অসমৰ কৃষি বিভাগৰ অধীনত থকা Agricultural Technology Management Agency (ATMA)ৰ জৰিয়তে ২৩০ গৰাকী নৱনিযুক্ত প্ৰাৰ্থীক আজি আনুষ্ঠানিকভাৱে নিযুক্তি পত্ৰ প্ৰদান কৰা হয়। নিযুক্তি পত্ৰ প্ৰদান অনুষ্ঠানত উপস্থিত থাকি ৰাজ্যৰ কৃষি মন্ত্ৰী অতুল বৰা (Atul Bora)য়ে এই নিযুক্তি প্ৰদান কৰে।
এই নৱনিযুক্ত বিষয়াসকলে উপ-প্ৰকল্প সঞ্চালক, গাণনিক তথা কেৰাণী, কম্পিউটাৰ প্ৰগ্ৰেমাৰ, খণ্ড প্ৰযুক্তি প্ৰবন্ধক, প্ৰযুক্তি প্ৰবন্ধক আৰু সহকাৰী প্ৰযুক্তি প্ৰবন্ধককে ধৰি বিভিন্ন পদত যোগদান কৰিছে।
তেওঁলোকৰ যোগদানৰ ফলত প্ৰশিক্ষণ, প্ৰদৰ্শনী আদি কাৰ্যসূচীৰ জৰিয়তে আধুনিক কৃষি প্ৰযুক্তি, বৈজ্ঞানিক পদ্ধতি আৰু উন্নত কৃষি সুবিধা পোনপটীয়াকৈ কৃষকসকলৰ ওচৰলৈ লৈ যোৱাত সহায় হ’ব বুলি আশা প্ৰকাশ কৰা হৈছে।
এই উপলক্ষে মন্ত্ৰী অতুল বৰা (Atul Bora)য়ে কয় যে কৃষি অসমৰ অৰ্থনীতিৰ মেৰুদণ্ডস্বৰূপ আৰু কৃষকসকলৰ সবলীকৰণৰ বাবে ৰাজ্য চৰকাৰ দৃঢ় প্ৰতিশ্ৰুতিবদ্ধ। এই নতুন নিযুক্তিৰ জৰিয়তে অসমৰ কৃষি খণ্ডক অধিক গতিশীল, কাৰ্যক্ষম আৰু কৃষকৰ অনুকূল কৰি তোলাৰ দিশত এক গুৰুত্বপূৰ্ণ পদক্ষেপ গ্ৰহণ কৰা হৈছে।
মন্ত্ৰীগৰাকীয়ে নৱনিযুক্ত সকলো বিষয়াক অভিনন্দন জনাই তেওঁলোকে নিষ্ঠা আৰু দায়বদ্ধতাৰে অসমৰ কৃষকসকলৰ সেৱা আগবঢ়াব বুলি আশা প্ৰকাশ কৰে।
উল্লেখ্য যে কেন্দ্ৰীয় চৰকাৰৰ বিভিন্ন কৃষি আঁচনি সফলভাৱে ৰূপায়ণ কৰাৰ ক্ষেত্ৰত Agricultural Technology Management Agency (ATMA)য়ে গুৰুত্বপূর্ণ ভূমিকা পালন কৰি আহিছে। নৱনিযুক্ত বিষয়াসকলৰ যোগদানৰ ফলত এই আঁচনিসমূহৰ ৰূপায়ণ অধিক গতিশীল হ’ব বুলি আশা কৰা হৈছে।
অনুষ্ঠানত কৃষি বিভাগৰ আয়ুক্ত সচিব তথা কৃষি উৎপাদন আয়ুক্ত(Aruna Rajoria)অৰুণা ৰাজোৰিয়া, কৃষি সঞ্চালক পি. উদয় প্ৰবীণ(P. Uday Praveen), উদ্যান শস্য সঞ্চালক Nripen Das,State Agricultural Management and Extension Training Institute (SAMETI)ৰ সঞ্চালক ৰাজীৱ কুমাৰ ভূঞা (Rajiv Kumar Bhuyan )সহ কৃষি বিভাগ, SAMETI আৰু ATMAৰ বহু বিষয়াই উপস্থিত থাকে।