প্রকৃতিয়ে চমক পছন্দ কৰে, বিস্ময় পছন্দ কৰে। সেই বিস্ময়ৰ ভিতৰত অন্যতম নিদর্শন হ’ল পৰিভ্ৰমী পক্ষী। প্রবল ঠাণ্ডাৰ প্রকোপৰ পৰা ৰক্ষা পাবলৈ পৰিভ্ৰমী চৰাইবোৰে অপেক্ষাকৃত কম ঠাণ্ডা অঞ্চললৈ উৰি যায়। আকৌ কিছুমান পক্ষীয়ে গৰমৰ দিনত ঠাণ্ডা ঠাইলৈ উৰি যায়।
প্রতি বছৰে পৃথিৱীৰ নানা প্রান্তৰ পৰা পৰিভ্ৰমী চৰাইবোৰে হেজাৰ হেজাৰ কিলোমিটাৰ দূৰত্ব অতিক্রম কৰি নতুন আবাসস্থলত উপস্থিত হয়। সম্প্রতি এনে এক বিস্ময়কৰ ঘটনাৰ সাক্ষী হৈছে বিশ্ব।
বাৰ-টেইলড গডউইট নামৰ এবিধ পক্ষীয়ে সম্প্রতি অবিশ্বাস্য কীর্তি অর্জন কৰিছে। বাৰ-টেইলড় গডউইট প্রজাতিৰ এটি মাত্র চাৰি মহীয়া পক্ষীয়ে একেৰাহে ১৩.৫৬০ কিলোমিটাৰ উৰি বিশ্ব অভিলেখ গঢ়িছে।
কম বয়সীয়া এই চৰাইটোৱে আলাস্কাৰ পৰা উৰি একেবাৰে অস্ট্রেলিয়াৰ তাছমানিয়াত উপস্থিত হৈছে। এই সম্পূর্ণ যাত্রাত সময় লাগিছে ১১ দিন। ইয়াৰ মাজতে ক’তো এক ছেকেণ্ডৰ বাবেও থমকি বোৱা নাছিল। আনকি এটুপি পানীও মুখত দিয়া নাছিল।
এই যাত্রায়েই ইতিহাস গঢ়িছে ‘বি-ছিক্স’ নামেৰেও পৰিচিত এই চৰাইটোৱে। একেৰাহে ১১ দিন ক’তো থমকি নোৰোৱাকৈ ইয়াৰ পূর্বে কোনো প্রাণীয়েই উৰা নাছিল। এই যাত্রা পৃথিবীৰ ইতিহাসত যিকোনো প্রাণীৰ দীর্ঘ নিববচ্ছিন্নভাবে আকাশত উবা হিচাপে নথিভুক্ত হৈছে।
এই অসাধাৰণ যাত্রাপথটো পর্যবেক্ষণ কৰা হৈছিল এটা ছেটেলাইট টেগৰ সহায়ত। টেগটো যুক্ত আছিল আমেৰিকাৰ ইউএছ জিঅ’লজিকেল ছার্ভেৰ গবেষণা প্ৰকল্পৰ স’তে।
বাৰ-টেইলড় গডউইট হৈছে এবিধ ডাঙৰ আকাৰৰ উপকূলীয় পক্ষী। ইহঁতে প্রধানকৈ সাগৰৰ উপকূল অঞ্চলত বাস কৰে। এই প্রজাতি পৃথিবীৰ সবাতোকৈ দীর্ঘ থমকি নোৰোৱাকৈ উৰাৰ বাবে বিখ্যাত।
এইবিধ পক্ষীয়ে সচৰাচৰ আলাস্কা আৰু ছাইবেৰিয়াৰ আৰ্কটিক অঞ্চলত প্রজনন কৰে। তাৰ পাছত শীতকালত সিহঁত দক্ষিণ গোলার্ধলৈ শুচি যায়। সাধাৰণতে সিহঁত নিউ জিলেণ্ড আৰু অস্ট্রেলিয়ালৈ যায়। আলাস্কাৰ পৰা নিউ জিলেণ্ডৰ দূৰত্ব প্রায় ১১ হেজাৰ কিলোমিটাৰ।
সাধাৰণ এই যাত্রা সম্পূর্ণ কৰিবলৈ চৰাইবোৰক ন দিনৰ প্রয়োজন হয়। সেই কেইদিন উৰি যোৱাৰ সময়ত এইবিধ চৰায়ে ক’তো নয়, একো নাখায় আৰু বিশ্রামো নলয়। প্রশান্ত মহাসাগৰৰ ওপৰেদি সিহঁতে কেৱল উৰিহে যায়।
গবেষণাত দেখা গৈছে যে এই পক্ষীবোৰে ঘণ্টাত প্রায় ৫৫ কিলোমিটাৰ বা তাতকৈ বেছি গতিৰে উৰিব পাৰে। সেইবাবেই বাৰ-টেইলড্ গডউইটক পৃথিৱীৰ সবাতোকৈ শক্তিশালী আৰু গতিশীল পৰিভ্ৰমী পক্ষীকূলৰ অন্যতম বুলি কোৱা হয়। দীর্ঘ পথ একেৰাহে উৰি যোৱাৰ বাবে চৰাইৰ শৰীৰত নানা জৈৱিক পৰিবৰ্তন ঘটে। সেয়ে যাত্ৰাৰ পূর্বে ইহঁতে প্ৰচুৰ খাদ্য গ্রহণ কৰে।
ফলত শৰীৰত প্ৰচুৰ পৰিমাণে চর্বি জমা হয়। সেই চর্বিয়েই ইহঁতৰ প্রধান শক্তিৰ উৎস। উল্লেখ্য যে বাৰ-টেইলড় গডউইট পক্ষীয়ে সততে সর্বাধিক ন দিনলৈ একেৰাহে উৰিব পাৰে। অথচ চাৰিমহীয়া পোৱালি চৰাইটোৱে একেৰাহে ১১ দিন উৰি বিশ্ব অভিলেখ গঢ়িছে।