ADRE:
অসম চৰকাৰৰ এডিআৰই পৰীক্ষাৰ জৰিয়তে শেহতীয়াকৈ সম্পন্ন কৰা বৃহৎ নিযুক্তিত সংৰক্ষিত পদত বৃহৎ অনিয়ম সংঘটিত হোৱাৰ অভিযোগ উত্থাপিত হৈছে। ইয়াৰ লগতে শিক্ষক নিযুক্তিৰ ক্ষেত্ৰতো একেই অভিযোগ উঠিছে। বিভিন্ন পক্ষই কৰা এই অভিযোগৰ ভিত্তিত চলোৱা প্রাথমিক অনুসন্ধানত সন্দেহজনক বহু তথ্য ধৰা পৰাত এডিআৰইত নিযুক্তিপ্রাপ্ত ৩৮জন প্রার্থীৰ নথিপত্ৰ পুনৰ পৰীক্ষাৰ নিৰ্দেশ জাৰি কৰা হৈছে।
চাহ জনজাতি আৰু আদিবাসীৰ বাবে সংৰক্ষিত পদতে এনে ঘটনা সংঘটিত হোৱাৰো সন্দেহ কৰা ‘হৈছে। অভিযোগ অনুসৰি নিযুক্তি প্রক্রিয়াত অনলাইন ব্যৱস্থা প্ৰৱৰ্তনৰ সুযোগ লৈ বহিঃৰাজ্যৰ বহু প্রার্থীয়ে অসমৰ চাহ জনজাতি আৰু আদিবাসী সম্প্ৰদায়ৰ বুলি জাল নথি দাখিলেৰে বিভিন্ন বিভাগত তৃতীয় আৰু চতুৰ্থ বৰ্গৰ পদত নিযুক্তি লাভ কৰিবলৈ সক্ষম হয়।
চাহ জনজাতি আৰু আদিবাসী কল্যাণ সঞ্চালকালয়ে জাৰি কৰা জাননী অনুসৰি অভিযোগ উত্থাপিত হোৱা প্ৰাৰ্থীসকল নিযুক্তিপ্রাপ্ত বিভাগসহ হ’ল আকাশ কৈৰী (কৃষি), অৰূপ চাহু (কৃষি), ভূমিকা চাহু (পশুপালন), লাল বাহাদুৰ যাদৱ (পৰিৱেশ- বন), সুনির্মল মাহাতো (বিত্ত), ৰজত কৈৰী (মীন), ভাস্কৰ কৈৰী (সাধাৰণ প্ৰশাসন), অজয় কানু (সাধাৰণ প্ৰশাসন), গুদ্দু মাহাতো (সাধাৰণ প্রশাসন), প্রসিদ্ধ দুৱৰা কৰ্মকাৰ (সাধাৰণ প্ৰশাসন), ৰিচ্চা সিং (সাধাৰণ প্রশাসন), সৌভিক কৰ্মকাৰ (সাধাৰণ প্রশাসন), শুভম কৰ্মকাৰ (সাধাৰণ প্ৰশাসন), রূপম কানু (খিলঞ্জীয়া-জনজাতি বিশ্বাস), ৰাজীৱ কমল (খিলঞ্জীয়া-জনজাতি বিশ্বাস), ৰোহন ভুলিয়া (জলসিঞ্চন), শংকৰ ভূঞা (জলসিঞ্চন), বিশাল কানু (পঞ্চায়ত-গ্রামোন্নয়ন), কমল কান্ত মাহতো (পঞ্চায়ত-গ্রামোন্নয়ন), ৰূপক ছাহা (পঞ্চায়ত-গ্রামোন্নয়ন), মনিষ কুমাৰ সিং (পঞ্চায়ত-গ্রামোন্নয়ন), সুৰজিত ৰয় (পঞ্চায়ত-গ্রামোন্নয়ন), নীতিশ কুমাৰ কৈৰী (শক্তি), প্রবীণ কুমাৰ সিং (শক্তি), সুনীল মাহাট্টো (শক্তি), বাসুদের কুশৱাহা (জনস্বাস্থ্য), ৰীমা মেষ্টন (ৰাজহ), অৰুণ মাহাতো (বিদ্যালয় শিক্ষা), মঞ্জু প্রজাপতি (বিদ্যালয় শিক্ষা), ৰঞ্জন শ্বাহ (বিদ্যাল শিক্ষা), চম্পা কৰ্মকাৰ (বিদ্যালয় শিক্ষা), পার্থপ্রতীম কৰ্মকাৰ (বিদ্যালয় শিক্ষা), প্রিয়ংকা পাটোৱাৰী (বিদ্যালয় শিক্ষা) টানু ছাহু (বিদ্যালয় শিক্ষা), সঞ্জয় চৌহান (দক্ষতা আৰু নিয়োগ), বিক্রম প্রজাপতি (পৰিবহণ), মিন্টু পাটোৱাৰী (পৰিবহণ) আৰু বিক্রম মেহতা (জলসম্পদ)।
