Share Market:✒️ভূ-ৰাজনৈতিক উত্তেজনাৰ তীব্ৰ প্ৰভাৱ পৰিল ভাৰতৰ শেয়াৰ বজাৰত। বিশ্ববজাৰত অশোধিত তেলৰ দাম ১১০ ডলাৰ পাৰ হোৱাৰ লগে লগে দেশীয় ইকুইটি বজাৰত ব্যাপক বিক্ৰী আৰম্ভ হয়, ফলস্বৰূপে সূচকসমূহে তীব্ৰ পতন দেখুৱায়।
বজাৰৰ সূচক অনুসাৰে, BSE Sensex প্ৰায় ১,৫০০ৰো অধিক পইণ্ট তললৈ নামি যায়, আনহাতে Nifty 50 প্ৰায় ৪৮৮ পইণ্ট পতন ঘটে। বজাৰ খোলাৰ কিছু সময়ৰ ভিতৰতে Sensex প্ৰায় ১,৭০০ পইণ্ট আৰু Nifty ৫০০ পইণ্টৰ ওচৰত তললৈ নামি যায়।
বিশেষজ্ঞসকলৰ মতে, এই পতনৰ মূল কাৰণ হৈছে মধ্যপ্ৰাচ্যত বৃদ্ধি পোৱা সংঘাত, যাৰ ফলত বিশ্বজুৰি তেল যোগান লৈ অনিশ্চয়তা বৃদ্ধি পাইছে। ইয়াৰ প্ৰভাৱত Brent crude oilৰ দাম ১১০ ডলাৰৰ ওপৰত উঠি যায়, যিয়ে ভাৰতৰ দৰে তেল আমদানিকাৰী দেশৰ বাবে ডাঙৰ উদ্বেগৰ বিষয়।
ইয়াৰ লগতে মার্কেটত “risk-off sentiment” বৃদ্ধি পোৱাৰ ফলত বিদেশী বিনিয়োগকাৰীয়ে ভাৰতীয় বজাৰৰ পৰা টকা উলিয়াই নিয়া আৰম্ভ কৰিছে। একে সময়তে আমেৰিকাৰ ফেডাৰেল ৰিজাৰ্ভ(US Federal Reserve)ৰ সুদৰ হাৰ স্থিৰ ৰখাৰ সিদ্ধান্তই বিশ্ববজাৰত ডলাৰৰ শক্তি বৃদ্ধি কৰি উদীয়মান বজাৰসমূহৰ ওপৰত চাপ বৃদ্ধি কৰিছে।
বজাৰৰ সকলো মুখ্য খণ্ড—বেংকিং, অটো, ৰিয়েল্টি, ফাইনেন্স—সমূহ লাল সংকেতত খোলা দেখা যায়। অস্থিৰতা সূচক (VIX) ১৬%ৰো অধিক বৃদ্ধি পাইছে, যিয়ে আগন্তুক দিনত বজাৰত অধিক অস্থিৰতাৰ ইংগিত দিয়ে।
বজাৰ বিশ্লেষকসকলৰ মতে,তেলৰ মূল্য বৃদ্ধি মানেই মুদ্ৰাস্ফীতিৰ চাপ বৃদ্ধি,টকাৰ মান হ্ৰাসৰ সম্ভাৱনা,আৰু কোম্পানীৰ লাভত প্ৰভাৱ।
এই সকলো কাৰণেই বিনিয়োগকাৰীৰ মাজত আতংক বৃদ্ধি পাইছে আৰু তাৰ ফলত বজাৰত তীব্ৰ বিক্ৰী দেখা গৈছে।
তথাপিও বিশেষজ্ঞসকলে কৈছে, এই ধৰণৰ পতন দীৰ্ঘম্যাদী বিনিয়োগকাৰীৰ বাবে এক সুযোগ হ’ব পাৰে, যদিও স্বল্পম্যাদীত বজাৰত অস্থিৰতা অব্যাহত থকাৰ সম্ভাৱনা অধিক।