চলিত মধ্য প্রাচ্যৰ যুদ্ধই সর্বত্রে তুলিছে প্রচণ্ড জোঁকাৰণিৰ। ইয়াৰ সমান্তৰালভাৱে তেল- গেছৰ অধিক নাটনি সৃষ্টিৰ আশংকাই প্রচণ্ড খহনীয়াৰ সৃষ্টি কৰিছে ভাৰতৰ শ্বেয়াৰ বজাৰত আৰু অধিক শোচনীয় হৈছে ভাৰতীয় টকাৰ অৱস্থা। দেশৰ অর্থনীতিক জোঁকাৰি কালি একেদিনাই দেশৰ বজাৰত জুই জ্বলাৰ আশংকা ছেনছেক্সৰ ১,৪৪২ পইণ্টৰ পতন ঘটে। ফলত সম্প্রতি ছেনছেক্স ৭৫ হেজাৰৰ তললৈ নামিছে ।
কালি সন্ধিয়ালৈ ছেনছেক্স ৭৪,৫৯২ পইন্ট হয়। ছেনছেক্সৰ এই বৃহৎ পতনৰ ফলত ব’ম্বে শ্বেয়াৰ বজাৰৰ বিনিয়োগকাৰীসকলে কালিৰ দিনটোতে ৯.৮ লাখ কোটি টকাৰ ক্ষতিৰ সম্মুখীন হয়। শুকুৰবাৰে ব’ম্বে শ্বেয়াৰ বজাৰত বৃহৎ লোকচানৰ সম্মুখীন হোৱা প্রতিষ্ঠানসমূহত আছে লার্জেন এণ্ড টার’, টাটা স্টীল, এছবিআই, ভাৰত ইলেক্ট্র’নিকছ আৰু মাৰুতি প্রতিষ্ঠান।
অৱশ্যে এই ধুমুহাৰ মাজতে হিন্দুস্তান ইউনিলিভাৰ, ভাৰতী এয়াৰটেল আদিয়ে লাভৰ মুখ দেখে। উল্লেখ্য যে বিগত কিছুদিন ধৰি ভাৰতৰ শ্বেয়াৰ বজাৰত খহনীয়া অব্যাহত আছে। আনকি যোৱা এসপ্তাহতে শ্বেয়াৰ বজাৰৰ পৰা ১৯ লাখ কোটি টকা উধাও হয়। এই ধাৰা অব্যাহত থকাত আজি ব’ম্বে শ্বেয়াৰ বজাৰৰ বজাৰ মূল্য মানৰ পৰিমাণ ৪৩০ লাখ কোটি টকালৈ হ্রাস পায়।
কেৱল ব’ম্বে শ্বেয়াৰ বজাৰতে নহয়, নতুন দিল্লীস্থিত ৰাষ্ট্ৰীয় শ্বেয়াৰ বজাৰতো সূচকাংক অৱনমন অব্যাহত আছে। আজিৰ দিনটোতে ৰাষ্ট্ৰীয় ষ্টক এক্সচেঞ্জৰ সূচকাংকৰ ৪৬৮ পইণ্টৰ অৱনমন ঘটি ২৩,১৭০ পইন্টলৈ হ্রাস পায়। শ্বেয়াৰ বজাৰৰ এই খহনীয়াৰ বাবে বিশেষজ্ঞসকলে মধ্য প্রাচ্যৰ যুদ্ধ আৰু এই যুদ্ধই তেল গেছৰ নাটনি বৃদ্ধি কৰাৰ আশংকাকো দায়ী কৰিছে।
শ্বেয়াৰ বজাৰৰ এই বিপৰ্যয়ৰ মাজতে মার্কিন ডলাৰৰ বিপৰীতে ভাৰতীয় মুদ্রাৰো মূল্য হ্রাস অব্যাহত আছে। কালি সন্ধিয়া এক ডলাৰৰ দাম ভাৰতীয় মুদ্রাত ৯২.৪৭ টকা হয়। আজি একেদিনাই টকাৰ মূল্য ১৪ পইচা হ্রাস পায়। টকাৰ মূল্যৰ এনে ঐতিহাসিক পতনে দেশত বয়-বস্তুৰ মূল্য আকাশলংঘী কৰি তোলাৰ আশংকা প্রবল হৈছে। বিশেষকৈ শাক-পাচলি, মাহজাতীয় শস্য আদিৰ মূল্য বৃদ্ধিৰ আশংকা প্রবল হৈছে। লক্ষ্যণীয়ভাৱে বহুতৰ মনত উদয় হোৱা এনে আশংকা অমূলক নহয় বুলি একপ্ৰকাৰ প্ৰমাণ হৈছে কেন্দ্ৰীয় চৰকাৰৰ তথ্যত। কালি প্রকাশ পোৱা কেন্দ্ৰীয় চৰকাৰৰ এক তথ্যত কোৱা হৈছে যে সম্প্রতি দেশত উপভোক্তা মূল্য সূচকাংক অর্থাৎ খুচুৰা মুদ্রাস্ফীতি যোৱা ফেব্ৰুৱাৰীত ৩.২১ শতাংশলৈ বৃদ্ধি পায়। ইয়াৰ পূর্বে যোৱা জানুৱাৰীত দেশত খুচুৰা মুদ্রাস্ফীতিৰ পৰিমাণ ২.৭৪ শতাংশ আছিল।
অর্থাৎ ক্রমে অত্যাৱশ্যকীয় সামগ্রীৰ মূল্য বৃদ্ধি পাবলৈ ধৰাটো প্রতিপন্ন হৈছে। আনহাতে, এনে উদ্বেগজনক পৰিস্থিতিতে কালি পুনৰ আন্তর্জাতিক বজাৰত খাৰুৱা তেলৰ মূল্য প্রতি বেৰেলত এশ ডলাবলৈ বৃদ্ধি পায়। খাৰুৱা তেলৰ মূল্যবৃদ্ধিয়েও মুদ্রাস্ফীতি অধিক বৃদ্ধি কৰাৰ আশংকা প্রৱল কৰিছে। অর্থাৎ সাতে সোত্তৰই মিলি সা-সামগ্ৰীৰ মূল্য অধিক বৃদ্ধি পোৱাৰ আশংকা প্রকট কৰিছে। তদুপৰি টকাৰ মূল্যও অধিক শোচনীয় কৰাৰ আশংকাৰো সৃষ্টি হৈছে।
অর্থাৎ আগন্তুক সময়ত দেশৰ বজাৰত জুই জুলাৰ ইংগিত স্পষ্ট হৈছে। স্বাভাৱিকতে টকাৰ মূল্য হ্রাস আৰু খাৰুৱা তেলৰ মূল্যবৃদ্ধিয়ে আমদানিজাত সামগ্ৰীৰ মূল্য অধিক কৰাটো একপ্ৰকাৰ নিশ্চিত হৈছে। হঠাতে কেউফালৰ পৰা সমস্যাই এনেদৰে জুমুৰি দি ধৰাত কেন্দ্ৰীয় চৰকাৰ শ’লঠেকত পৰাৰ সম্ভাৱনা আছে।অর্থনীতিবিদসকলৰ মতে টকাৰ মূল্য পতনৰ অন্যতম মূল কাৰণ হৈছে শেহতীয়াভাৱে মার্কিন ডলাৰ অধিক শক্তিশালী হৈছে।