপ

Aaranyak:

মানৱ-হাতী সংঘাত প্ৰভাৱিত লোকৰ সহায়ৰ অৰ্থে অগ্ৰণী জৈৱ বৈচিত্ৰ্য সংৰক্ষণ সংস্থা আৰণ্যকে এল আই চি হাউছিং ফাইনেন্স লিমিটেড (এলআইচি এইচএফএল)ৰ ক’ৰ্পৰেট সামাজিক দায়বদ্ধতা প্ৰকল্পৰ সহযোগত উদালগুৰি জিলাৰ বহুকেইখন গাঁৱত ১০টা সৌৰ ষ্ট্ৰীট লাইট স্থাপন কৰিছে । জিলাখনৰ উদালগুৰি আৰু মাজবাট ব্লকৰ অন্তৰ্গত ৰঙাপানী, কুকুৰভুকিয়া, পাহাৰপুৰ, ১ নং চিকাৰীডাঙা, ২ নং চিকাৰীডাঙা, অংৰাজুলি, জামুগুৰি, আৰু কুচুবিল গাৱত এই লাইটসমূহ স্থাপন কৰা হৈছে ।

অত্যাধিক মানৱ‌-হাতী সংঘাত প্ৰৱণ এই গাঁওসমূহলৈ নিশা সঘনাই অহা যোৱা কৰা বনৰীয়া হাতীয়ে স্থানীয় লোকসকলৰ সুৰক্ষা, জীৱিকা আৰু জীৱন প্ৰতি গুৰুতৰ ভাবুকি সৃষ্টি কৰে ।

নিশা পৰ্যাপ্ত পোহৰৰ ব্যৱস্থা নথকা গাঁৱৰ প্ৰৱেশ স্থান, সাধাৰণতে জীৱ-জন্তু আৰু মানুহ অহা যোৱা কৰা পথ, সমূহীয়া সংযোগস্থলকে ধৰি গুৰুত্বপূৰ্ণ স্থানসমূহৰ লগতে সঘনাই হাতী অহা যোৱা কৰা অঞ্চলবোৰ পোহৰাই ৰখাৰ বাবে এই সৌৰ ষ্ট্ৰীট লাইটসমূহ স্থাপনৰ কৰা হৈছে ।

পৰ্যাপ্ত পোহৰৰ ব্যৱ্স্থাই গাঁওবাসীক নিৰাপদ দূৰত্বৰ পৰাই হাতীৰ উপস্থিতিৰ বিষয়ে আগতীয়াকৈ গম পোৱা, সতৰ্কতামূলক ব্যৱস্থা গ্ৰহণ কৰা আৰু হঠাৎ হাতীৰ মুখামুখি হোৱাৰ পৰিস্থিতিৰ পৰা হাত সাৰিবলৈ সহায় কৰে । ইয়াৰ লগতে এই ব্যৱস্থাই মানৱ-হাতী সংঘাত প্ৰৱণ অঞ্চলত স্থানীয় সমূদায়ৰ সামগ্ৰিক প্ৰস্তুতি বৃদ্ধি নিশাৰ সময়ত উদ্ভৱ হোৱা ভয় আৰু অনিশ্চয়তা দূৰ কৰাতো অৰিহণা যোগায়।

সৌৰশক্তিৰ দ্বাৰা চলাৰ বাবে এই লাইটবোৰে স্থানীয় বিদ্যুৎ আন্তঃগাঁথনিত কোনো বোজা সৃষ্টি নকৰাকৈ এক বহনক্ষম আৰু পৰিৱেশ অনুকূল সমাধানৰ পথ প্ৰশস্ত কৰে। নবীকৰণযোগ্য শক্তিৰ ব্যৱহাৰৰ প্ৰসাৰৰ জৰিয়তে গ্ৰহণ কৰা ভাৰত চৰকাৰৰ জলবায়ু পৰিৱৰ্তন প্ৰশমন কৌশলৰ সৈতে সংগতি ৰাখি এই পদক্ষেপ গ্ৰহণ কৰা হৈছে ।