ক’ভিড-১৯ ৰ মাধমাৰৰ মাজতে শিশুৰ শৰীৰত দেখা দিয়া এক নতুন ৰোগে সম্প্ৰতি সৃষ্টি কৰিছে ইউৰোপক । এই নতুন মূৰৰ কামোৰণিৰ কাৰণ হৈছে ‘ইনফ্লেমেটৰী ছিন্ড্ৰ’ম’। ইতিমধ্যে ২৩০ টি শিশুৰ শৰীৰত এই ৰোগ ধৰা পৰিছে । ইয়াৰে ব্ৰিটেইন আৰু ইউৰোপত দুটি শিশুৰ মৃত্যুও হৈছে । এই নতুন উপসৰ্গৰ স’তে ক’ভিড -১৯ৰ পোনপটীয়া সম্পৰ্ক আছে নে নাই, সেই বিষয়ত বিজ্ঞানীসকল এই পৰ্যন্ত নিশ্চিত হ’ব পৰা নাই । ইতিমধ্যে ‘ইনফ্লেমেটৰী ছিন্ড্ৰ’মত আক্ৰান্ত ২৩০ টি শিশুৰ ভিতৰত কিছু শিশুৰ শৰীৰত কৰ’না ধৰা পৰিছে । কিন্ত সকলো শিশুৰ শৰীৰত ক’ভিড-১৯নথকাৰ বাবেই বিজ্ঞানীসকল কিছু অনিশ্চয়তাত আছে ।
উল্লেখ্য যে বিশ্ব স্বাস্থ্য সংস্থাই ইতিমধ্যেই এই নতুন ৰোগক কেন্দ্ৰ কৰি চিকিৎসকসকলক সচেতন কৰিছে । ‘হু’ৰ তৰফৰ পৰা প্ৰকাশিত শেহতীয়া গাইড লাইনত এই ছিন্ড্ৰ’ম’ৰ বিষয়ে বাখ্যা কৰা হৈছে । এই ছিন্ড্ৰ’মত আক্ৰান্ত শিশুৰ শৰীৰত তিনিদিনৰ অধিক সময় জ্বৰ থাকে । গাত ৰেশ্ব বা মুখমণ্ডল,হাত-ভৰিত প্ৰদাহৰ চিহ্নই দেখা দিয়ে । কেতিয়াবা ৰক্তচাপ হ্ৰাস বা সংকোচনৰ দৰে সমস্যাও দেখা যায়।ক’ভিড -১৯ত বয়স্ক সকল সংক্ৰমিত হোৱাৰ প্ৰৱণতা অধিক, কিন্ত এই নতুন ৰোগত শিশু সকল বেছিকৈ আক্ৰান্ত হোৱাৰ বাবেই চিন্তাও বেছি হৈছে । ‘হু’ৰ অতিমাৰী বিষয়ক বিশেষজ্ঞ মাৰিয়া ভেন কেৰক’ভাই এই সন্দৰ্ভত কয়,’আমি ইনফ্লেমেটৰী ছিন্ড্ৰ’ম সম্পৰ্কে এই পৰ্যন্ত অতি কমেইহে জানিব পাৰিছো । ফলত আশংকাও বৃদ্ধি পাইছে।’
