All Party meeting in New Delhi:
দৈনিক অগ্ৰদূত ডিজিটেল ডেক্স:–পশ্চিম এছিয়া (ইৰাণ) সংকটৰ সন্দৰ্ভত আজি কেন্দ্ৰীয় চৰকাৰে এখন গুৰুত্বপূৰ্ণ সৰ্বদলীয় বৈঠক আহ্বান কৰিছে। এই বৈঠকত শক্তি সুৰক্ষা, খাৰুৱা তেলৰ যোগান, উপসাগৰীয় দেশসমূহত ভাৰতীয়ৰ সুৰক্ষা, আৰু অৰ্থনৈতিক প্ৰভাৱৰ বিষয়ে আলোচনা কৰা হ’ব।
একেদৰে বৈঠকত সাম্প্ৰতিক পৰিস্থিতিৰ বিষয়ে অৱগত কৰা আৰু এই আন্তঃৰাষ্ট্ৰীয় সংকটৰ সন্দৰ্ভত ৰাষ্ট্ৰীয় ঐকমত্য গঢ়ি তোলা। বুধবাৰে সন্ধিয়া ৫ বজাত দেশৰ ৰাজধানীৰ সংসদ ভৱন কমপ্লেক্সত অনুষ্ঠিত হ’ব এই বৈঠক।
প্ৰতিৰক্ষা মন্ত্ৰী ৰাজনাথ সিঙে এই বৈঠকৰ অধ্যক্ষতা কৰাৰ সম্ভাৱনা আছে। বৈদেশিক পৰিক্ৰমা মন্ত্ৰী এছ জয়শংকৰ, গৃহমন্ত্ৰী অমিত শ্বাহ, সংসদীয় পৰিক্ৰমা মন্ত্ৰী কিৰেন ৰিজিজুকে ধৰি আন জ্যেষ্ঠ মন্ত্ৰীসকলো উপস্থিত থাকিব। সকলো ডাঙৰ ৰাজনৈতিক দলৰ পৰা প্ৰতিনিধি সদনৰ নেতাক আমন্ত্ৰণ জনোৱা হৈছে। কিন্তু লোকসভাত বিৰোধী দলৰ নেতা ৰাহুল গান্ধীয়ে হয়তো এই বৈঠকত উপস্থিত নথকাৰ সম্ভাৱনা ব্যক্ত কৰিছে কংগ্ৰেছ শীৰ্ষ সূত্ৰই ৷
উল্লেখ্য যে ৰাহুল গান্ধীয়ে কেৰালাম ভ্ৰমণৰ কথা আছিল যদিও মঙলবাৰে নিশা মাতৃ ছোনিয়া গান্ধী হঠাৎ অসুস্থ হৈ পৰাত ৰাহুল গান্ধীয়ে ভ্ৰমণ বাতিল কৰি মাতৃৰ কাষত আছে ৷
উল্লেখ্য যে সৰ্বদলীয় সভাত আলোচ্য হ’বলগীয়া মূল বিষয় সমূহ হ’ল মুলত:মধ্য প্ৰাচ্য যুদ্ধই ভাৰতৰ অৰ্থনীতি আৰু নিৰাপত্তাৰ প্ৰতি অভূতপূৰ্ব প্ৰত্যাহ্বানৰ সৃষ্টি কৰিছে। খাৰুৱা তেল, প্ৰাকৃতিক গেছ (এল পি জি), আৰু কৃষি সাৰৰ যোগান শৃংখল বজাই ৰখাটো অতি গুৰুত্বপূৰ্ণ, কিয়নো ভাৰতে নিজৰ শক্তিৰ প্ৰয়োজনীয়তাৰ এক উল্লেখযোগ্য অংশ এই যুদ্ধবিধ্বস্ত অঞ্চলৰ পৰা আমদানি কৰে। উপসাগৰীয় দেশসমূহত প্ৰায় এক কোটি ভাৰতীয়ই কাম কৰে। তাত বাস কৰা নাগৰিকসকলৰ সুৰক্ষা আৰু খালী কৰাৰ পৰিকল্পনাৰ বিষয়ে আলোচনা হ’ব পাৰে। হৰমুজ জলদ্বীপত বাণিজ্যিক জাহাজ চলোৱাত ব্যাঘাত জন্মাৰ বাবে আন্তঃৰাষ্ট্ৰীয় বাণিজ্যৰ ওপৰত প্ৰভাৱ কমোৱাৰ ব্যৱস্থাৰ বিষয়েও আলোচনা হ’ব পাৰে।
