জীৱিকাৰ সন্ধানত বহিঃৰাজ্যলৈ গৈ প্রাণ হেৰুৱালে আৰু তিনিজনে

Goa:✒️যোৱা শনিবাৰে মাজনিশা গোৱাৰ এটা নৈশক্লাবত বিধ্বংসী অগ্নিকাণ্ডত মৃত্যুক আঁকোৱালি লোৱা অসমৰ তিনি যুৱক দৰিদ্ৰ পৰিয়ালৰ আছিল। বিজেপি নেতৃত্বাধীন চৰকাৰে লাখ লাখ যুৱক-যুৱতীক চাকৰি দিয়াৰ দাবী কৰি অহাৰ সময়তে অসমত কর্মসংস্থাপন বা জীৱিকাৰ কোনো উপায় নোপোৱাৰ বাবে দেশৰ পশ্চিম প্রান্তৰ ৰাজ্যখনলৈ গৈ যুৱক তিনিজনে কৰুণ মৃত্যুক আঁকোৱালি ল’বলগীয়া হোৱাৰ তথ্য পোহৰলৈ আহিছে।

এই তিনি যুৱকৰ দুজন ক্রমে কাছাৰৰ ৰাহুল তাঁতী (৩২) আৰু মনজিৎ মল (২৪)ৰ নশ্বৰ শৰীৰৰ ইতিমধ্যে গোৱাৰ প্রশাসনে আত্মীয়-স্বজনক হস্তান্তৰ কৰিছে। আনজন দুৰ্ভগীয়া ধেমাজিৰ দিগন্ত পাটিৰ (২৩)ব নশ্বৰ শৰীৰ চমজি ল’বলৈ কেৰালাত কৰ্মৰত তেওঁৰ এজন জ্যেষ্ঠ ভ্রাতৃ গোৱালৈ ৰাওনা হৈছে বুলি সূত্রই জনায়। উল্লেখ্য যে গোৱাৰ অবৈধ নৈশ ক্লাৱটোৰ যোৱা শনিবাৰৰ অগ্নিকাণ্ডত অসমৰ এই তিনি যুৱকসহ মুঠ ২৫ জন লোকৰ প্ৰাণহানি ঘটে। এই দুৰ্ভগীয়াসকলৰ মাজত কমেও ১৪ জন ক্লাবটোৰ কৰ্মচাৰী আছিল। তেওঁলোকৰে অন্যতম আছিল অসমৰ দুৰ্ভগীয়া যুৱককেইজন। আত্মীয়ই চমজি ল’লেও আর্থিক অসুবিধাৰ বাবে মৃতদেহ ঘৰলৈ অনাক লৈ সমস্যাৰ সম্মুখীন হৈছে।

অৱশ্যে অনতিপলমে মৃতদেহ ঘৰলৈ ঘূৰাই অনাৰ বাবে অসম আৰু গোৱা উভয় চৰকাৰে সহযোগিতাৰে কাম কৰি আছে বুলি সদৰী কৰিছে মন্ত্রী কৌশিক ৰায়ে। ৰায়ে কয় যে তেওঁ বিষয়টোৰ সন্দৰ্ভত উত্তৰ গোৱাৰ জিলা আযুক্ত অংকিত যাদৱৰ স’তে কথা পাতিছে। ইতিমধ্যে মৃতদেহৰ মৰণোত্তৰ পৰীক্ষা সম্পন্ন হৈছে আৰু মৃতদেহ ঘূৰাই পঠিওৱাৰ বাবে পৰিবহণৰ ব্যৱস্থা কৰাৰ কথা জিলা আযুক্ত যাদবে মন্ত্ৰী ৰায়ক জনাইছে। মন্ত্ৰী ৰায়ে কাছাৰৰ যুৱকদ্বয়ৰ ঘৰত উপস্থিত হৈ অসম চৰকাৰৰ ফালৰ পৰা শোকসন্তপ্ত পৰিয়ালবর্গক সমবেদনা জনাইছে। তদুপৰি তেওঁ দুৰ্ভগীয়া পৰিয়াল দুটালৈ ব্যক্তিগতভাবে বিত্তীয় সাহায্যও আগবঢ়ায়।

আনহাতে, অসমত জীৱিকাৰ কোনো পথ নোপোৱাৰ বাবে এই তিনি যুৱকে অনিশ্চয়তাক সাৱটি লৈ গোৱালৈ গৈছিল বুলি তেওঁলোকৰ পৰিয়ালৰ লোকে জনায়। দুৰ্ভগীয়া মনজিৎ মলৰ সম্পৰ্কত তেওঁৰ পৰিয়ালৰ লোকে কয় যে মনজিতেই পৰিয়ালৰ একমাত্ৰ উপাৰ্জনকাৰী আছিল। ভনীয়েকৰ বিয়াৰ যা-জোগাৰ কৰিবলৈ তেওঁ পাঁচ মাহ পূর্বে ঘৰলৈ আহিছিল বুলিও তেওঁৰ শোকসন্তপ্ত পৰিয়ালে জনায়। গোৱাত হাড়ভঙা পৰিশ্ৰম কৰি আয় কৰা ধনৰে যুৱকজনে পৰিয়ালো চলাই আছিল।

