বিশ্বজুৰি ইন্ধন সংকটৰ আশংকাৰ মাজতে এক ডাঙৰ আশাৰ খবৰ কঢ়িয়াই আনিছে ৰাষ্ট্ৰায়ত্ত সংস্থা ভাৰত পেট্ৰোলিয়াম কৰ্পোৰেচন লিমিটেড (BPCL)।
পূব আফ্ৰিকাৰ দেশ মোজাম্বিকত ভাৰতৰ অতি গুৰুত্বপূর্ণ এলএনজি (তৰলীকৃত প্ৰাকৃতিক গেছ) প্ৰকল্পৰ কাম পুনৰ পূৰ্ণ গতিত আৰম্ভ হৈছে। আন্তঃৰাষ্ট্ৰীয় বজাৰত ভূ-ৰাজনৈতিক অস্থিৰতা তীব্ৰ হৈ থকাৰ সময়তে ভাৰতৰ ইন্ধন সুৰক্ষা নিশ্চিত কৰাৰ ক্ষেত্ৰত এই প্ৰকল্পক বিশেষ গুৰুত্বপূর্ণ বুলি বিবেচনা কৰিছে বিশেষজ্ঞসকলে।
বিপিচিএল সূত্রে জানিব পৰা মতে, মোজাম্বিকৰ অফশ্ব’ৰ এৰিয়া-১ প্ৰকল্পত সংস্থাটোৰ অধীনস্থ ভাৰত পেট্ৰোলিয়াম কৰ্পোৰেচন লিমিটেড -ৰ ১০ শতাংশ অংশীদাৰী আছে। কেৱল বিপিচিএলেই নহয়, অ’এনজিচি বিদেশ লিমিটেড আৰু অইল ইণ্ডিয়া লিমিটেডও এই কনছৰ্টিয়ামৰ অন্যতম অংশীদাৰ।
মূলতঃ ফৰাচী শক্তি সংস্থা ‘টোটাল এনার্জিজ’ৰ তত্ত্বাৱধানত চলি থকা এই প্ৰকল্পটো নিৰাপত্তাজনিত কাৰণত কিছু সময়ৰ বাবে স্থগিত হৈ আছিল। কিন্তু যোৱা বছৰৰ নৱেম্বৰত কাম পুনৰ আৰম্ভ হোৱাৰ পিছৰে পৰা প্ৰকল্পক্ষেত্ৰত তৎপৰতা বৃদ্ধি পাইছে।
বৰ্তমান প্ৰায় ছয় হেজাৰ কৰ্মীয়ে দিন ৰাতি একাকাৰ কৰি কাম কৰি আছে। সংস্থাৰ তথ্য অনুসৰি, ইতিমধ্যে প্ৰকল্পটোৰ প্ৰায় ৪২ শতাংশ কাম সম্পূৰ্ণ হৈছে।
কিয় এই প্ৰকল্প ইমান গুৰুত্বপূর্ণ?
বিশ শতিকাত বিশ্ব ৰাজনীতিত ইন্ধন তেলৰ আধিপত্য দেখা গৈছিল যদিও একবিংশ শতিকাক “গেছৰ যুগ” বুলি ধৰা হৈছে। ভাৰত ক্ৰমাৎ গেছভিত্তিক অৰ্থনীতিৰ দিশে আগবাঢ়িছে। ২০৪০ চনৰ ভিতৰত ‘নেট জিৰো’ লক্ষ্য পূৰণৰ ক্ষেত্ৰত এলএনজিৰ ভূমিকা অত্যন্ত গুৰুত্বপূর্ণ বুলি ধৰা হৈছে। প্ৰায় ২০ বিলিয়ন মাৰ্কিন ডলাৰৰ বিনিয়োগেৰে গঢ়ি উঠা এই প্ৰকল্প সম্পূৰ্ণ হ’লে বিশ্ববজাৰত প্ৰাকৃতিক গেছৰ যোগান বৃদ্ধি পাব আৰু ভাৰতৰ আমদানি ব্যৱস্থাও অধিক সুদৃঢ় হ’ব।
বৰ্তমানৰ অস্থিৰ আন্তঃৰাষ্ট্ৰীয় বজাৰত মধ্যপ্ৰাচ্যৰ দেশসমূহৰ ওপৰত অত্যাধিক নিৰ্ভৰতা হ্ৰাস কৰি বিকল্প ইন্ধন উৎস গঢ়ি তোলাই এতিয়া নতুন দিল্লীৰ অন্যতম প্ৰধান কৌশল।
বিপিচিএলৰ ডাইৰেক্টৰ (ফাইনেন্স) ভি আৰ কে গুপ্তই জানিবলৈ দিয়া মতে, বিদেশত এই ধৰণৰ অংশীদাৰী ভাৰতৰ দীৰ্ঘম্যাদী ইন্ধন কৌশলৰ অংশ। ইয়াৰ ফলত দেশৰ ইন্ধন সুৰক্ষা অধিক শক্তিশালী হ’ব।
বৰ্তমান বিপিচিএলৰ মুম্বাই, কোচি আৰু বিনাত বৃহৎ তেল শোধন ক্ষমতা আছে। ইয়াৰ উপৰিও দেশজুৰি সংস্থাটোৰ বিস্তৃত ডিষ্ট্ৰিবিউশ্যন নেটৱৰ্ক গঢ়ি উঠিছে।
মোজাম্বিকৰ এই প্ৰকল্প কেৱল বাণিজ্যিক লাভৰ মাজতেই সীমাবদ্ধ নহয়; বৈশ্বিক শক্তি বজাৰত ভাৰতৰ প্ৰভাৱ বৃদ্ধি কৰাতো ই গুৰুত্বপূর্ণ ভূমিকা পালন কৰিব বুলি মনে কৰা হৈছে। সকলো মিলাই, আগন্তুক দিনত ভাৰতৰ প্ৰতিটো ঘৰলৈ অধিক সুলভ মূল্যত আৰু নিৰবচ্ছিন্নভাৱে গেছ যোগান নিশ্চিত কৰাৰ ক্ষেত্ৰত মোজাম্বিক এলএনজি প্ৰকল্প এক নতুন মাইলফলক হিচাপে পৰিগণিত হ’ব।
