Nagaon:
জন আশীৰ্বাদ যাত্ৰাৰ দ্বিতীয়টো দিনৰ কাৰ্যসূচী অনুসৰি দেওবাৰে সন্ধিয়া নগাঁৱত উপস্থিত হয় মুখ্যমন্ত্ৰী ড: হিমন্ত বিশ্ব শৰ্মা । হাজাৰ হাজাৰ অনুৰাগী আৰু সমৰ্থকৰ আদৰণি তথা পুষ্প বৃষ্টি লৈ জাগীৰোডৰ পৰা অগ্ৰসৰ হোৱা মুখ্যমন্ত্ৰী গৰাকীয়ে নগাঁও জিলাৰ বেবেজীয়া একশৰণ ভাগৱতী সমাজৰ পালনাম থানত সন্ধিয়া ৮.১৫ বজাত উপস্থিত হয় । ধৰ্মীয় অনুষ্ঠানটিত উপস্থিত হৈ মুখ্যমন্ত্ৰী গৰাকীয়ে একশৰণ ভাগৱতী সমাজ, অসমৰ নৱনিৰ্মিত কেন্দ্ৰীয় প্ৰশাসনিক ভৱনটো মুকলি কৰে ।
আছুতীয়া পুঁজিৰে এক কোটি টকাৰ ব্যয় সাপেক্ষে নিৰ্মাণ সম্পূৰ্ণ কৰা এই ভৱনটোৰ ২০২৪ চনৰ ২৫ ফেব্ৰুৱাৰীত মুখ্যমন্ত্ৰী গৰাকীয়ে নিজেই আধাৰশিলা স্থাপন কৰিছিল । ভৱনটো ফিটাকাটি মুকলি কৰি মুখ্যমন্ত্ৰী ড: শৰ্মাই একশৰণ ভাগৱতী সমাজৰ ভকত-বৈষ্ণৱ সকলৰ সৈতে আলোচনাত মিলিত হৈ নামঘৰত সেৱা জনাই চমু বক্তব্য প্ৰদান কৰে ।
এই অনুষ্ঠানত মুখ্যমন্ত্ৰীৰ গৰাকীক সংগ দিয়ে মন্ত্ৰী পীয়ূষ হাজৰিকা, ৰহা বিধানসভা সমষ্টিৰ বিধায়ক শশীকান্ত দাস আৰু নগাঁও-বটদ্ৰৱা সমষ্টিৰ বিধায়ক ৰূপক শৰ্মাই । একশৰণ ভাগৱতী সমাজৰ পৰা মুখ্যমন্ত্ৰী গৰাকীক আদৰণি তথা সম্বৰ্ধনা জনোৱাৰ উপৰিও ডবা,কাঁহ বজাই আশীৰ্বাদো প্ৰদান কৰা হয় ।