Karnataka :✒️নিজৰ দপ্তৰত বহি একাধিক মহিলাৰ স’তে ঘনিষ্ঠতাৰ অভিযোগত কৰ্ণাটক চৰকাৰে সাসপেন্ড কৰিলে ডিজিপি পৰ্যায়ৰ আৰক্ষী বিষয়া ৰামচন্দ্ৰ ৰাওক।
অভিযোগ অনুসৰি, দপ্তৰৰ ভিতৰত সংঘটিত হোৱা আপত্তিকৰ মুহূর্তৰ ভিডিঅ’ সামাজিক মাধ্যমত ভাইৰেল হোৱাৰ পাছতেই বিষয়টো মুখ্যমন্ত্ৰীৰ কাৰ্যালয়ৰ দৃষ্টিত পৰে।
সূত্ৰৰ মতে, ৰামচন্দ্ৰ ৰাওৰ দপ্তৰত নিয়মিতভাৱে কেবাগৰাকীও মহিলাৰ আগমন ঘটিছিল। তেওঁলোকে ৰামচন্দ্ৰৰ স’তে দেখা কৰিব বুলি কৈ কেবিনত প্ৰৱেশ কৰিছিল।
অভিযোগ উঠিছে যে সেই কেবিনতেই মহিলাসকলৰ স’তে আপত্তিকৰ ঘনিষ্ঠতা স্থাপন কৰিছিল ৰামচন্দ্ৰ ৰাওৱে।
ভাইৰেল ভিডিঅ’ত দেখা গৈছে, কেবিনৰ ভিতৰত মহিলাসকলৰ স’তে আপত্তিকৰ অৱস্থাত আছে ৰামচন্দ্ৰ ৰাও। কেতিয়াবা আলিংগন, কেতিয়াবা চুম্বনৰ দৃশ্যও ভিডিঅ’ত দেখা যায়। অৱশ্যে এই ভিডিঅ’ৰ সত্যতা এতিয়ালৈকে চৰকাৰীভাৱে নিশ্চিত কৰা হোৱা নাই।
উল্লেখযোগ্য যে, যোৱা বছৰ সোণ সৰবৰাহৰ গোচৰত গ্ৰেপ্তাৰ হোৱা দক্ষিণী অভিনেত্ৰী ৰানিয়া ৰাওৰ পিতৃ ৰামচন্দ্ৰ ৰাও। তেওঁৰ বিৰুদ্ধে এই অভিযোগ পোহৰলৈ অহাৰ পাছতেই কৰ্ণাটকৰ মুখ্যমন্ত্ৰী সিদ্দাৰামাইয়াৰ কাৰ্যালয়ে তৎপৰতাৰে তথ্য সংগ্ৰহ আৰম্ভ কৰে।
সূত্ৰৰ মতে, মুখ্যমন্ত্ৰী সিদ্দাৰামাইয়াই নিজে ভাইৰেল ফুটেজ দেখি তীব্ৰ ক্ষোভ প্ৰকাশ কৰে। আৰক্ষী বিষয়া হিচাপে এনে আচৰণ কোনোপধ্যেই গ্ৰহণযোগ্য নহয় বুলি তেওঁ মন্তব্য কৰে। তাৰ পাছতেই মঙলবাৰে পুৱাতে চৰকাৰে ৰামচন্দ্ৰ ৰাওক তৎক্ষণাত নিলম্বিত কৰে।
যদিও সকলো অভিযোগ অস্বীকাৰ কৰিছে ৰামচন্দ্ৰ ৰাওয়ে। তেওঁৰ দাবী, ভাইৰেল ভিডিঅ’টো সম্পূৰ্ণ ভুৱা। তথাপিও চৰকাৰী বিবৃতিত স্পষ্টকৈ জনোৱা হৈছে যে এই গোচৰত পূৰ্ণ তদন্ত চলিব আৰু তদন্ত চলি থকা সময়ছোৱাত তেওঁ ৰাজ্যৰ বাহিৰলৈ যাব নোৱাৰিব।
এই ঘটনাক কেন্দ্ৰ কৰি কংগ্ৰেছ শাসিত কৰ্ণাটকত ইতিমধ্যে আৰম্ভ হৈছে ৰাজনৈতিক বিতৰ্ক।