ঈদৰ নামাজ সম্পন্ন কৰিব পৰাকৈ বাৰ্লিনৰ এটি গিৰ্জাৰ দুৱাৰ মুকলি কৰি দিয়া হৈছে । বাৰ্লিনৰ ক্ৰুজবাৰ্গৰ মাৰ্থা লুথৰান গিৰ্জাত ৰমজানৰ অন্তত মুছলিম সম্প্ৰদায়ৰ লোকসকলে পবিত্ৰ ঈদৰ নামাজ পঢ়িব পাৰিব।কৰ’না ভাইৰাছৰ সংক্ৰমণ ৰোধৰ উদ্দেশ্যে বলৱৎ কৰা সামাজিক দূৰত্বৰ নীতি-নিয়ম মানি মছজিদত নামাজ আদায় কৰাটো অসম্ভৱ প্ৰায় হৈ পৰিছে । এনে অৱস্থাত ঈদৰ সমূহীয়া নামাজ এইবাৰ বিশ্বৰ প্ৰায়বিলাক দেশেই প্ৰত্যাহাৰ কৰিছে । জাৰ্মানীত তলাবন্ধৰ বাবেই বন্ধ ৰখা ধৰ্মীয় উপাসনা স্থলবিলাক যোৱা চাৰি মে’ৰ পৰা মুকলি কৰাৰ অনুমতি দিয়া হৈছে । কিন্তু প্ৰাৰ্থনাৰ সময়ত এজনে আনজনৰ পৰা পাঁচ ফুট দূৰত্ব অক্ষুণ্ণ ৰাখিব লাগিব বুলিও চৰকাৰে স্পষ্ট নিৰ্দেশ জাৰি কৰিছে । এনে দূৰত্বৰ নিয়ম মানি চলিলে বাৰ্লিনৰ নিউক্লানস্থিত দাৰ আছছালাম মজজিদত কেৱল মাত্ৰ জামাতীসকলৰ এটি অংশইহে নামাজ আদায় কৰাটো সম্ভৱ হ’ব । ফলত সমস্যাটোৰ পৰা কিছু হ’লেও সকাহ দিব পৰাকৈ আগবাঢ়ি আহিছে ক্ৰুজবাৰ্গৰ মাৰ্থা লুথৰান গিৰ্জা কর্তৃপক্ষ ।
গিৰ্জাটোত ৰমজানৰ অন্তিম নামাজ আয়োজনৰ প্ৰস্তাৱ প্ৰথমে গিৰ্জা কর্তৃপক্ষৰ পৰাই দিয়া হয় । দাৰ আছসালাম মছজিদৰ ইমামে জনোৱা অনুসৰি ই এটি অতি গুৰুত্বপূৰ্ণ বিষয় বৰ্তমান সংকটৰ সময়ত ঈদে সকলোৰে বাবে আনন্দৰ বাৰ্তা লৈ আহিছে।কৰ’না মহামাৰীয়ে আমাৰ সকলোকে এটি সামাজিক বান্ধোনত আবদ্ধ কৰিছে ।সংকটৰ সময়ত অৱশ্যে সকলো মানুহ একত্ৰিত হয়েই । মছজিদ কমিটীৰ সদস্য চামিৰ হামদৌনে কয়, ‘গিৰ্জাৰ প্ৰস্তাৱটো লাভ কৰাৰ পাছত আমাৰ খুব অদ্ভুত অনুভূতি হৈছিল।কাৰণ গিৰ্জাত বাদ্যযন্ত্ৰকে ধৰি বিভিন্ন ছবি আদি থাকে।যিবিলাক ইছলামিক প্ৰাৰ্থনাৰ স’তে সামঞ্জস্যপূৰ্ণ নহয়; কিন্তু আমি যদি এই সৰু সৰু বিষয়বিলাক পাহৰি যাওঁ তেন্তে গিৰ্জাকো আল্লাহৰ ঘৰ বুলিয়েই মানি ল’ব পাৰিম ।’