DGCA:✒️এতিয়াৰে পৰা বিমানত আৰু ব্যৱহাৰ কৰিব নোৱাৰিব পাওৱাৰ বেংক । এই সন্দৰ্ভত নিৰ্দেশিকা জাৰি কৰিছে অসামৰিক বিমান নিয়ন্ত্ৰণ সংস্থা ডিজিচিএই। মোবাইল বা অন্যান্য ডিজিটেল ডিভাইচ চাৰ্জ কৰিবলৈ যাত্ৰীসকলে বিমানে উপলব্ধ চাৰ্জিং পইণ্ট ব্যৱহাৰ কৰিব পাৰিব।
অৱশ্যে, পাওৱাৰ বেংক ব্যৱহাৰ নিষিদ্ধ হ’লেও হেণ্ডবেগত বহন কৰাৰ অনুমতি থাকিব বুলি স্পষ্ট কৰি দিছে ডিজিচিএই।
‘বিপজ্জনক সামগ্ৰী পৰামৰ্শ সার্কুলাৰ’ত ডিজিচিএই উল্লেখ কৰিছে যে পাওৱাৰ বেংক হেণ্ডবেগত ৰাখিব পাৰিব যদিও উৰণৰ সময়ত সেয়া ব্যৱহাৰ কৰিব নোৱাৰিব ।
ইয়াৰ কাৰণ হিচাপে কোৱা হৈছে যে মোবাইল, টেবলেট আদি ডিজিটেল ডিভাইচ চাৰ্জ কৰিবলৈ ব্যৱহৃত পাওৱাৰ বেংকসমূহত উচ্চ ক্ষমতাৰ লিথিয়াম বেটাৰী ব্যৱহাৰ কৰা হয়।
এই বেটাৰীসমূহ বহুত পাতল যদিও অতি সোনকালে গৰম হৈ উঠে আৰু কেতিয়াবা ফাটি গৈ অগ্নিকাণ্ডৰ দৰে ডাঙৰ দুৰ্ঘটনা ঘটাব পাৰে। সেয়ে সাৱধানতা হিচাপে এই নিৰ্দেশিকা জাৰি কৰা হৈছে।
ইয়াৰ উপৰিও, বিমান সংস্থাসমূহক অগ্নিনিৰ্বাপক ব্যৱস্থা আৰু এনে সমস্যাৰ মোকাবিলা কৰিব পৰা অধিক সুৰক্ষা ব্যৱস্থা ৰাখিবলৈ নিৰ্দেশ দিছে ডিজিচিএই। ভাৰতেই যে প্ৰথমবাৰৰ বাবে এনে নিৰ্দেশিকা জাৰি কৰিছে তেনে নহয়। ইতিমধ্যে ছিংগাপুৰ, ইউনাইটেড আৰব এমিৰেটছসহ একাধিক দেশত এই নিয়ম প্ৰচলিত আছে।
উল্লেখযোগ্য যে, বিগত বছৰৰ অক্টোবৰত দিল্লী বিমানবন্দৰত ডিমাপুৰগামী এখন ইণ্ডিগ’ বিমানত এজন যাত্ৰীৰ পাওৱাৰ বেংকত জুই লগা ঘটনা সংঘটিত হৈছিল। সৌভাগ্যক্ৰমে ঘটনাটোত কোনো হতাহত হোৱা নাছিল যদিও যাত্ৰীসকলৰ মাজত তীব্ৰ আতংকৰ সৃষ্টি হৈছিল।