মনকৰিবলগীয়া যে, মঙলবাৰে পশ্চিম এছিয়াৰ পৰিস্থিতি সন্দৰ্ভত প্ৰধানমন্ত্ৰী নৰেন্দ্ৰ মোদীয়ে সংসদত দিয়া বক্তব্যৰ পিছতে বিৰোধীয়ে এই বিষয়ত সৰ্বদলীয় বৈঠকৰ দাবী জনাইছিল। কংগ্ৰেছৰ লগতে আন কেইবাটাও বিৰোধী দলে পশ্চিম এছিয়াৰ যুদ্ধ আৰু ভাৰতত ইয়াৰ প্ৰভাৱ সন্দৰ্ভত চৰকাৰক অহৰহ প্ৰশ্ন উত্থাপন কৰি আহিছে।
আনহাতে কেন্দ্ৰীয় চৰকাৰে আহ্বান কৰা সৰ্বদলীয় বৈঠক সন্দৰ্ভত বিৰোধী দলসমূহে কঠোৰ স্থিতি গ্ৰহণ কৰিছে। কংগ্ৰেছ আৰু ভাৰতীয় কমিউনিষ্ট পাৰ্টিৰ নেতাসকলে প্ৰধানমন্ত্ৰী নৰেন্দ্ৰ মোডীক ব্যক্তিগতভাৱে এই গুৰুত্বপূৰ্ণ আলোচনাত অংশগ্ৰহণ কৰিবলৈ দাবী জনাইছে। কংগ্ৰেছৰ সাংসদ অমৰিন্দৰ সিং ৰাজা ৱাৰিঙে চৰকাৰৰ উদ্দেশ্যক লৈ প্ৰশ্ন উত্থাপন কৰি কয় যে যদিহে কেৱল আনুষ্ঠানিকতাৰ স্বাৰ্থত এই বৈঠক আহ্বান কৰা হৈছিল তেন্তে স্থগিত ৰখাটো ভাল আছিল। ৱাৰিঙে তীক্ষ্ণভাৱে কয় যে যদি চৰকাৰে এই বিষয়টোৰ প্ৰতি গুৰুত্ব আৰোপ কৰে তেন্তে প্ৰধানমন্ত্ৰীয়ে ব্যক্তিগতভাৱে বৈঠকত অংশ গ্ৰহণ কৰিব লাগে। তেওঁৰ অবিহনে এনে বৈঠকৰ কোনো ন্যায্যতা নাথাকে । তেওঁ অভিযোগ কৰে যে দেশৰ বাবে সকলো গুৰুত্বপূৰ্ণ সিদ্ধান্ত কেৱল “দুজন বন্ধু”— অমিত শ্বাহ আৰু পি এম মোডীয়েহে লৈছিল।
ইফালে চিপিআইৰ সাধাৰণ সম্পাদক ডি ৰাজাইও প্ৰধানমন্ত্ৰীক সৰ্বদলীয় বৈঠক আহ্বান কৰি সকলো পক্ষৰ মতামত বিচাৰিবলৈ দাবী জনায়। প্ৰাক্তন প্ৰধানমন্ত্ৰী অটল বিহাৰী বাজপেয়ীৰ উদাহৰণ দি তেওঁ কয়- বাজপেয়ীয়ে প্ৰতিটো ৰাষ্ট্ৰীয় সংকটৰ সময়ত সৰ্বদলীয় বৈঠক আহ্বান কৰিছিল। ইৰাক সংকটেই হওক বা আন কোনো ডাঙৰ বিষয়েই হওক, ৰাজনৈতিক দলৰ সৈতে আলোচনাত তেওঁ বিশ্বাস কৰিছিল। আলোচনাৰ বাবে সাজু নেকি প্ৰধানমন্ত্ৰী মোডী ?