এ আই ইউ ডি এফৰ বিধায়কৰ পিতৃ মুফতিৰ ঘৰত অগপ প্ৰাৰ্থী আশীৰ্বাদ গ্ৰহণক লৈ তুমুল চৰ্চা

নিশাৰ ভিতৰত সলনি হৈছে ৰাজনৈতিক দৃশ্যপট । এই পৰিপ্ৰেক্ষিতত যোৱা নিশা বিজেপি সমৰ্থিত-অগপৰ প্ৰাৰ্থী মনিমাধৱ মহন্তই এ আই ইউ ডি এফৰ বিধায়ক আমিনুল ইছলামৰ পিতৃ মুফতি খাইৰুল ইছলামৰ বাসগৃহত উপস্থিত হৈ আশীষ গ্ৰহণ কৰা বিষয়টোৱে বিশেষ চৰ্চা লাভ কৰিছে । চৰ্চা অনুসৰি মিত্ৰজোঁটৰ প্ৰাৰ্থী মহন্তই সংখ্যালঘূ ভোট আদায় কৰাৰ বাবে বিশেষভাৱে তৎপৰ হৈছে । সংখ্যালঘূ লোকক আকৰ্ষণ কৰিবলৈ তেওঁ চলোৱা চেষ্টাৰ অংশ হিচাপে কালি বিধায়ক ইছলামৰ পিতৃ তথা ধৰ্মীয় গুৰুজনাৰ ‘দোৱা’ বিচাৰি যোৱা নিশা আলিটাঙনীৰ ধিং গাঁৱৰ বাসভৱনত উপস্থিত হয় । অৱশ্যে এই যাত্ৰা আছিল অতি গোপন। নিশা প্ৰায় 9•30 বজাত তেওঁ বিধায়কজনৰ অসুস্হ পিতৃ সাক্ষাৎ কৰি ‘দোৱা’ গ্ৰহণ কৰাৰ লগতে মত বিনিময় কৰে। মুফতি ইছলামেও মূৰত হাত ফুৰাই আশীৰ্বাদ দিয়ে মহন্তক। দুয়োৰে মাজত কি মত বিনিময় হ’ল সেয়া এতিয়াও গোপন হৈ আছে । যিয়ে নহওক এই সাক্ষাতৰ আঁৰত ৰাজনৈতিক অংক আছে বুলি চৰ্চিত হৈছে ।