গ্ৰীণ জ’নৰ পৰা মাত্ৰ ২৪ ঘন্টাৰ ভিতৰত পাঁচজনকৈ লোক ক’ভিড ১৯ ত আক্ৰান্ত হোৱাৰ পৰিপ্ৰেক্ষিতত অৰেঞ্জ জ’নলৈ পৰিৱৰ্তন হোৱা বঙাইগাঁৱৰ বাবে অধিক উদ্বেগজনক হৈ পৰিছে চাৰিজনকৈ আক্ৰান্তৰ সংক্ৰমণৰ উৎস নিৰ্ণয় নোহোৱাটো ৷ একমাত্ৰ প্ৰথমগৰাকী আক্ৰান্ত কিশোৰী আফিয়া তবাচুমৰ সংক্ৰমণৰ উৎসৰ বিষয়েহে ধাৰণা কৰা হৈছে । তাৰ বিপৰীতে যোৱা ৩০ এপ্ৰিলত দুগৰাকী মহিলাসহ যি চাৰিজনৰ আক্ৰান্তৰ তথ্য পোহৰলৈ আহে তেওঁলোক সংক্ৰমণৰ উৎসই ধাৰণা কৰিব পৰা পৰ্যায়লৈ অহা নাই । ইয়াৰ ফলত সমগ্ৰ বঙাইগাঁৱত আতংকৰ সৃষ্টি হৈছে। ইয়াৰ পিছত সংক্ৰমিত হোৱা লোককেইজনৰ সংস্পৰ্শলৈ অহা লোকসকলক স্বেচ্ছাই আগবাঢ়ি আহিবলৈ আহ্বান জনাই জিলা প্ৰশাসনে ।
আফিয়া তবাচুমৰ ক্ষেত্ৰত প্ৰশাসনে সদৰী কৰা অনুসৰি কিশোৰীগৰাকীৰ পৰিয়ালৰ লোকসকল ১৯ মাৰ্চত ধুবুৰীৰ চাপৰৰ বাসিন্দা ককাদেউতাক জামাল উদ্দিনৰ ঘৰলৈ গৈছিল ৷ সেই দিনাই জামাল উদ্দিন নিজামুদ্দিনৰ জামাতত অংশ লৈ উভতিছিল । সাত এপ্ৰিলত জামাল উদ্দিন ক’ভিড-১৯ ত আক্ৰান্ত হোৱা আফিয়াহঁতৰ পৰিয়ালটোকো বঙাইগাঁও অসামৰিক চিকিৎসালয়ত ভৰ্তি কৰোৱা হয়। আৰু ইয়াৰ পিছত ফলাফল নিগেটিভ আহে । ২৩ এপ্ৰিলত দ্বিতীয় পৰীক্ষাটোতো ফলাফল নিগেটিভ আহে । ২৮ এপ্ৰিলৰ তৃতীয়বাৰৰ পৰীক্ষাত আফিয়াৰ পজিটিভ আহে যদিও পৰিয়ালৰ আন সদস্যসকলৰ ফলাফল নিগেটিভ আহে । ২৮ এপ্ৰিলৰ তৃতীয় পৰীক্ষাত আফিয়াৰ পজিটিভ আহে যদিও পৰিয়ালৰ আন সদস্যসকলৰ ফলাফল নিগেটিভ আহে । আনহাতে বঙাইগাঁৱত সম্প্ৰতি কৰ’ণাতংকৰ মাজতে জিলা প্ৰশাসনে আক্ৰান্ত আটাইকেইজন লোকৰ সংস্পৰ্শলৈ অহা সকলো লোককে ৭০৮৬৭৯৩৫০৭ অথবা ০৩৬৬৪২৩১১৭১ নম্বৰত যোগাযোগ কৰিবলৈ আহ্বান কৰিছে ৷