পুত্রক অকালতে হেৰুৱাই দুখত ভাগি পৰা মনজিতৰ পিতৃয়ে কয়, ‘তাৰ বাবে আমাৰ জীৱনৰ মান উন্নত হ’বলৈ ধৰিছিল। কিন্তু ভগৱান আমাৰ প্রতি নিষ্ঠুৰ হ’ল।’ একেদৰে ৰাহুল তাঁতীৰ পিতৃ বনুল তাঁতীয়ে কয়, ‘সি চিৰদিনলৈ আঁতৰি গ’ল বুলি আমি ভাবিবই পৰা নাই। পুৱতি নিশা ২-৩০ বজাত যেতিয়া ফোনকলটো পাইছিলো। তেতিয়া ভাবিছিলো যে সি আহত হৈছে। পাছত দুজন ভ্রাতৃয়ে তাৰ মৃত্যুৰ কথা নিশ্চিত কৰে।’

তাঁতীয়ে দুগৰাকী কণমানি কন্যা আৰু এটি দুমহীয়া পুত্ৰকো এৰি যায়। তেওঁৰ পত্নী সুকৃতিয়ে কয়, ‘আমি তেওঁ সোনকালে ঘৰলৈ আহিব বুলি বাট চাই আছিলো; কিন্তু তেওঁ নিথৰ হৈহে উভতি আহিল। মোৰ মূৰত পৃথিৱীখন ভাঙি পৰিছে। নাজানো, কেনেকৈ মই সন্তানকেইটা ডাঙৰ-দীঘল কৰিম। ‘আনহাতে, স্থানীয় লোকসকলে আঙুলিয়াই দিয়ে যে অসমৰ চাহ বাগিচা অঞ্চলসমূহত মানুহৰ মাজত আর্থিক-সামাজিক ব্যবধান বৃদ্ধি পোৱাটো জিলাখনৰ দুজনকৈ যুৱকৰ বহিঃৰাজ্যত কৰ্মৰত অৱস্থাত মৃত্যুৱে উন্মোচন কৰিছে।

এই সম্পর্কত গুৰুপ্ৰসাদ মালাহ নামৰ এজন স্থানীয় লোকে কয়, ‘চাহ শ্রমিকৰ মজুৰি বৃদ্ধি নোপোৱাত চাহ শ্রমিকসকলৰ সন্তানসকলে জীৱিকাৰ বাবে পিতৃ-মাতৃৰ পথ অনুকৰণ নকৰি গোৱা, বাংগালুৰুকে ধৰি দেশৰ বিভিন্ন স্থানলৈ যাবলৈ লৈছে। এইসকলে হোটেল, ৰেস্তোৰাঁ, ব্যক্তিগত নিৰাপত্তা সংস্থাত কাম কৰি জীৱিকা অৰ্জন কৰিছে।’ একেদৰে দুৰ্ভগীয়া যুৱকদ্বয়ৰ পৰিয়ালৰ লোকেও কয় যে ঘৰ চলাবলৈ পৰাকৈ আজিও চাহ শ্রমিকসকলে মজুৰি লাভ কৰা নাই। সেয়েহে স্থানীয় ৫০ শতাংশৰো অধিক যুৱকে জীৱিকাৰ সন্ধানত গোৱা, বাংগালুৰু বা দেশৰ আন কোনো মহানগৰলৈ যাত্রা কৰিবলৈ লৈছে।

এই সম্পর্কত মালাহে লগতে কয়, ‘আমাৰ ইয়াত জীৱিকাৰ কোনো সুযোগে নাই। চাহ বাগিচাসমূহে সংগ্রাম কৰি আছে আৰু ইয়াত আন কোনো বৃহৎ উদ্যোগ নাই। গতিকে যুৱকসকলে ৰাজ্যৰ বাহিৰলৈ যাবলৈ লৈছে। তেওঁলোকে গৃহৰক্ষী, ৰান্ধনি অথবা তেনে ধৰণৰ অসুৰক্ষিত কাম কৰি জীৱিকা অর্জন কৰি আছে।’

এই সমস্যা সমাধানৰ ক্ষেত্ৰত স্থানীয় জনপ্রতিনিধিৰ অনীহাকো স্থানীয় লোকে সমালোচনা কৰিছে। একেদৰে ধেমাজিৰ দুৰ্ভগীয়া যুৱকজনৰ মাতৃয়ে জনায় যে স্থানীয়ভাবে জীৱিকাৰ কোনো সুযোগ বিচাৰি নোপোৱাৰ বাবে দুয়োজন পুত্ৰই সুদূৰ কেৰালা আৰু গোৱাত কাম কৰিবলৈ যায়। এই পুত্ৰৰ অন্যতম দিগন্ত পাটিৰৰ গোৱাৰ নৈশ ক্লাবৰ অগ্নিকাণ্ডটোত মৃত্যু হয়। তেওঁৰ শোকসন্তপ্ত মাতৃয়ে লগতে কয় যে তেওঁ ঘৰত কন্যাৰ স’তে বাস কৰে। দিগন্তৰ অকাল মৃত্যুরে প্রায় প্রতি বছৰে বান আৰু খহনীয়াত আক্রান্ত হোৱা অঞ্চলৰ বাসিন্দা এই দুৰ্ভগীয়া পৰিয়ালটোৰ বাবে বিনামেঘে বজ্রপাত সদৃশ হৈছে।