Delhi:✒️বর্ধিত বায়ু প্রদূষণ, ঘন কুঁৱলী আৰু প্ৰচণ্ড শীতে দিল্লীবাসীক এইবাৰ জুৰুলা কৰিছে। দেশৰ ৰাজধানী চহৰৰ বায়ু প্ৰদূষণ প্রতিদিনে ঊর্ধ্বমুখী হ’বলৈ ধৰিছে।
এনে পৰিস্থিতিত দিল্লীৰ বিভিন্ন স্থানত থকা চিকিৎসালয়ত শ্বাস-প্রশ্বাসৰ সমস্যাত ভোগা ৰোগীৰ সংখ্যা দ্রুত বৃদ্ধি হৈছে। দিল্লীৰ অখিল ভাৰতীয় আয়ুর্বিজ্ঞান প্রতিষ্ঠান (এইমছ) ব শ্বাস-প্রশ্বাস ৰোগ বিভাগৰ সহকাৰী অধ্যাপক ডাঃ সৌৰভ মিট্রলে সদৰী কৰা অনুসৰি চিকিৎসালয়খনত বহিঃৰোগ বিভাগ (অ’পিডি) প্রতিদিনে শ্বাস-প্রশ্বাসজনিত সমস্যাত আক্রান্ত ৰোগীৰ ভিৰ বৃদ্ধি পাইছে।
ডাঃ মিট্রলে লগতে কয় যে দেওবাৰে দিল্লীৰ বায়ুমান সূচাংক (একিউআই) ৪৬১ আছিল আৰু দিনকদিনে দিল্লীৰ বায়ু প্ৰদূষণ ভয়াৱহ হ’ব ধৰিছে। চিকিৎসকজনে কয় যে বায়ু প্ৰদূষণৰ এই পৰিস্থিতি দীর্ঘ সময় বাহাল থাকিলে দিল্লীত হাপানী আৰু চিঅ’পিডিৰ দৰে শ্বাস-প্রশ্বাসজনিত ৰোগীৰ সংখ্যা অধিক বৃদ্ধিৰ শংকা আছে।
পূর্বে কোনো স্বাস্থ্যজনিত সমস্যাত আক্রান্ত নোহোৱা অসংখ্য লোকে এতিয়া প্রতিদিনে চিকিৎসালয়ৰ অ’পিডিত শ্বাস-প্রশ্বাসৰ সমস্যাৰ কাৰণত ভিৰ কৰিছে। ডাঃ মিট্রলে জনোৱা অনুসৰি বর্ধিত বায়ু প্রদূষণে সর্বাধিক ক্ষতি কৰিছে শিশু আৰু বয়স্ক লোকৰ।
চিকিৎসকজনে প্ৰদূষণৰ পৰা ৰক্ষা লাভৰ বাবে দিল্লীবাসীক অপ্রয়োজনীয়ভাৱে ঘৰৰ বাহিৰলৈ নাযাবলৈ, মাস্ক পৰিধান কৰিবলৈ, ঘৰৰ দুৱাৰ-খিৰিকী বন্ধ ৰাখিবলৈ পৰামর্শ দিছে। ক্ষুদ্র কোঠাৰ বাবে এয়াৰ পিউৰিফায়াৰ ব্যৱহাৰ কৰিবলৈকো ডাঃ মিটুলে দিল্লীবাসীক আহ্বান জনাইছে।
শ্বাসজনিত সমস্যাত আক্রান্ত হোৱাৰ লগে লগে চিকিৎসকৰ পৰামৰ্শ লোৱা জৰুৰী বুলি ডাঃ মিট্রলে মত প্রকাশ কৰিলে।