তলাবন্ধৰ ফলত অসমৰ বহুলোক দেশৰ বিভিন্ন প্ৰান্তত আৱদ্ধ হৈ আছে ৷ কিন্তু সেইসকল লোক তলাবন্ধ খোলাৰ পিছত নিজৰ গৃহ ৰাজ্যলৈ আহিব নোৱাৰিব ৷ সেয়েহে আন্তৰ্জাতিক পাৰপত্ৰ সদৃশ এক ব্যৱস্থা শীঘ্ৰে ৰাজ্য চৰকাৰে প্ৰৱৰ্তন কৰিব বুলি এক সংবাদমেলত সদৰি কৰে মন্ত্ৰী ড° হিমন্ত বিশ্ব শৰ্মাই ৷ আনহাতে অসমত ক’ভিড ১৯ ৰ সংক্ৰমণৰ ক্ষেত্ৰত নিজামুদ্দিনৰ তবলাগি জামাতৰ লগত সম্পৰ্ক নথকা মণিষ তিব্ৰেৱাল নামৰ লোকজন কিদৰে আক্ৰান্ত হ’ল সেয়া উদ্বেগৰ বিষয় বুলি মন্তব্য কৰে ড° শৰ্মাই ৷ ইয়াৰ বিপৰীতে অহা ন এপ্ৰিল ৰাজ্যখনৰ কাৰণে উল্লেখযোগ্য দিন বুলি তেওঁ মন্তব্য কৰে ৷ কাৰণ সেইদিনা আছুতীয়াকৈ ৰখা ৭৫,৯৮১ জন লোকক একেলগে মুকলি কৰি দিয়া হ’ব ৷
বহিঃৰাজ্যত আবদ্ধ লোকৰ ক্ষেত্ৰত মন্ত্ৰীজনে কয় যে তলাবন্ধ যিদিনাই খুলি দিয়া হ’ব তাৰ পিছদিনাই যদি সকলো লোক একেলগে অসমলৈ উভতি আহে তেনেহ’লে তেওঁলোকক আছুতীয়াকৈ ৰখাটো সম্ভৱ নহ’ব পাৰে । তেনেকুৱা হ’লে জটিল পৰিস্থিতিৰ সৃষ্টি হ’ব ৷ সেয়েহে সংক্ৰমণ প্ৰতিৰোধ আৰু নিৰীক্ষণৰ ব্যৱস্থা নিয়ন্ত্ৰণত ৰখাৰ বাবে চৰকাৰে আন্তঃৰাজ্যিক পাৰপত্ৰ সদৃশ ব্যৱস্থা ল’ব লাগিব । লগতে মন্ত্ৰীগৰাকীয়ে কয় যে আমি এটা ৱেবছাইট মুকলি কৰিম ৷ তাত বাহিৰত আৱদ্ধ লোকসকলে নাম পঞ্জীয়ন কৰিব পাৰিব ৷ তাৰ ভিত্তিতহে ভাগ ভাগকৈ মানুহক অহাৰ অনুমতি দিয়া হ’ব ৷ এই ক্ষেত্ৰত আমি ৰাইজৰ পৰামৰ্শ বিচাৰিছো ৷
