Covid India latest Update:
আকৌ এবাৰ দ্রুতগতিত দেশত বৃদ্ধি পাইছে কৰ’নাৰ সংক্ৰমণ। কেন্দ্রীয় স্বাস্থ্য মন্ত্রণালয়ৰ তথ্য অনুসৰি, দেশত মুঠ কৰ’না আক্ৰান্তৰ সংখ্যা ৪৮৬৬ জনলৈ বৃদ্ধি পালে। যোৱা ৩১ মে’ত দেশত আক্ৰান্তৰ সংখ্যা আছিল ৩৯৬১ জন। দেশৰ ভিতৰতে সর্বাধিক ১৪৭৭ জন লোক কৰ’নাত আক্রান্ত হৈছে কেৰালাত। আক্ৰান্তৰ সংখ্যাৰে দ্বিতীয় স্থানত থকা দিল্লীত সংক্রমিতৰ সংখ্যা ৫৬২ জন।
আনহাতে, সংক্ৰমণৰ তালিকাত তৃতীয় স্থানত আছে পশ্চিমবংগ আৰু এই ৰাজ্যত আক্ৰান্তৰ সংখ্যা হৈছে ৫৩৮ জন। যোৱা ২৪ ঘণ্টাত পশ্চিমবংগত নতুনকৈ ১০৬ জন ক’ভিড আক্রান্তক চিনাক্ত কৰা হ’ল। বর্তমানে মহাৰাষ্ট্ৰত ৫২৬, কর্ণাটকত ৪৩৬, তামিলনাডুত ২১৩ আৰু উত্তৰ প্ৰদেশত ১৯৮ জন কৰ’না ৰোগী আছে। কেন্দ্ৰৰ তথ্য অনুসৰি যোৱা ২৪ ঘণ্টাত দেশত নতুনকৈ সাতজন কৰ’না ৰোগীৰ মৃত্যু হ’ল।
# দিল্লীত কৰ’নাত পাঁচমহীয়া শিশু, এজন বৃদ্ধৰ মৃত্যু
দিল্লীত ক’ভিড-১৯ৰ সংক্ৰমণত যোৱা ২৪ ঘণ্টাত এটি পাঁচমহীয়া শিশুসহ দুজন লোকৰ মৃত্যু হ’ল। দিল্লীৰ স্বাস্থ্য বিভাগে এই তথ্য সদৰী কৰি জনোৱা অনুসৰি, বৰ্তমানে দেশৰ ৰাজধানী চহৰৰ ৫৬২ জন কৰ’না ৰোগী সক্রিয় হৈ আছে। চলিত বর্ষত এক জানুৱাৰীৰ পৰা বৰ্তমানলৈকে দিল্লীত কৰ’নাত সাতজন লোকৰ মৃত্যু হ’ল। কালি দিল্লীত ১০৫ জন কৰ’না ৰোগীক চিনাক্ত কৰা হৈছিল। পাঁচমহীয়া শিশু এটিৰ শৰীৰত ক’ভিডৰ সংক্ৰমণ চিনাক্ত হোৱাৰ পাছতে শিশুটিৰ মৃত্যু হয়। উক্ত শিশুটি নিম’নিয়া পীড়িত আছিল। ইফালে, যোৱা ২৪ ঘণ্টাত দিল্লীত এজন ৮৭বছৰ বয়সীয়া কৰ’না ৰোগীৰ মৃত্যু হ’ল। উক্ত ব্যক্তিজন মধুমেহ, উচ্চ ৰক্তচাপ, হৃদৰোগ আৰু বৃক্ক ৰোগতো আক্রান্ত আছিল।