উল্লেখ্য যে এই প্রার্থীসকলে চাহ জনজাতি আৰু আদিবাসী সম্প্ৰদায়ৰ বাবে সংৰক্ষিত পদত অন্যান্য পিছপৰা শেণী আৰু সংখ্যালঘু- অন্যান্য পিচপৰা শ্ৰেণীৰ জাল নথি ব্যৱহাৰেৰে নিযুক্তি লাভ কৰিবলৈ সক্ষম হয়। এইসকলৰ নথিপত্ৰ পৰীক্ষাৰ বাবে ৰাজ্যপালৰ নিৰ্দেশ মর্মে চাহ জনজাতি আৰু আদিবাসী কল্যাণ বিভাগে অনুসূচিত জাতি আৰু পিচপৰা শ্রেণী কল্যাণ সঞ্চালকালয়ৰ সঞ্চালকক অধ্যক্ষ হিচাপে লৈ ১০জনীয়া এখন বিশেষ সমিতি গঠন কৰি দিছে। এই সমিতিয়ে সংশ্লিষ্ট প্রার্থীসকলৰ নথিপত্ৰ পৰীক্ষা কৰিব।
ইপিনে, নিম্ন প্রাথমিক আৰু উচ্চ প্রাথমিক শিক্ষক, বিশেষ এডুকেটৰ, স্নাতক শিক্ষক আৰু স্নাতকোত্তৰ শিক্ষক পদৰ লগতে অসম আৰক্ষীৰ কনিষ্ঠবল পদতো কে’বাজনো প্রার্থীয়ে জাল নথিৰে চাহ জনজাতি- আদিবাসীৰ বাবে সংৰক্ষিত পদত নিযুক্তি লাভৰ অভিযোগ উত্থাপিত হৈছে।
আনহাতে চাহ জনজাতি আৰু আদিবাসীৰ বাবে সংৰক্ষিত আসন জালিয়াতিৰে হস্তগত কৰাৰ দৰে ঘটনা দীর্ঘদিনীয়া দাবী সত্ত্বেও বন্ধ নোহোৱাত উদ্বেগ প্রকাশ কৰিছে আদিবাসী ছাত্র সন্থা (আছা)ই। এই ক্ষেত্রত চাহ জনগোষ্ঠী জাতীয় সম্মিলনৰ ভূমিকাক লৈয়ো প্রশ্ন উত্থাপন কৰিছে আছাই উল্লেখ্য যে ২০০৪ত পৃথ্বি মাঝীৰ নেতৃত্বত চৰকাৰে চাহ জনগোষ্ঠী জাতীয় সম্মিলন গঠন কৰে। এই সম্মিলনে চাহ জনগোষ্ঠীয় প্রার্থীক প্ৰমাণপত্ৰ প্ৰদানৰ বাবে অনুমতি দিয়ে।
তেওঁলোকৰ অনুমতিৰ ভিত্তিত সংশ্লিষ্ট জিলাৰ উপায়ুক্তই প্রমাণপত্ৰ প্ৰদান কৰে। তৎসত্ত্বেও এনে ধৰণৰ অনিয়ম কেনেদৰে সংঘটিত হৈছে বুলি আছাই ক্ষোভ প্রকাশ কৰিছে। এই সম্পৰ্কত আছাৰ সাধাৰণ সম্পাদক দেৱেন উৰাঙে কয়, ‘আমাৰ দীৰ্ঘদিনীয়া দাবী সত্ত্বেও চিনাক্তকৰণৰ ক্ষেত্ৰত এনে ধৰণৰ ঘটনা কেনেদৰে সংঘটিত হৈছে? চিকিৎসা বাছনিৰ ক্ষেত্ৰতো এনে জালিয়াতি ধৰা পৰিছিল। এয়া গৰিহণাযোগ্য।’