*ওদালগুৰিত মুখ্যমন্ত্ৰী সৰ্বানন্দ সোনোৱাল
কৰ’না সংক্ৰমণ ৰোধৰ স্বাৰ্থত ওদালগুৰি জিলা প্ৰশাসনৰ তৎপৰতা তথা জিলা স্বাস্থ্য বিভাগ কেনেদৰে সাজু হৈছে সেই সন্দৰ্ভত বুজ লবলৈ আজি মুখ্যমন্ত্ৰী সৰ্বানন্দ সোনোৱাল উপস্থিত হয় ওদালগুৰিত। দিনৰ প্ৰায় ২:৩০ বজাত পোনে পোনে ওদালগুৰি সোনাইগাও খাউৰাংস্থিত কোৱাৰেনটাইন কক্ষ পৰিদৰ্শন কৰে। ইয়াৰ পাছত তেেওঁ ওদালগুৰি জিলা উপায়ুক্ত কাৰ্যালয়ৰ সভাকক্ষত জিলা প্ৰশাসনৰ লগতে জিলা স্বাস্থ্য বিভাগ আৰু বিটিচি প্ৰশাসণৰ সৈতে গুৰুত্বপূৰ্ণ বৈঠকত মিলিত হয়। জিলা উপায়ুক্ত কাৰ্যালয় চৌহদত সাংবাদিকক তেওঁ কয় যে “বৰ্তমান দেশৰ প্ৰধানমন্ত্ৰী নৰেন্দ্ৰ মোডীৰ আহ্বানমৰ্মে সমগ্ৰ দেশৰ লগতে ৰাজ্যৱাসীয়ে তলাবন্ধ নিষ্ঠাৰে পালন কৰিছে।’
মুখ্যমন্ত্ৰীয়ে কয় যে দ্বিতীয় পৰ্যায়ৰ তলাবন্ধ কাৰ্যসূচী অহা ৩ মে’লৈ যাতে অসমৰ প্ৰতিখন জিলাতে শৃংখলাবদ্ধভাৱে পালন কৰা হয় তাৰ প্ৰতি দৃষ্টি ৰাখি অসম চৰকাৰৰ তৰফৰ পৰা সকলো প্ৰকাৰৰ ব্যৱস্থা হাতত লোৱা হৈছে। স্বাস্থ্য বিভাগ, যোগান বিভাগ, শক্তি বিভাগ, জনস্বাস্থ্য কাৰিকৰী বিভাগ, অগ্নি নিৰ্বাপক বাহিনী, অসম আৰক্ষী, কৃষি বিভাগ ইত্যাদি সকলো বিভাগে মিলিত প্ৰচেষ্টাৰে এই জটিল সময়ছোৱাত যাতে জনসাধাৰণৰ কোনো অসুবিধা নহয়, তাৰ প্ৰতি লক্ষ্য ৰাখি সকলো ধৰণৰ ব্যৱস্থা গ্ৰহণ কৰিছে।
‘আমাৰ এটাই লক্ষ্য যাতে দেশৰ প্ৰধানমন্ত্ৰীৰ আহ্বান মানি যিসকল লোকে নিজকে বাসগৃহত সামাজিক দূৰত্ব মানি আৱদ্ধ হৈ আছে তেওঁলোকক যাতে উন্নত মানৰ সেৱা আগবঢ়াব পাৰো। সেইবাবে সকলোধৰণৰ বাস্তৱসন্মত পদক্ষেপ গ্ৰহণ কৰা হৈছে।এই গোটেই প্ৰক্ৰিয়াটোৰ মাজত কোনোৱা ঠাইত যদি কোনো ব্যক্তিয়ে আমাক জনাই যে তেওঁ চৰকাৰী সাহাৰ্য পোৱা নাই, লগে লগে সেই জিলাবোৰলৈ নিৰ্দেশনা প্ৰেৰণ কৰি ৰাইজৰ মাজত সেইখিনি সুবিধা প্ৰদান কৰা হৈছে।’
সোনোৱালে কয়,’ কৃষকসকলে এই সময়চোৱাত কৃষি কাৰ্য চলাই নিব পাৰে তথা চাহ বাগিচাবোৰত সামাজিক দুৰত্ব বৰ্তাই ৰাখি যাতে বাগিচা সমূহ চলি থাকিব পাৰে, চাহ বাগিছৰ শ্ৰমিকসকলে যাতে পাত তোলাৰ পৰা আদি কৰি সকলো কামত আত্ম নিয়োগ কৰিব পাৰে তাৰ বাবে ব্যৱস্থা হাতত লৈছো। ‘
আজিৰ এই অনুষ্ঠানৰ মাজতে অসম ৰাজ্যিক গ্ৰাম্য জীৱিকা অভিযানৰ ওদালগুৰি জিলা সমিতিৰ তৰফৰ পৰা ৰাজ্যৰ আৰোগ্য নিধিলৈ এখন ৩,৬৩,০০০ টকাৰ এখন চেক মুখ্যমন্ত্ৰীৰ হাতত প্ৰদান কৰা হয়। অনুষ্ঠানৰ মাজতে জিলাখনৰ চাহ বাগিছাত কৰ্মৰত শ্ৰমিকৰ বাবে মাক্স বিতৰণৰ শুভাৰম্ভ কৰা হয়। আজি মুখ্যমন্ত্ৰীৰ এই ভ্ৰমণকালত উপস্থিত থাকে মন্ত্ৰী ৰিহণ দৈমাৰী, বিটিচিৰ প্ৰধান সচিৱ ৰবিনচন মোছাহাৰী, সচিৱ ভাস্কৰজ্যোতি মান্তা, বিধায়িকা কমলী বসুমতাৰী, জিলাউপায়ুক্ত প্ৰকাশ ৰঞ্জন ঘৰফলীয়া, জিলা আৰক্ষী অধীক্ষক ৰিপুল দাসৰ লগতে বহু বিষয়-বৱীয়া।