তিনিচুকীয়াৰ বাঘজানত অইল ইণ্ডিয়াৰ তৈলক্ষেত্ৰ সংঘটিত বিস্ফোৰণৰ ফলত তৃতীয়দিনাও ভয়াৱহ তেলৰ লগতে মিশ্ৰিত গেছ নিৰ্গত হৈ থকাৰ ফলত অস্বাভাৱিক ভাৱে মৃত্যু মুখত পৰিছে বিৰল প্ৰজাতিৰ শিশুৰ লগতে জীৱকূল ৷ তৈলক্ষেত্ৰখনৰ পৰা গেছ নিৰ্গত হৈ হোৱা অগ্নিকাণ্ডই বিপদ মাতিছে জৈৱ বৈচিত্ৰ্যৰ লগতে জীৱকুলৰ প্ৰতি । উল্লেখ্য যে জিলাখনৰ বাঘজানস্থিত “BGR 5” নম্বৰৰ তৈলখাদত বুধবাৰে পুৱা এক বিস্ফোৰণ সংঘটিত হৈছিল । অইল কৰ্তৃপক্ষই খাদটোৰ পৰা নিৰ্গমন হোৱা গেছ আৰু তেল তৃতীয়দিনাও বন্ধ কৰিবলৈ সক্ষম হোৱা নাই ।
তৈলক্ষেত্ৰটোৰ পৰা ভয়াৱহ তেল আৰু মিশ্ৰিত গেছ নিৰ্গত হোৱাৰ ফলত বাঘজান অঞ্চলত থকা খাল-বিল সমূহৰ লগতে ডিব্ৰু নৈ মাগুৰি মটাপুং বিলৰ পানীৰ ওপৰত তেলৰ চামনি পৰাৰ ফলত মৃত্যু হৈছে বিৰল প্ৰজাতিৰ শিশুৰ লগতে মাছ । সমান্তৰালভাৱে মৃত্যু হৈছে অঞ্চলটোৰ জীৱ-জন্তু, হাঁহ-কুকুৰাৰ ৷ অন্যহাতে, অহৰহ গেছ আৰু তেল নিৰ্গত হৈ থকাৰ বাবে যিকোনো মুহুৰ্ততেই অঞ্চলটোত ভয়াৱহ অগ্নিকাণ্ডৰ সুত্ৰপাত হোৱাৰ সম্ভাৱনা ঘনীভুত হৈ পৰিছে । কেইখনমান অগ্নিনিৰ্বাপক বাহিনীৰ গাড়ীয়ে পানী মাৰি নিয়ন্ত্ৰণৰ চেষ্টা চলাই আছে ৷ ইফালে, তৈলখাদটোৰ পৰা গেছ নিৰ্গত হৈ হোৱা বিকট শব্দই আতংকিত কৰি তুলিছে স্থানীয় ৰাইজক ৷
