ৰেল বিভাগত নিযুক্তিৰ নামত লাখ লাখ টকা সংগ্ৰহ

নগাঁও :ভাৰতীয় ৰেল বিভাগৰ বিভিন্ন পদত নিযুক্তি দিয়াৰ নামত নিবনুৱা যুৱক-যুৱতীৰ পৰা ধন সংগ্ৰহ কৰা এজন প্ৰৱঞ্চকক কালি নগাঁও আৰক্ষীয়ে নগাঁও চহৰৰ পৰা গ্ৰেপ্তাৰ কৰে।ধৃত প্ৰৱঞ্চক জনৰ নাম হিৰেণ কাকতি।তেওঁৰ ঘৰ নগাঁও জিলাৰ নিজ ডিমৌত। আৰক্ষী সূত্ৰই প্ৰকাশ কৰা মতে, নিজ ডিমৌৰ হিৰেণ কাকতি নামৰ লোকজনে আন এজন সহযোগীৰ সহযোগত চহৰ খনৰ একাংশ নিবনুৱা যুৱক যুৱতীৰ পৰা বহু লাখ টকা সংগ্ৰহ কৰিছিল।এই ধন ৰেল বিভাগত নিযুক্তিৰ নামত সংগ্ৰহ কৰা হৈছিল।পিছত প্ৰৱঞ্চক জনে ধন আদায় দিয়া নিবনুৱা সকলৰ মাজত ৰেল বিভাগৰ কেতবোৰ ভুৱা নিযুক্তি পত্ৰ বিতৰণ কৰে।কিন্তু নিযুক্তি পত্ৰ লৈ এঁও লোকে ৰেল বিভাগৰ গুৱাহাটীৰ কাৰ্যালয়ত যোগদানৰ বাবে যাঁওতে সকলো ৰহস্য ফাদিল হয়।প্ৰৱঞ্চিত যুৱক সকলৰ হৈ চিন্তামণি কোঁৱৰে এই সন্দৰ্ভত নগাঁও সদৰ আৰক্ষী থানাত এখন এজাহাৰ দাখিল কৰে।এই এজাহাৰৰ ভিৰ্তিতেই নগাঁও আৰক্ষীয়ে নগাঁও সদৰ থানাত ভাৰতীয় দণ্ড বিধিৰ ৪০৬/৪২০/৪৬৮ ধাৰাৰ অধীনত ৪৫১/২০১৯ নম্বৰত এক গোচৰ পঞ্জীয়ন কৰি তদন্ত আৰম্ভ কৰে আৰু কালি নিশা প্ৰৱঞ্চক জনক গ্ৰেপ্তাৰ কৰে।আৰক্ষীয়ে আজি তেওঁক আদালতত হাজিৰ কৰাই দুদিনৰ বাবে নিজৰ জিম্মাত লৈ জেৰা অব্যাহত ৰাখিছে।