১০ৰ পৰা ২৪ এপ্ৰিললৈ এন আৰ চিৰ শুনানি বন্ধ থাকিব

ৰাজ্যত সম্প্ৰতি অব্যাহত থকা ৰাষ্ট্ৰীয় নাগৰিকপঞ্জী (এন আৰ চি)ৰ দাবী আৰু আপত্তিৰ শুনানি অহা ১০ৰ পৰা ২৪ এপ্ৰিললৈ বন্ধ থাকিব । এন আৰ চি ৰাজ্যিক সমন্বয়ক প্ৰতীক হাজেলাই আজি সকলো জিলাৰ উপায়ুক্তলৈ এই নিৰ্দেশনা প্ৰেৰণ কৰে। নিৰ্ব্বাচনৰ পৰিপ্ৰেক্ষিতত এন আৰ চি কৰ্তৃপক্ষই এই সিদ্ধান্ত গ্ৰহণ কৰিছে । নিৰ্দেশটোত উল্লেখ কৰা অনুসৰি শুনানি অনুষ্ঠিত নহ’লেও এন আৰ চিৰ লগত জড়িত বিষয়া কৰ্মচাৰীসকলে উক্ত সময়ছোৱাত শুনানি সম্পৰ্কীয় অন্যান্য কাম-কাজ আগবঢ়াব লাগিব । ইপিনে, এই দিনকেইটাতে শুনানিৰ সময়ত যিসকল লোকৰ বায়’মেট্ৰিক এনৰোলমেণ্ট সংগ্ৰহ কৰিব পৰা নগ’ল তেওঁলোকৰ পৰা সেয়া সংগ্ৰহ কৰিব পাৰিব বুলি নিৰ্দেশটোত উল্লেখ কৰা হৈছে । উল্লেখ্য যে দাবী আৰু আপত্তি শুনানিৰ সময়ত বায়’মেট্ৰিক এনৰোলমেণ্ট সংগ্ৰহ কৰিবলৈ উচ্চতম ন্যায়ালয়ে নিৰ্দেশ দিছিল । কিন্তু এন আৰ চি কৰ্তৃপক্ষই এই ক্ষেত্ৰত প্ৰথম অৱস্হাত বিফল হয় । যাৰ বাবে প্ৰথমতে শুনানিলৈ অহা বহু লোকৰ এনে তথ্য সংগ্ৰহ নহ’ল। সেয়েহে তেনে লোকসকলৰ উক্ত তথ্য শুনানি বন্ধ থাকিবলগীয়া দিনকেইটাত সংগ্ৰহৰ নিৰ্দেশ দিয়া হৈছে ।