কৰ’না ভাইৰাছক লৈ অব্যাহত আছে আমেৰিকা আৰু চীনৰ বাকযুদ্ধ । আৰম্ভণিৰ পৰাই কৰ’না ভাইৰাছৰ উৎপত্তি আৰু বিশ্বজুৰি সংক্ৰমণৰ ভয়াৱহ পৰিণতিৰ বাবে মাৰ্কিন ৰাষ্ট্ৰপতি ড’নাল্ড ট্ৰাম্পে চীনক দোষাৰোপ কৰি আহিছে । এনে অভিযোগ চীনে নসাৎ কৰি অহাৰ মাজতে এইবাৰ একপ্ৰকাৰ সকীয়নি দিলে ট্ৰাম্পে ৷তেওঁ কয়,চীনে ইচ্ছাকৃতভাৱে এই ভাইৰাছ বিয়পালে তাৰ ফল ভূগিব লাগিব ৷অৱশ্যে কেনেধৰণৰ ফল ভূগিব লাগিব সেয়া নিশ্চিত কৰা নাই ট্ৰাম্পে ৷ হোৱাইট হাউচত কৰ’নাৰ সংক্ৰমণক লৈ নিয়মীয়া সাংবাদিক মেলত পুনৰ বিশ্বব্যাপী সংক্ৰমণ বিয়পোৱাৰ বাবে চীনক দায়ী কৰে মাৰ্কিন ৰাষ্ট্ৰপতিজনে ৷ ইয়াৰ সমান্তৰালভাৱে আমেৰিকাত ট্ৰাম্পৰ বিৰোধী সকলে সমালোচনা কৰিছে যে কৰ’নাৰ সংক্ৰমণ ৰোধ কৰিবলৈ হোৱাইট হাউচৰ ব্যৰ্থতা ঢকাৰ বাবেই চীনৰ গাত দোষ জাপি সাৰিব বিচাৰিছে মাৰ্কিন ৰাষ্ট্ৰপতিয়ে ।
ট্ৰাম্পে কৰ’নাক আৰম্ভণিৰে পৰাই “চাইনিজ ভাইৰাছ” বুলিয়ে সম্বোধন কৰি আহিছে ।চীনৰ হুবেই প্ৰদেশৰ উহান চহৰৰ পৰা কৰ’না সংক্ৰমণ বিয়পিছিল বুলি বিশ্বজোৰা মত সৃষ্টি হৈছে ৷সেই সূত্ৰে মাৰ্কিন ৰাষ্ট্ৰপতিগৰাকীয়ে ইয়াক চীনা ভাইৰাছ বুলি আক্ৰমণ কৰি আহিছে। আৰু এনেদৰেই চীনক কাঠগড়াত তুলিবলৈ চেষ্টা অব্যাহত ৰাখিছে ট্ৰাম্পে ৷এইবাৰ ট্ৰাম্পে এখোপ আগুৱাই কয় যে,এয়া যদি ভুল হয় তেন্তে বাৰু ঠিকে আছে ৷ ভুল অৱশ্যে ভুলেই কিন্তু চীনে যদি ইচ্ছাকৃত ভাৱে কৰিছে তেন্তে তাৰ ফল নিশ্চয় ভূগিব লাগিব । অতি সম্প্ৰতি মাৰ্কিন সংবাদ মাধ্যমত প্ৰকাশিত বাতৰি অনুসৰি উহানৰ এটি ভাইৰ’লজি লেবৰেটৰীত গৱেষণা কৰি থকা হৈছিল ৷ গৱেষণাৰ বিষয়বস্তু আছিল কোনো এটা ভাইৰাছৰ চৰিত্ৰ অধ্যয়ন আৰু ইয়াৰ বিৰুদ্ধে যুঁজিবলৈ বেইজিঙৰ শক্তি পৰীক্ষা । সেই সূত্ৰে ট্ৰাম্পে কয় যে সেই লেবৰেট’ৰীত ভাইৰাছ প্ৰস্তুত কৰা হৈছিল অথবা ভাইৰাছ বিয়পাই দিয়া হৈছিল । কিন্তু ট্ৰাম্পৰ এই ভাষ্য নসাৎ কৰে চীনৰ চৰকাৰী লেবৰেট’ৰী উহানৰ ইনষ্টিটিউট অৱ ভাইৰ’লজীয়ে ৷
হোৱাইট হাউচৰ বিৰুদ্ধে অৱশ্যে আমেৰিকাৰ আভ্যন্তৰত বহু অভিযোগ আছে ৷ কৰ’না ভাইৰাছক আৰম্ভণিৰে পৰা গুৰুত্ব নিদিয়া,তলাবন্ধ ঘোষণা নকৰা,তলাবন্ধৰ পিছতো কঠোৰভাৱে ব্যৱস্থা নোলোৱা আদি । ব্যৰ্থতা ঢাকিবলৈ দেশৰ ভিতৰত চীন বিৰোধী আৱেগ সৃষ্টি কৰিবলৈ ট্ৰাম্পে চেষ্টা কৰিছে বুলি অভিযোগ ট্ৰাম্পৰ ৷ আনহাতে কৰ’না ভাইৰাছৰ মোকাবিলাত স্বাস্থ্যকৰ্মীৰ বাবে অতিকৈ প্ৰয়োজন পি পি ইৰ বাবে আমেৰিকা চীনৰ ওপৰতে নিৰ্ভৰশীল। তদুপৰি শেহতীয়াকৈ ট্ৰাম্পৰ এক ভাষ্যই বিতৰ্কৰ সৃষ্টি কৰিছে ৷ তেওঁৰ মতে কৰ’না ভাইৰাছৰ সংক্ৰমণৰ ফলত মৃতকৰ সংখ্যাই আমেৰিকাই শীৰ্ষ স্থানত অৱস্থান কৰা নাই ৷ এই বিষয়ত এক নম্বৰত আছে চীন। ইয়াকে লৈ ট্ৰাম্পে বেইজিঙৰ চৰকাৰী পৰিসংখ্যাক প্ৰত্যাহ্বান জনাইছে ৷ ট্ৰাম্পৰ ভাষ্য যে বেইজিঙৰ চৰকাৰী তথ্যতকৈ মৃতকৰ সংখ্যা বহু বেছি আৰু চীনৰ পৰিসংখ্যা মুঠেও বিশ্বাসযোগ্য নহয় ৷
