জম্মু-কাশ্মীৰত পুনৰ তীব্ৰ হৈছে নিৰাপত্তা বাহিনীৰ অভিযান। কিশ্তৱাৰ জিলাৰ বিস্তীৰ্ণ অঞ্চলত সম্পূৰ্ণৰূপে বন্ধ কৰি দিয়া হৈছে ইণ্টাৰনেট সেৱা। চৰকাৰী সূত্ৰ অনুসৰি, শুকুৰবাৰে নিশা ১১টা ৫৯ মিনিটলৈ বলৱৎ থাকিব এই নিষেধাজ্ঞা ।
চোৰাংচোৱা সংস্থাৰ অনুমান, পাকিস্তানি সন্ত্ৰাসবাদী সংগঠন জইশ-ই-মহম্মদৰ কেবাজনো সদস্য কিশ্তৱাৰ অঞ্চলত প্ৰৱেশ কৰিছে। সেই সম্ভাৱ্য বিপদ ৰোধ কৰিবলৈ এই ব্যৱস্থা গ্ৰহণ কৰা হৈছে।
গোপন তথ্য লাভ কৰাৰ পাছত বৃহস্পতিবাৰে নিশাই ভাৰতীয় সেনা আৰু নিৰাপত্তা বাহিনীৰ যৌথ দল কিশ্তৱাৰত উপস্থিত হয়। সন্ত্ৰাসবাদীৰ সন্ধানত গাঁৱে গাঁৱে চিৰুনি তল্লাচি চলোৱা হৈছে।
সন্ত্ৰাসবাদীসকলে যাতে পৰস্পৰে যোগাযোগ স্থাপন কৰিব নোৱাৰে, সেই উদ্দেশ্যে ইণ্টাৰনেট সেৱা বন্ধ কৰাৰ সিদ্ধান্ত লোৱা হয়।
বৰ্তমান বাৰামুলাৰ সিংহপোৱা, কিশ্তৱাৰৰ ছত্রু আৰু চিঙ্গম অঞ্চলত ২জি, ৩জি, ৪জি, ৫জি— সকলো ইণ্টাৰনেট সেৱা বন্ধ আছে। আৰক্ষীয়ে জানিবলৈ দিছে, এই অঞ্চলসমূহৰ ছয় কিলোমিটাৰ ব্যাসাৰ্ধলৈকে ইণ্টাৰনেট সুবিধা নাথাকিব। নিৰাপত্তাজনিত কাৰণতেই এই কঠোৰ সিদ্ধান্ত।
চোৰাংচোৱাসকলৰ মতে, ছত্রু এলেকাৰ নইদগাম, আৰিগাম আৰু দ্বাথৰ অঞ্চলত কেবাজনো সন্ত্ৰাসবাদী লুকাই থকাৰ সম্ভাৱনা আছে। পাকিস্তানৰ পৰা সীমান্তৰে তেওঁলোকে ভাৰতত প্ৰৱেশ কৰিছে বুলি সন্দেহ। যদিও এতিয়ালৈকে কাকো গ্ৰেপ্তাৰ কৰিব পৰা হোৱা নাই।