Gujarat :গুজৰাটৰ চুৰাটত দিন -দুপৰতে লোমহৰ্ষক ডকাইতি কাণ্ড

Gujarat :

দৈনিক অগ্ৰদূত ডিজিটেল ডেক্স:-গুজৰাটৰ চুৰাটত দিন -দুপৰতে চাঞ্চল্যকৰ ডকাইতি কাণ্ড। চুৰাটৰ বাৰাছা অঞ্চলত এছ বি আইৰ এটা শাখাত দিন- দুপৰতে এটা অস্ত্ৰধাৰী ডকাইতে প্ৰৱেশ কৰি কৰ্মচাৰী-গ্রাহকক ৰিভলভাৰ দেখুৱাই লুটি নিয়ে প্ৰায় ৫০ লাখ টকা ৷ ডকাইতৰ দলটো আছিল পাঁচৰ পৰা ছয়জনীয়া ৷ ডকাইতিৰ পিছতে কে’বা খনো স্প’ৰ্টছ বাইকেৰে পলায়ন কৰে দুৰ্বৃত্ত কেইজন ।

আনহাতে লোমহৰ্ষক ডকাইতি কাণ্ডৰ পিছতে ঘটনাস্থলীত আৰক্ষী উপস্থিত হৈ চিচিটিভিৰ ফুটেজৰ সংগ্ৰহ কৰাৰ লগতে অভিযুক্তক সন্ধানত আৰম্ভ কৰে অভিযান ৷

আৰক্ষীৰ মতে, দুপৰীয়া ১:১১ বজাত বেংকত প্ৰৱেশ কৰি দুপৰীয়া ২:০৬ বজাত বেংক পৰা পলায়ন কৰে ডকাইতৰ দলটোৱে। কেছ ভ্যানৰ পৰা নগদ ধন আৰু কাউণ্টাৰৰ পৰা প্ৰায় ৫০ লাখ টকা লুটি লৈ যায়। লগতে ডকাইতৰ দলটোৱে কৰ্মচাৰীসকলৰ ম’বাইল ফোনো লৈ যায় যাৰ ফলত তেওঁলোকে সময়মতে আৰক্ষীক খবৰ দিব পৰা নাছিল ।

উল্লেখ্য যে চিচিটিভিৰ ফুটেজত স্পষ্টকৈ দেখা গৈছে ডকাইতৰ মুখ। তেওঁলোকক চিনাক্ত কৰাৰ চেষ্টা চলাইছে আৰক্ষীয়ে। ইফালে কেছ ভ্যানৰ কৰ্মচাৰী শিৱপূজন সিঙে ডকাইতিৰ বিষয়ে অজ্ঞাত বুলি উল্লেখ কৰে। বাহিৰত গাড়ীত বহি আছিল আৰু ভিতৰত কি হৈছে তাৰ কোনো ধাৰণা নাছিল। তেওঁ কয় যে তেওঁ কাকো দৌৰা দেখা নাপালে আৰু কোনো ছাইৰেন শুনা নাই।