RBI:✒️বিমুদ্ৰাকৰণৰ পাছৰে পৰা দেশত ডিজিটেল লেনদেনে এক বিপ্লৱৰ সৃষ্টি কৰিলে। ক’ভিড-১৯ মহামাৰীৰ সময়ত ডিজিটেল লেনদেনে অধিক জনপ্রিয়তা অৰ্জন কৰিছিল। বর্তমানে নগদতকৈ দেশত ইউপিআই লেনদেন বৃদ্ধি পাইছে। কিন্তু ইউপিআই লেনদেনৰ ক্ষেত্ৰত এক বৃহৎ পৰিৱৰ্তন আনিব বিচাৰিছে ভাৰতীয় ৰিজার্ভ বেংক (আৰবিআই)-এ।
দৰাচলতে ডিজিটেল প্রবঞ্চনা প্রতিৰোধ কৰিবলৈ কেন্দ্ৰীয় বেংকে চিন্তা-চর্চা কৰিছে। এই বিষয়ত আৰবিআয়ে সদৰী কৰা অনুসৰি অনলাইন জালিয়াতি প্রতিৰোধ কৰিবলৈ ‘বান আৱাৰ ৱেইট’ নীতি প্ৰৱৰ্তনৰ চিন্তা-চৰ্চা কৰা হৈছে।
এই নীতি কার্যকৰী হ’লে অনলাইনত ‘একাউন্ট টু একাউন্ট’ত ১০ হেজাৰ টকাৰ অধিক বিত্তীয় লেনদেনৰ ক্ষেত্ৰত এঘণ্টা অপেক্ষা কৰিব লাগিব।
যি ব্যক্তিয়ে ধন প্ৰেৰণ কৰিব তেওঁৰ একাউণ্টৰ পৰা টকা ডেবিট হ’লেও এঘণ্টা পর্যন্ত সেই ধন বেংকে হ’ল্ড কৰিব ৰাখিব। এই সময়ছোৱাত গ্ৰাহকৰ একাউণ্টত ধন নোসোমাব।
যদি ধন প্ৰেৰণৰ পাছত লগে লগে উক্ত ব্যক্তিয়ে জানিব পাৰে যে তেওঁ কোনো চাইবাৰ প্রবঞ্চকৰ জালত পৰিল, তেতিয়া এঘণ্টাৰ ভিতৰত উক্ত লেনদেন তেওঁ বাতিল কৰাৰ সুযোগ পাব। এই নতুন পদ্ধতি অৱশ্যে কেৱল ব্যক্তিৰ পৰা ব্যক্তি লেনদেনৰ ক্ষেত্ৰতহে কাৰ্যকৰী কৰা হ’ব পাৰে। কোনো দোকানত কিউ আৰ ক’ড স্কেন কৰি লেনদেনৰ ক্ষেত্রত প্রযোজ্য নহ’ব।