কৰ’না ভাইৰাছৰ সন্দৰ্ভত এইমছৰ এক বিশেষ সাক্ষাৎকাৰত সঞ্চালক ড° ৰণদ্বীপ গুলাৰিয়াই কয় যে অনাগত দুমাহত কৰ’নাৰ সংক্ৰমণৰ গতি বৃদ্ধি পাব ৷ কৰ’না ভাইৰাছক প্ৰতিৰোধ কৰিবলৈ দিয়া তলাবন্ধ সফল হ’লেও কিন্তু এই তলাবন্ধই কৰ’নাক নিঃশেষ কৰিব নোৱাৰে ৷ ইফালে কৰ’নাত সকলোতকৈ অধিক আক্ৰান্ত হোৱা তথা হটস্পট ৰূপে চিহ্নিত হোৱা দিল্লী আৰু মুম্বাইৰ বিষয়ে উল্লেখ কৰি ড° গুলেৰীয়াই কয় যে দিল্লীত চাৰিজনৰ ভিতৰত এজন সম্প্ৰতি কৰ’নাত আক্ৰান্ত হৈছে ।
গতিকে সকলোৱে সাৱধানতা অৱলম্বন কৰাটো প্ৰয়োজন ৷ ইফালে তলাবন্ধৰ সন্দৰ্ভত গুলেৰীয়াই কয় যে তলাবন্ধ সফল হৈছে যদিও ই কৰ’নাক নিঃশেষ কৰিব নোৱাৰে ৷লগতে জনসাধাৰণে গুৰুত্ব সহকাৰে তলাবন্ধ মানি চলা নাই ৷ আনহাতে কৰ’না ভাইৰাছক প্ৰতিৰোধ কৰিবলৈ দিয়া তলাবন্ধৰ কাৰণে আমাৰ দেশৰ অৰ্থনৈতিক স্থিতি সম্পূৰ্ণৰূপে শোচনীয় পৰ্যায়লৈ গতি কৰিছে ৷
ইপিনে, স্বাস্থ্য বিভাগে কৰ’নাৰ লগত মোকাবিলা কৰিবলৈ কেনেধৰণে সাজু হৈছে এই প্ৰশ্নৰ উত্তৰত গুলেৰীয়াই কয় যে যিসমূহ লোকৰ অতি সাধাৰণ লক্ষণ দেখা যায় তেওঁলোক চিকিৎসালয়ত চিকিৎসাধীন হোৱাৰ প্ৰয়োজন নাই । আমাৰ অভিজ্ঞতা অনুসৰি যিসমূহ লোকৰ শৰীৰত সাধাৰণ লক্ষণ দেখা যায় তেওঁলোকে ঘৰতেই সুস্থ হ’ব পাৰে। লগতে ভি আই পি ৰোগীসমূহক উচ্চ পৰ্যায়ৰ চিকিৎসা প্ৰদান কৰাৰ অভিযোগক খণ্ডন কৰে ড° গুলেৰীয়াই। তেওঁ কয় আমাৰ কাৰণে সকলো ৰোগী একেই । সম্প্ৰতি আমাৰ ইয়াত ৮০০ লোক চিকিৎসাধীন হৈ আছে । লগতে বহিঃৰাজ্য বা বহিঃদেশৰ লোককো বিশেষভাৱে চোৱা চিতা কৰিব বুলি সদৰী কৰে গুলেৰীয়াই ৷ কাৰণ ভাৰতত আছে যেতিয়া তেওঁলোকৰ সকলো দায়িত্ব দেশৰ।
শেষত ইতিমধ্যে ক’ভিড-১৯ত আক্ৰান্ত হোৱা বৃহৎ সংখ্যক স্বাস্থ্য কৰ্মীৰ বিষয়ে উল্লেখ কৰি গুলেৰীয়াই কয় তেওঁলোকে ক’ভিড১৯ নথকা অঞ্চলসমূহত কাম কৰি আছিল ৷ স্বাস্থ্য কৰ্মীৰ লগতে আৰক্ষীৰো ক’ভিড-১৯ৰ লক্ষণ পোৱা গৈছে । গতিকে সাম্প্ৰতিক সময়ত কৰ’নাত আক্ৰান্ত হোৱালৈ লক্ষ্য কৰিলে আমি যে অধিক সাৱধানতা অৱলম্বন কৰিব লাগিব, তাকেই প্ৰমাণ কৰে ।